Giro bikaina izan zen atzo Ordizian, Goierriko jubilatu elkarteen arteko eskualdeko lehiaketa gastronomikoan.

Zortzi herritako jubilatu elkarteetako bikoteek parte hartu zuten, masailak prestatuz eta sukaldaritzarako duten trebetasuna erakutsiz.

Lehen saria Zaldibiako Beti Gazte elkarteko Periko Zeberioak eta Juan Martin Luloagak eskuratu zuten. Bigarren postua, berriz, Ordiziako Zuhaizti elkarteko Luis Pinta eta Antonio Ruizek lortu zuten.

Zorionak irabazleei eta parte-hartzaile guztiei, baita ekitaldia posible egin duten antolatzaile eta laguntzaileei ere.

Orain, irabazleek irailean Arrasaten jokatuko den finala izango dute helburu.

Gaur egin da Peribidearen ibilbidearen irekiera ofiziala. Gaintzako plazatik abiatu dira parte-hartzaileak, eta Gaintzatik, Altzagatik eta Aramatik igaroz iritsi dira Ordiziara, garai batean baserritarrak azokara iristeko erabiltzen zuten bide historikoa berreskuratuz.

Ibilaldia amaitu ondoren, Barrena Jauregian aurkeztu dute Peribideko istorio ezkutuak liburua, Larraitz Garmendiak eta Lide Lujanbiok idatzia, eta Izaro Lizarragak egin ditu ilustrazioak. Ekitaldian izan dira, Adur Ezenarro Ordiziako alkatea eta Ainhoa Jimenez zinegotzia.

Peribidearen berreskurapena Jakintza Ikastolak Frantzia, Txekia eta Norvegiako ikastetxeekin batera garatutako 'Sustainable Entrepreneurship of Europe Erasmus+' proiektuaren emaitza da. Azken urteotan, ikasleek eta irakasleek elkarlanean jardun dute ondare historiko eta kulturala berreskuratzeko helburuarekin.

Peribidea, hain zuzen ere, Gaintzako, Altzagako eta Aramako baserritarrak Ordiziako azokarekin lotzen zituen bide-sarearen parte izan zen urte luzez. Proiektuaren bidez, bidea berreskuratu eta balioan jartzeaz gain, Gipuzkoako mendibideen sarean homologatzea ere lortu da, gaur egun SL-66 Peribidea izenarekin.

Erasmus+ egitasmoaren helburua ez da soilik bide historiko bat berreskuratzea izan. Proiektuak ondarearen transmisioa, ingurumenaren zaintza eta herrialde desberdinetako gazteen arteko lankidetza sustatu ditu. Horren emaitza dira, besteak beste, gaur aurkeztutako liburua eta bidearen inguruan egindako ikerketa-lanak.

Peribideko istorio ezkutuak liburuak gerraosteko baserritarren bizimoduan eta garaiko testigantzetan oinarritutako kontakizunak biltzen ditu, garai bateko bizimodua eta Ordiziako azokak inguruko herrietan zuen garrantzia ezagutarazteko asmoz.

Liburua eskuragarri izango da ekainaren 12an, Ikastolaren egunean, Herriko plazan, 16:00etatik 18:30era. Online erreserba egiteko: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.

Gaurko ekitaldiarekin amaiera eman zaio urteetako lanari, baina aldi berean hasiera berria ere bada, Peribidea herritarren eta bisitarien eskura geratu baita, gure ondarearen zati garrantzitsu bat ezagutu eta bizitzeko aukera eskainiz.

*** ARGAZKI GUZTIAK IKUSTEKO EGIN KLIK ARGAZKIAREN GAINEAN:

Ekainaren 13an hasiko da Majoriko kanpoko igerilekuen udako denboraldia. Herritarrek uda osoan zehar instalazioez gozatzeko aukera izango dute, eta horretarako hainbat bazkidetza eta sarrera mota izango dituzte eskura.

