Ordiziako Udalak herritarren iritzia jaso nahi du Santa Ana jaien inguruan, datozen urteetako jaiak hobetzeko helburuarekin. Horretarako, galdetegi bat jarri du herritarren eskura, eta parte hartzera gonbidatu ditu ordiziarrak.

Zein da gehien gustatzen zaizun ekitaldia? Zer botatzen duzu faltan? Nola hobetu daitezke jaiak? Galdera horiei eta beste batzuei erantzuteko aukera izango dute herritarrek, euren iritzia eta proposamenak partekatzeko asmoz.

Ekimen hau Jai Batzordeak bultzatu du. Azken hilabeteetan jai nagusien inguruko hausnarketa irekia egiten ari dira, eta herritarren ekarpenak ezinbestekoak dira, behar eta nahi guztietara egokitzeko.

Horregatik, Udalak herritarrak animatu nahi ditu bertan parte hartzera eta inguruan zabaltzera. Galdetegia HEMEN bete daiteke. 

Jai Batzordearen bilera

Bestalde, Jai batzordearen hurrengo bilera datorren apirilaren 29an, asteazkenean, izango da, 18:30ean, Barrenako Biltzar Aretoan. Bilera irekia izango da, eta herritar guztiak gonbidatuta daude parte hartzera eta euren ekarpenak zuzenean egitera.

San Juan auzoan kokatzen da Ordiziako baratze-parkea. 2018an 35 partzelekin inauguratu zen, baina herritarren eskariari erantzunez 2020an beste 24 partzela berri sortu ziren, beraz, guztira 59 partzela ditu gaur egun Ordiziako Baratze Parkeak. Bertan, herritarrek haien produktuak ekoizteko aukera izaten dute. Orain, 31 partzela esleitzeko epea zabaldu da eta 2029ko urte amaiera arte erabili ahalko dira.

Baratza bat eskuratu nahi duenarentzat izen ematea zabalduko da apirilaren 21etik maiatzaren 8ra bitarte, biak barne.

Edozein herritarrek du parte hartzeko aukera eta interesdunek arreta bulegoan edo erregistro elektroniko bitartez aurkeztu beharko dute eskaera.

Izena emateko baldintzak eta aurkeztu beharreko dokumentazioa

ESKAERA ORRIA

Baratzetako zerrendan sartzeko ezinbestekoa izango da Ordizian erroldatuta egotea gutxienez azken bi urteetatik. Horrez gain, onuradunek ondorengo baldintzak ere bete beharko dituzte:

• Aisialdiko baratze ekologikoan nekazaritza eta laborantza jarduerak egiteko gaitasun fisikoa izatea.
• Adingabeen eskaerak aitaren, amaren edo tutorearen bermearekin batera aurkeztu beharko dira, eta pertsona heldua izango da arduraduna arautegi honen ondorioetarako.
• Ordiziako Udalarekiko zerga betebeharren eta bestelakoen ordainketa eguneratuta izatea.
• Beste baratze ekologiko baten erabiltzaile den familia unitate bateko kide ez izatea.
• Eskatzaileak zein familia unitateko kideetako inork Ordizian ez izatea nekazaritza jarduerarako balio duen landa lurrik, ez jabetzan, ez usufruktuan, ez errentan.
• Aisialdiko baratze ekologikoak eduki izan dituenean, arautegi honetan jasotakoa ez betetzeagatik zigorrik jaso ez izana.

Izena emateko, halaber, interesdunek eskaera inprimakiak bete eta horiek arreta bulegoan edo erregistro elektroniko bitartez aurkeztu beharko dituzte. Horrekin batera, ondorengo dokumentazioa ere aurkeztu beharko da:

• NANaren edo legez horren ordezkoa den dokumentuaren fotokopia
• Pentsioduna, erretiroduna, langabea edo gizarte-larrialdietarako laguntza jasotzailea izatearen egoera egiaztatzen duen dokumentua, hala izanez gero.

Behin izen emate epea amaituta eta eskaera guztiak jasota, Udalak onartu eta baztertuen zerrenda argitaratuko du eta 5 eguneko epea zabalduko du erreklamazioak egiteko.

Epe hori pasata, onartu eta baztertuen behin betiko zerrenda osatu eta geratzen diren partzelak zozketatuko ditu Udalak. Zozketan baratza tokatu ez zaion herritarrekin itxaron-zerrenda berri bat osatuko da.

Barrena Jauregia itxita egongo da asteburuetan. Zabalik egon den bitartean egin den espazioaren erabilera desegokiak, eta orain astebete ikasgelan gertatutakoak, Ordiziako Udala erabaki hori hartzera behartu dute.

Ikasgelari dagokionez, Udalaren asmoa da ahalik eta azkarren zerbitzua berriro ere martxan jartzea, baina liburutegiko langileek jakinarazi dute denbora beharko dutela dena txukuntzeko eta konpontzeko, beraz, bitarte horretan itxita egongo da.

Ordiziako Udala lanean ari da espazioa ahalik eta lasterren erabilgarri egon dadin.

2026/27 ikasturtean, irailetik aurrera, Ordiziako Alotza haur eskola Haurreskolak Partzuergoan integratuko da, eta, ondorioz, zerbitzua doakoa izango da.

Irailean hasiko diren haurrentzako izen-ematea apirilaren 20tik maiatzaren 4ra (biak barne) egongo da zabalik. Alotza haur eskolan bertan eman beharko da izena, presentzialki, astelehenetik ostiralera 17:00etatik 18:00etara. Integrazioa irailean gauzatuko denez, izen-ematea oraindik ezin da Partzuergoaren bidez egin, eta, beraz, Alotzan bertan formalizatu beharko da.

Irailetik aurrera, baina beranduago, ikasturtea hasita hasiko diren gainerako haurrek, berriz, hilabetero zabalduko diren izen-emate deialdietan eman beharko dute izena.

Dagoeneko Alotza haur eskolako erabiltzaile diren haurren kasuan, ez dute izen-emate berririk egin beharko.

Bestalde, Haurreskolak Partzuergoak ez du sukaldaritza zerbitzurik eskaintzen, eta haurrek etxetik eraman beharko dute janaria. Hala ere, Alotza haur eskolak orain arte eskaini duen sukaldaritza zerbitzuarekin jarraitzeko aukera aztertzen ari da Udala. Horretarako, familiek izen-emate orrian adierazi beharko dute zerbitzu hori mantentzeko interesa duten ala ez. Zerbitzuaren kudeaketa eta kostua familien esku egongo lirateke (guraso elkartearen bidez), nahiz eta Udalak bidelagun izateko aukerak aztertzen ari den.

Izen-emate orrian aurkeztu beharreko dokumentazioa zehaztuta dago, eta Haurreskolak Partzuergoaren esku-orrian zerbitzuari buruzko informazio osagarria kontsulta daiteke.

Azkenik, izen-emate prozesuan eta, hala badagokio, ondorengo baremazioan, Haurreskolak Partzuergoaren araudia aplikatuko da.

INFORMAZIO ORRIA

ESKAERA ORRIA