Ordiziako Majori kiroldegiak hainbat hobekuntza egin ditu azken asteetan, erabiltzaileen erosotasuna eta entrenamendu esperientzia hobetzeko helburuarekin. Egindako berrikuntzen artean daude gimnasioan makina berriak jartzea, espazioaren berrantolaketa eta ikastaro eskaintza handitzeko egindako egokitzapenak.

Gimnasioak makina berriak ditu dagoeneko, besteak beste hip thrust egiteko makina eta eliptiko berriak. Horrez gain, espazioa berrantolatu egin da erabiltzaileen zirkulazioa eta erosotasuna hobetzeko: kardio eremua alde batean kokatu da, indar makinak beste alde batean, eta luzaketa gunea ere berritu da. Takila berriak ere instalatu dira.

Bestalde, ikastaro eskaintza zabaltzeko helburuarekin, gela berri bat egokitu da, eta TRX entrenamenduetarako eta entrenamendu funtzionalerako materiala eta espazioa prestatu dira.

Egindako hobekuntzek Majori kiroldegiaren kirol azpiegiturak modernizatzen eta eskaintza erabiltzaileen beharretara egokitzen jarraitzeko helburua dute.

Igande honetan jokatuko da Ordiziako Mendi Lasterketa, Ordiziako mendietan eta herrigunean barrena egingo den hitzordu berezia. Proba honek mendia eta herria lotzen ditu, eta aurten ere mendiko lasterketaren zale ugari bilduko ditu Ordizian.

Aurtengo edizioan bi distantzia izango dira aukeran. Alde batetik, 14 kilometroko lasterketa, 600 metro inguruko desnibel positiboarekin, Agorta eta Ioia ingurura igotzen den ibilbidearekin. Bestetik, 21 kilometroko proba, 1.000 metro inguruko desnibelarekin, Murumendira igotzen den ibilbide exijenteagoa. Bi lasterketak Ordiziako Plaza Nagusian hasi eta bukatuko dira.

Korrikalarien ongizatea eta segurtasuna bermatzeko, anoa-guneak jarriko dira ibilbidean zehar, besteak beste Agortan, Murumendin eta Ioian.

Aurten 200 korrikalari inguru espero dira, eta horien artean ia %17 emakumezkoak izango dira. Antolatzaileek bereziki azpimarratu dute gazte askoren parte-hartzea, 25 urtetik beherako korrikalari ugari izena emanda baitaude, mendiko lasterketen etorkizunaren erakusgarri.

Parte-hartzaileen artean Goierriko korrikalari ugari izango dira, besteak beste Ander Biguri, Jon Rodriguez, Manu Unanue, Julen Balerdi edo Joseba Leunda; eta emakumezkoen artean, Intza Urrestarazu, Nora Anton, Lara Ugalde eta Ane Zubiarrain, beste askoren artean.

Izena emateko epea larunbatera arte egongo da zabalik, kronoak.com webgunearen bidez.

Antolatzaileek gogorarazi dute lasterketa hau aurrera eramateko boluntarioen lana eta babesleen babesa ezinbestekoak direla, eta eskerrak eman dizkiete guztiei. Gainera, iganderako eguraldi egonkorra espero denez, herritarrak eta bisitariak animatu dituzte Ordiziara hurbiltzera, korrikalariei babesa ematera eta giro ona sortzera.

1968tik

Ordiziako Mendi Lasterketak bere sustraiak 1968an ditu. Urte hartan, Rubio eta Eskitxabel korrikalariek apustu bitxi bat egin zuten: Larraiztik San Migelera joan-etorria egitea, Rubiok ordubeteko abantailarekin korrika, eta Eskitxabelek oinez. Azkenean, Eskitxabel izan zen irabazlea, eta gertaera hura izan da gaur egun ezagutzen dugun lasterketaren abiapuntua.

Apustu hura omentzeko asmoz, 2018an antolatu zen lehen aldiz Ordiziako Mendi Lasterketa, jatorrizko ibilbidean eta taldeka. Urteek aurrera egin ahala, proba egokitzen eta hazten joan da, eta 2023an jauzi garrantzitsua eman zen: Aralarko ibilbidea atzean utzi, eta lasterketa Ordizia eta inguruko mendietara ekarri zen.

Majori kiroldegian jokatu zen larunbatean 13. Ordizia Urpekoak Saria. Guztira 16 taldetako 240 igerilarik parte hartu zuten maila bikaina erakutsi zuen txapelketan. Gizonezkoetan Mario Rojas (CADAS – Zaragoza) izan zen garailea, eta emakumezkoetan Maiwen Hamon (Pays D’Aix Natation – Frantzia).

Gizonezkoen artean bigarren postua Marcos Jose Madridentzat (AE Bellsport – Bartzelona) izan zen, eta hirugarrena, Jose Manuel Santanorentzat (Top Ten – Alikante).

Emakumeen artean, berriz, bigarren postuan Anais Verger (CPB Rennes – Frantzia) geratu zen, eta hirugarren, Irati Lakunza (Igarondo Urpekoak – Tolosa).

Giro ederra eta iazkoa baino maila handiagoa izan ziren protagonista. Antolakuntza, ekitaldi honetan lorturiko denbora eta txapelketaren maila orokorrarekin oso pozik azaldu da. Zorionak parte-hartzaile eta antolatzaileei.

Larunbat honetan, urtarrilaren 31n, Ordiziak urpeko igeriketako hitzordu garrantzitsu bat hartuko du Majori kiroldegiko igerilekuan. Ordizia K.E. Urpekoak taldeak antolatuta, E.H.U.I.F.-ren laguntzarekin eta Ordiziako Udalaren babesarekin, XIII. Ordizia Urpekoak Saria txapelketa jokatuko da.

Guztira 240 igerilarik hartuko dute parte 16 taldetan banatuta. Parte-hartzaileen artean erkidego desberdinetatik etorritako taldeak ez ezik, Frantziako bi talde ere izango dira, eta bertan izango dira Europako eta Munduko txapelketetan lehiatu diren maila handiko igerilariak ere.

Txapelketa bi jardunalditan banatuko da: goizez 09:30etik 12:30era eta arratsaldez 16:30etik 20:00etara. Hegatsak erabiliz egiten den igeriketa modalitateak erritmo bizia eta ikusgarritasun handia eskaintzen du, eta kirol honen zale zein herritar guztientzat ikuskizun erakargarria izango da.

Kartela