Altamirako eskola zaharra berritzeko lanetan ari da Udala. Garai batean ikastetxe izandako eraikin hau, auzo-elkartearen egoitza da gaur egun. Urte asko ditu, ordea, eta nahiko egoera kaskarrean zegoen. Besteak beste, teilatua, terraza eta kanpoaldeko eskailerak berrituko dira lehen fase honetan.

Adur Ezenarro alkateak azaldu duenez, “eraikin hau berritzea aspalditik genuen asmo bat zen, eta dagoeneko hasi gara lanekin. Esan ohi da etxe bat ezin dela teilatutik hasi, baina konponketak bai hasi behar dira teilatutik”. Izan ere, teilatuak uralita zuen, eta iaz amiantoa erretiratzeko lanak egin ziren bertan, 6.000 euroko aurrekontuarekin. Horrez gain, teilatu berria ere jarri da, beste 50.000 euroko inbertsioa eginez.

Orain, terraza berritzeko lanetan ari dira. Itokinak zituen, eta iragazgaizte lanak egin dira. Horrez gain, zoru berria ere jartzen ari dira, eta barandilla berriak ere jarriko dira. Beheko solairutik terrazara igotzeko bi eskailera daude; hauek ere egoera txarrean zeuden, eta biak berrituko dira. Lan hauek guztiek 72.000 euroko kostua izan dute.

Horrenbestez, lehen faseko lan hauetan, guztira 128.000 euroko inbertsioa egin da. Behin kanpoaldeko lanak bukatutakoan, udalaren asmoa da, bigarren fase batean barrualdean ere hainbat konponketa lan egitea.

Ordizia 2030 ekintza planeko helburuak jarraituz, Majori Kiroldegian 120 plaka fotovoltaiko instalatuko dira. Gaur hasiko dituzte lanak, eta hilabeteko epean bukatuta izatea aurreikusten da.

Lanen aurrekontua 45.000 eurokoa izango da, eta Ekilor enpresak egingo ditu. Plakak saskibaloi kantxaren teilatuan jarriko dira, igerileku aldeko isurialdean. Guztira 67,8 Kw-ko energia sortuko dute, eta honek, Majorik daukan horniketaren %17 suposatuko du.

Adur Ezenarro alkateak azaldu duenez, “hau lehen urrats bat izango da Ordizia 2030 planean aipatzen den %30eko helburua lortzeko bidean”. Hala, aurrerantzean kiroldegian energia berriztagarriak bultzatzeko ekintza gehiago egingo direla iragarri du. “Orain saskibaloi kantxako teilatuan jarriko dira, baina ahalik eta espazio gehien erabili nahi dugu panel fotovoltaikoak jartzeko”.

Proiektu honen finantziazioa, EVE-EEE Euskal Energiaren Erakundearen bidez bideratuko bada ere, Next Generation EU dirulaguntza lerroaren bidez egingo da.  

Plaka fotovoltaikoen publizitate-kartela

Azken euriteen ondorioz, Altamira auzoan arazoak sortu izan dira, menditik datozen euri urak ez zeudelako ondo bideratuta. Altamirakoa auzo zaharra da, eta bertako hoditeria ere, zaharkituta zegoen. Hori dela eta, udalak Altamira kaleko hoditeria berria jarri eta euri urak behar bezala bideratzeko lanak hasi ditu. Ur horiek, menditik behera, Altamira kaleko etxeen eta Altamira estadioaren azpitik pasatzen dira egun. 

Zaharberritze lan hauek Eguberrietarako bukatzea espero da. Bitartean Altamira kalea itxi egin da eta hainbat aparkaleku kendu behar izan dira, baina beste batzuk egokitu dira Zumalakarregi etorbidean.

“Berrikuntza lanak egingo ditugu datozen egunetan Ordizian”, zehaztu du Maitane Alvarez alkateordeak.

Astelehenean hasita, Okorro parkeko eskaileren ondoren dagoen zuloa tapatuko da, eta horrez gain, Altamira Estadioko anexoko aparkalekuan dauden bi isletak pikatu egingo ditugu eta modu horretan lau aparkaleku berri eraikiko dira. “Kirolak indar handia du Ordizian eta asko izaten dira kirol partidak ikustera gerturatzen direnak. Hala, obra hau eginez lau aparkaleku berri irabaziko ditugu”, gehitu du alkateordeak.

Obrak ordu gutxi batzuk iraungo du eta horretarako aparkalekuko eremu bat okupatuko da makinekin. Hala ere, astelehenean aparkalekua libre utzi beharko da, lan hauek egin ahal izateko.

Horrez gain, herrian zehar asfaltatze lanak ere egingo dira, dauden zulo batzuk tapatuz, besteak beste, Euskal Herria kalean. Baina ez da aktuazio bakarra izango, udaberrian herriguneko beste hainbat kale ere asfaltatuko dira”, gehitu du. “Badakigu asfaltatze lanak garrantzitsuak direla, errepidea ahalik eta ondoen izateko. Horregatik, urteroko plangintza egiten gabiltza aktuazio hauek guztiak jasotzeko”, amaitu du.