Goierri eta Donostia lotzen dituen GO07 autobus lineak 365.200 bidaiari izan ditu martxan jarri zenetik, batez beste egunean 1.000 erabiltzaile inguru. Datuen arabera, zerbitzuak harrera oso ona izan du eskualdean, eta erabiltzaileen %35 26 urtetik beherakoa da.

GO07 linea 2025eko apirilaren 28an jarri zen martxan, eta hilabetez hilabete erabiltzaile kopurua handitzen joan da. Udako hilabeteetan gorakada nabarmena izan zuen, eta irailetik aurrera 35.000 bidaia baino gehiago erregistratu dira hilero.

Ordiziatik guztira 43.249 bidaia egin dira lehen urte honetan, eta horrek erakusten du herrian ere zerbitzuak erantzun positiboa izan duela. Gainera, linea indartu egin behar izan da eskari handiari erantzuteko, eta urtean zehar 2.000 errefortzu baino gehiago gehitu dira.

Atzo, linea berriak urtebete bete duela eta, datuak aurkezteko bilera egin zen Zumarragan. Bertan izan zen Adur Ezenarro Ordiziako alkatea, Azahara Domínguez Mugikortasuneko, Turismoko eta Lurralde Antolaketako diputatuarekin batera. Bilera horretan aipatu zen San Bartolomeko geltoki berria egokitzeko ADIFek egindako obraren harrera-akta oraindik sinatzeke dagoela, baina laster amaitzea espero dela. Agiri hori sinatu ondoren, eserleku bat jarriko du Udalak, eta teknikoki aztertzen ari dira markesina jartzeko lekurik ote dagoen, autobusaren aurrealdea espaloiaren eremuan sartzen baita. Halaber, diputatuari eskatu zitzaion geltoki berrian autobusaren joan-etorrien informazio pantaila bat jartzea.

GO07 linearen bilakaera aztertzeaz gain, Ordiziaren beharrak eta hobetu beharreko hainbat gai ere mahai gainean jarri ziren. Horien artean, herritarrengandik jasotako eskaerari erantzunez, Buztuntza auzoan geldialdi bat jartzeko aukera aztertzea eskatu zitzaion diputatuari.

2026 urteko Ordiziako udalekuetan plaza lortu dutenen zerrenda duzue jarraian.

SAKATU HEMEN

Garagardoaren festa bueltan da Ordizian. Emaneurrek antolatuta, larunbat honetan, maiatzaren 9an, Euskal Herriko IX. Artisau Garagardo Azoka izango da, Plaza Nagusian. 14 garagardo etxe, musika zuzenean, jatekoa, txapelketak, zozketak eta bestelako ekintzak izango dira egun osoan zehar.

2015. urtean antolatu zuen Emaneurre Taldeak lehenengo aldiz Euskal Herrian ekoitzitako garagardoak eskainiko eta plazaratuko zituen azoka. Horretarako Ordiziako plaza baino erakusleku hoberik topatzea zaila. Aurtengoa 9. edizioa izango da eta Euskal Herriko garagardozaleen erreferente bilakatu dela esan daiteke.

Azoka honen helburua da Euskal Herriko garagardoak ezagutaraztea eta bertako garagardo ekoizleen topaleku izatea. Era berean, Emaneurre Taldearen helburuekin lerrokatuta, herriko giroa bultzatzea eta kultura egitarauari ekarpena egitea ere baditu xede.

Aurtengo edizioan, aurreko urteetan bezelaxe, garagardo ekoizleek zuzenean eskeiniko dute eurek ekoitzitako garagardoa, salmenta zuzena izango da. Garagardoa iturritik, edo etxera eramateko botila eta latatan eskuratzeko aukera izango da. Antolakuntzak edalontziak salduko ditu eta kopak ere izango dira aukeran. Epaimahaiak ez du lan erraza izango Euskal Herriko garagardorik onena aukeratzeko.

Garagardoaz gain jatekoa eta plaza girotzeko musika eta animazioa ez dira faltako. Azokako prebia bezala, ostegunean, Larrun Arri Elkartean garagardo dastaketa izango da Basquebeer elkarteko Jabi Ortegarekin. Ostiralean, berriz, Ordizia Hotelean, sortu berri den Nafarroako Korum garagardo etxeko arduraduna izango da.