Udako abonua (ekainaren 1etik irailaren 1era arte) egiteko aukera izango da honako prezio hauekin:

• Bazkidetza familiarra: 140 euro
• Bazkidetza orokorra (+18): 87 euro
• Bazkidetza orokorra (-18): 54 euro

Horrez gain, eguneko sarrerak eta 10 eguneko bonoak ere eskuratu ahal izango dira:

• Sarrera arrunta (+18): 9 euro (10 eguneko bonoa: 66 euro)
• Sarrera arrunta (-18): 5 euro (10 eguneko bonoa: 33 euro)

Familia ugariek, 18 eta 23 urte bitarteko ikasleek, langabetuek, %33 edo hortik gorako desgaitasuna duten pertsonek eta 65 urtetik gorako pentsiodunek hobariak izango dituzte, ezarritako baldintzen arabera.

Aurten ere, taberna zerbitzua egongo da erabiltzaileen eskura. Ordutegia 12:00etatik 21:00etara izango da, bertan, plater konbinatuak, errazioak, eta bestelako proposamen arinak eskainiko dira.

Bestalde, kanpoko igerilekuaren eremuan zegoen igerileku handiko txirrista kendu egin da, ez baitzegoen egoera onean. Erabakia erabiltzaileen segurtasuna bermatzeko hartu da.

Igerilekuaz gain, udan zehar gazte eta helduentzako kirol ikastaroen eskaintza zabala izango da Majorin. Besteak beste, tenis, Danceflow, Ziklo Indoor, Pilates, Entrenamendu Funtzionala, GAP, TRX, Zumba eta Aerobik ikastaroak eskainiko dira, abonatu eta ez abonatuentzako prezio ezberdinekin.

Jon Ander Caballero Kirol zinegotziak adierazi du, “aurten ere udako denboraldian kalitatezko eskaintza bat prestatu dugu ordiziar guztientzat, kirola, jolasa eta familia-aisialdia uztartuz”.

Hori horrela, herritarrak Majoriko udako eskaintzaz gozatzera animatu ditu, instalazioak eta programatutako jarduerak aisialdirako, osasunerako eta herritarren arteko harremanak sustatzeko aukera paregabea direla azpimarratuz.

Ostiralean egin zen XXXII. Kimetz Kontakizun Lehiaketaren sari banaketa ekitaldia Ordiziako udaletxean. Artengo ekitaldiko irabazleei dagokienez, euskarazko kategorian, Nerea Sorondo Andueza tolosarraren Minaren kartografia lanak eskuratu du lehen saria. Gaztelaniazko kategorian,berriz, Emmanuel Guerra Martos sevillarraren La mujer que aprendió a faltar ipuina izan da saritua.

Beste behin ere, parte-hartze handia izan du Kimetz Kontakizun Lehiaketak, guztira 423 ipuin aurkeztu baitira. Jasotako lanetatik, 302 gizonezkoek eta 121 emakumezkoek idatzi dituzte. Hizkuntzari dagokionez, 412 lan gaztelaniaz aurkeztu dira eta 11 euskaraz. Parte-hartzaileen jatorriari erreparatuta, 34 lan Euskal Herritik iritsi dira, 281 Espainiako Estatutik eta 142 Europako eta Amerikako hainbat herrialdetatik, lehiaketaren nazioarteko izaera berretsiz.

Epaimahaia Luisa Etxenike, Eli Tolaretxipi eta Felipe Juaristi idazleek osatu dute. Epaimahaikideek nabarmendu dute aurkeztutako lanen kalitatea eta aniztasuna.

Sari banaketa ekitaldia musika emanaldiz girotu zuten Ordizian bizi diren Ciana Lutumba (Angola), Ana Young (AEB) eta Daniela Llanos (Kolonbia) artistek.

Kimetz Kontakizun Lehiaketak, beste urte batez, literatura sorkuntzaren aldeko apustua berretsi du, Ordizia ipuingintzaren topagune bihurtuz.