Urteroko kirol hitzordu berezia izango dugu abenduaren 31an Ordizian. XLVIII. San Silbestre proba, ‘Txato’ Caballero memoriala, ospatuko dugu, 18:30ean hasita.

“Urtero jendetza elkartzen da urteari amaiera korrika emateko. Proba herrikoia da, eta horrek egiten du berezi Ordiziako San Silbestrea: familiak, lagunak, kuadrillak… elkarrekin korrika gozatzen ikustea”, azaldu du Jon Ander Caballero, Ordiziako kirol zinegotziak. Gaur bertan zabaldu da izen ematea.

Kuadrillen arteko sailkapena

Proba herrikoia 18:30etan hasiko da, eta izen ematea ezingo da egunean bertan egin; aurrez kronoak.com helbidean egin beharko da. Aurten, gainera, berrikuntza bat izango dam izan ere, kuadrillen arteko sailkapena egongo da: mutilak, neskak eta mistoa. “Taldeen artean pizgarri bat jarri nahi genuen, eta horregatik sortu dugu kategoria berri hau. Banaka atera nahi duenak horretarako aukera izango du, noski, baina askotan kuadrilla handiak ateratzen dira. Horregatik, pentsatu dugu lau partaideko taldeak osatu, eta hala atera daitezkeela proban”, gehitu du Caballerok.

Kategoria bakoitzeko irabazleak afari edo bazkari bat izango du lau lagunentzako (talde bakoitzak 4 partaide izango ditu). Izena ematea kuadrillako kide batek egin beharko du www.kronoak.com webgunean, eta gainontzeko hiru kideak ere inskribatuko ditu. Kuadrilla bakoitzaren postuak batuz egingo da sailkapena. Postuen batuketan puntu gutxien lortzen duen koadrila izango da irabazlea. Horrela, lau kideak kuadrillen sailkapenean zein banakako sailkapenean inskribatuta egongo dira, bietan.

Horrez gain, txikienentzako ere izango dira lasterketak. 17:30etan hasiko dira aurrebenjaminak, eta hala, bost minuturo kategoria desberdinetako haurrak aterako dira korrika egiteko zapatilak jantzita herrian barrena.  

Medaillak, plazari erreferentzia

Aurten ere medaila bereziak emango dira. Orain urte batzuk abian jarri moduan, Jakintza eta Urdanetako Lehen Hezkuntzako laugarren mailako haurrei eskatu zaie medailarako irudia izango zen haien proposamenak aurkezteko. Aurtengoan Jakintza Ikastolako Luken Huxford izan da irabazlea, eta beraz, bere irudiarekin egindako medailak izango dira lasterketa amaitzen dutenek jasoko dutena. Elkarlana oinarri izaten dugu ekimen honetan, eta Garaguneko kideek landyardak jarriko dituzte medailetan.

Palestinarekiko elkartasuna

Palestinaren aurkako genozidioaren harira, Jakintza ikastolako DBHO1en azken hilabetetan Palestinako egoeraren inguruko lanketa egin dute. Lanketa horretan gatazkaren jatorri eta ondorioak ezagutzeko aukera izan dute, eta horrek eraginda neurriak hartu nahi izan dituzte. “Nolabait lagundu nahi izan dugu bizitzen ari diren egoera latz hori arintzen, bigarren maila batean jarriz eta benetan daukanari garrantzia emanez: bizitzen ari diren genozidioari. Lagundu ahal izateko, laster salgai jarriko ditugun kamiseta batzuk diseinatu ditugu. UNRWArekin elkarlanean ari gara lortutako dirua Palestinara bideratzeko”, nabarmendu dute eskolako ordezkariek.

