Image
Image

Udal artxiboa lekualdatzeko lanak hasi da

Gaur udal artxiboa lekuz aldatzen hasi gara eta Arana 17an Udalak erositako lokalean kokatuko da. Honela, hartutako konpromisoa betez, otsailerako anbulatorio azpian (Domingo Unanue Plazan) Udalak zeukan espazio guztia Osakidetzaren esku geldituko da eta Osasun Zentroaren handitzearen obra martxan jartzeko moduan izango dira. Inbertsio honekin Ordizia 2030 Ekintza Planeko 12.34 ekintza betetzen da.

Joan den 2021eko abenduaren 30an sinatu zen azkenean Arana 17ko lokalaren jabegoaren eta Ordiziako Udalaren artean sal-erosketa kontratua. Udalak 280.000 euro ordainduko ditu bi solairutan 700 metro koadro inguru dituen lokalagatik. Ordainketa lau urteetan burutuko da, 70.000€ urtero 2021etik 2024era.

Ekintza honekin, anbulatorioaren azpian geratzen den azkeneko espazioa libre geratuko da, aurretik KZ Gunea, Fiare, Stop Deshaucios edo Ordiziako Rugbyk erabiltzen zituzten lokalak dagoeneko anbulatorioaren esku geratu ondoren, eta erabilera Torrean birkokatu ostean.

Artxiboa Arana 17

Azken urratsa udal artxiboa Aranara lekualdatzea da. Horrela, aurreko legegintzaldiko proposamena gainditu da, izan ere, bertan ez zen aurreikusten Udal artxiboa bere osotasunean aldatzerik. "Osasun zentroa handitzeko beharrezkoa ikusten zen ahalik eta espazio gehien uztea Osakidetzari, eta horregatik erabaki dugu Arana 17ko lokala erostea. Prozesua ez da laburra izan, hasteko espazioa aurkitu behar izan dugulako, eta bestetik 90 jabe ezberdin zituelako lokalak", azaldu du Adur Ezenarro, Ordiziako alkateak. Hala, Domingo Unanue enparantzako mailan Udalak zituen lokal guztiak egingo den anbulatorio berrira bideratuko dira.

Egokitzapen lanak esleituta eta martxan daude dagoeneko, eta Iparragirre Eraikuntzak burutuko ditu 29.973,90 eurotan. Lokalean bertan topatu diren fibrozementuzko hainbat pieza kenduko ditu Ryde Obras y Servicios enpresak 3.146 eurotan, horretarako erabili behar den protokolo zehatza jarraituz. Artxiboaren eguneratze lanak eraman dituen Ereiten enpresak artxiboko kutxen lekualdaketa aholkatuko du, 3.294,23 eurotan, ez baita edonolako materiala lekuz aldatu behar dena. Azkenik, EUN enpresak desmuntatu eta kokapen berrian berriro muntatuko ditu egun artxiboan erabiltzen diren apal mugikorrak, 6.958,15 eurotan.

Honela, Osakidetzari  emandako otsailak 2ko epearekin beteko da, eta anbulatorioaren azpiko eremu guztia libre geratuko da. Lanak hasterakoan, anbulatorioaren funtzionamendua bermatuko da. Horretarako, dagoeneko adostu da Domingo Unanue plazaren barnean behin-behineko moduluak jarriko direla, faseka egingo den obrak libre utziko dituen espazioekin batera osasun zentroaren zerbitzua bermatzeko.

Ordizia kalea itxita, asfaltatzeagatik

Bihar, osteguna, goizeko 09:00etatik 12:00etara Ordizia kalea itxiko da asfaltatze lanak direla eta.
Autobus zerbitzuari dagokionez, ordutegi horretan, Beasaingo norabidean, Otegienean eta Urdaneta 78an geratuko da autobusa.

Asfaltatze lanak aurrera doaz

Bihar, osteguna, Urdaneta kaleko asfaltatze lanak egingo dira. Trafikoa baimenduko da baina garraio publikoa Beasain norabidean itxi egingo da 11:00etatik 13:00etara. Arratsaldean eta ostiralean Joseba Rezola pasealekua asfaltatuko da baina trafikoa baimenduta egongo da. 

Berrikuntzak autobus geltokietako markesinetan

Herriko autobus geltokietako markesinetan kristal berriak jartzeko lanak egiten ari gara. Horrez gain, segurtasunagatik aldatu zen Bizkaia pasealeku hasierara autobus geltokia, eta bertan markesina ere dagoeneko kokatu da.

logo ordizia bizi herria

Image
Image
Image