TXAPELKETA

Garagardo ekoizle bakoitzak garagardo bat aurkeztuko du txapelketara, nahi duen kolore eta estilokoa. Txapelketa ez da estiloka sailkatuko. Epaimahaiak ondorengo irizpideak hartuko ditu kontutan aurketutako garagardoak epaitzeko:

1 – IKUSMENA: Garagardoaren kolorea uniformetasuna. Aparrak argia eta konstantea izan behar du. Garagardo hauek burbuila gehiegi ez dute izaten gasik ez zaielako injektatzen. Baita ere garagardo hauetan posoak aurki ditzakegu, filtraziorik gabekoak direlako, modu naturalean ekoitziak.

2 – USAIMENA: Pausu honetan osagaien usainak hartuko ditugu kontuan (belarrak, maltak, zerealak, espezieak, etab.) eta alkoholaren intentsitate aromatikoa ere. Ez hori bakarrik, sentsazio eta oroitzapen ezberdinak burura ekarri ditzakete usai horiek. Pausu hau ongi egin ezkero garagardo hau ondo ezagutzen lagunduko digu.

3 – DASTAMENA: Zapore ezberdinak hartuko ditugu esate baterako malta, alkohol kopurua, espezieak, fruituak, ... Hemen 2 une bereizi daitezke; lehena katazioarena, ahoan uzten duen “hondar-sentimendua”; eta bigarrena; ahoan uzten duen oroitzapena (hau luzaroan utzi dezakete).

EGITARAUA:

• 11:00 IREKIERA
• 11:30 TXAPELKETA . EUSKAL HERRIKO GARAGARDORIK ONENA AUKERATUKO DU EPAIMAHAIAK
• 12:00 PONTX PAILAZOA
• 14:00 SARI BANAKETA
• 14:30 GOIZEKOAREN ITXIERA ARRATSALDEA
• 17:00 ARRATSALDEKOAREN IREKIERA
• 18:30 BROKEN BROTHERS BRASS BAND
• 20:30 JOSETO TA ANAIAK ELEKTROTXARANGA
• 23:00 ZOZKETA
• 23:15 TOKA TXAPELKETA
• 23:45 ESPUELA
• 00:00 ITXIERA

Tokiko politikan emakumeenganako indarkeria eta sexismoari aurre egiteko Ordiziako Udalak duen konpromisoaren barruan, Basqueskolaren topaketa egin zen atzo Ordiziako Udaletxean, udal gobernuan eta udal-korporazioan parte hartzen duten emakume hautetsiekin. Saioaren helburua emakume hautetsiek jardun politikoan bizi dituzten errealitateei buruz hausnartzeko eta esperientziak partekatzeko espazioa sortzea izan zen.

Topaketan zehar, emakumeek politika instituzionalean eta alderdien barruan bizi izan dituzten egoera mugatzaileak, zailtasunak eta askotan normalizatutako jarrerak izan zituzten hizpide. Era berean, norberaren esperientziatik eta elkarlanetik garatutako indarguneak eta estrategiak ere partekatu zituzten.

Hausnarketarako eta elkarri entzuteko gune aberasgarria izan zen saioa, eta bertan agerian geratu zen emakumeek tokiko politikan duten presentzia eta ahalduntzea sustatzen jarraitzeko beharra.

Topaketa Basqueskolako kideek dinamizatu zuten, eta emakume hautetsien arteko saretzea, prestakuntza eta babeserako espazioak indartzea izan zuen helburu.

Virginia Woolf Basqueskola EAEko emakume alkate eta zinegotziei zuzendutako espazioa da, EUDEL eta Emakunde-k sustatua. Egitasmoaren helburua emakumeen ahalduntzea bultzatzea da, berdintasunaren aldeko estrategiak eta tresnak eskainiz, betiere esperientzia partekatutik abiatuta.

Ordiziako Udalak adierazi du lanean jarraituko duela tokiko politikagintzan berdintasuna sustatzeko eta emakumeek espazio publiko eta instituzionaletan pairatzen dituzten indarkeria eta jarrera sexistak identifikatu eta horiei aurre egiteko.