UNRWA Palestinan bertatik bertara lanean ari den erakundea da eta bere langileen gehiengoa palestinarrak dira. “Dirua lortzeaz gainera, egoera ikustarazteko nahi horretan, herritarrei San Silbestrean kamiseta honekin ateratzeko deia zabaltzen diegu, honela herri bateratu eta solidario baten irudia zabalduz. Palestinar herria ez baitago bakarrik”. Beraz, herritarrei dei egiten zaie San Silbestrean kamiseta horrekin ateratzeko, bi herrialdeen arteko elkartasunaren irudi.

Kamisetak 15 eurotan erosteko aukera izango da, eta sare sozialen bidez jakinaraziko da zein egunetan. 

Ostiral honetan Boxeo Gaua izango dugu Beti Alai pilotalekuan. 74. edizioa izango da, eta 22:30etan hasita 9 borrokaldi izango dira. Kerman Lejarraga bizkaitarra omenduko da, eta sarrerak Amonane eta Nerea tabernetan eros daitezke.

Ordiziako Klasikoaren 102. edizioa abian da. Duela hilabete batzuk ekitaldia antolatzeko aurrekontu faltak sortu zuen zalapartaren ondoren, herritar guztiek eliteko txirrindularitzaz gozatu ahal izango dute berriro. Urtero bezala, uztailaren 25ean Santa Ana jaiekin batera jokatuko da proba. Gaur, Txapel Gorri elkarteko kideek prentsaurrekoa eman dute Adur Ezenarro alkatearekin eta probaren babesle diren Gipuzkoako Foru Aldundiko eta Diario Vasco-ko ordezkariekin batera, eta aurten Rural Kutxako ordezkariak ere bertan izan dira, izan ere, egin duten ekarpen ekonomikoari esker antolatu ahal izan da aurtengo lasterketa.

Adur Ezenarrok eskerrak eman dizkie antolatzaileei urtero horrelako proba bat prestatzeak suposatzen duen ahaleginagatik. "Dagoeneko ez da bizirik geratuko Ordiziako Klasikoa ezagutu ez duen pertsonarik, jaien barruan kokatzen den eta txirrindularitzaren urteroko hitzordua den ekitaldia. Herritar guztiak animatu nahi ditugu proba handi honetaz gozatzera etor daitezen ".

Txapel Gorri elkarteak eskerrak eman nahi izan dizkie erakundeei eta enpresei, aurten izandako gorabeherei aurre egin eta proba ospatzeko eman duten laguntzagatik.

Aurten 19 taldek hartuko dute parte, horietatik 4 World Tourrekoak (Cofidis, Astana, Movistar...), 8 Pro-Teamekoak eta beste 7 kontinentearteko kategoriakoak. Aurten ere txirrindulari ezagun ugari izango dira, horien artean iazko irabazlea, Jan Christen suitzarra, UAE Team Emirates taldekoa. Ibilbideari dagokionez, aldaketa bat egongo da, nahiz eta bost itzuliak berdinak izango dira, Abaltzisketako igoera tradizionalarekin, baina Larraiztik jaitsieraren erdian, Zaldibiarako bidean eskuinera egin eta, Gaintzara igoko dira txirrindulariak itzuli guztietan. Ez dute Altzo igoko. 

Larunbat honetan jokatuko da Ordiziako Altamira estadioan IX. Ordizia atletismo mitina. Aurten, Continental Tour Bronze mailakoa izango da eta goi mailako atletek parte hartuko dute, besteak beste, Asier Martinez, Eva Santidrián, Maria Isabel Perez, Blanca Hervas, Fatima Diame, Elian Larregina, Marina Martínez eta Jose Angel Pinedo.

Zuzenean jarraitzeko aukera izango duzue hemen: https://youtube.com/live/HfCZ8R5Kutw?feature=share eta ETBn 21:00-22:30 bitartean.
Sarrerak internetez eros daitezke https://vivetix.com/es/entradas-ix-ordizia-meeting-jose-antonio-nazioarteko-pena-mitina-z7nw?s=link edo Altamira Estadioan bertan.

*Argazkia: Goierriko Hitza