Ordiziako Udalak 'Ordizia Ezagutu' egitasmoa jarri du martxan. Honen bidez, herriko bizia, baliabideak eta elkarteak gertutik ezagutzeko aukera eman nahi zaie, bai Ordiziara iritsi berriei, bai urte batzuk bertan bizitzen daramatzatenei, eta baita betidanik herrian bizi direnei ere. Hain zuzen ere, azken hauei deialdi berezia egin nahi zaie aurten.

Otsailaren 26an hasi eta apirilaren 11ra arte, zazpi astez, astean bi egunetan (asteazkenak eta ostiralak) egingo dira saioak, 10:00etatik 12:00etara bitartean. Saio horiek hiru bloke nagusitan banatuta egongo dira.

• Herriko bizia: Ordiziako kultura, historia eta abar ezagutzeaz gain, udal ordenantzak, zaborren kudeaketa eta bestelako jakingarri praktikoak ere landuko dira. Herriko azpiegiturak ezagutzeko bisita gidatuak egingo dira, eta baita hainbat udal baliabide ere, hala nola: hizkuntza eskola, osasun zentroa, Kzgunea...
• Baliabideak: Herrian hainbat arlotan dauden baliabide publikoak ezagutuko dira: enplegu zerbitzuak, osasun zentroa, ongizate zerbitzuak... Azterritartasun legea edota atzerriko tituluen homologazioa ere landuko dira, besteak beste.
• Herriko dinamikak: Herriko elkarteak eta haien dinamika ezagutu eta egonaldiak egingo dira haiekin. Herriko agenda eta ekitaldien berri ere emango da, umeentzako saioak, kultur ekintzak, eta abar.

Egitasmoan parte hartzen duten guztiei, ziurtagiri bat emango zaie, saioen bukaeran. Parte hartzeko, aurrez eman behar da izena, 679876779 telefonora deituta edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatzita.

Haur eta nerabeen artean mugikorraren erabilera gutxitu eta gizartean kontzientzia zabaltzeko asmoz, Ordiziako ikastetxe ezberdinetako guraso talde batek 'Altxa Burua' ekimena sortu du herrian. Gaur aurkeztu dute proiektua, eta bertan, udalarekin elkarlanean eta ikastetxeetan nahiz herri mailan antolatzen ari diren hainbat egitasmo eta kanpainaren berri eman dute. 

Ainhoa Jimenez zinegotziak azaldu duenez, "iazko ikasturtean, gurekin harremanetan jarri ziren ikastetxe ezberdinetako gurasoak, mugikorraren erabilerarekin kezkatuta, eta beste herri batzuetako adibideak ezagututa, Ordizian zerbait egiteko asmoa agertu zuten". Udala ere gai horri bueltaka zebilen, zerbait egin nahian. "Udaberrian lehen saio bat egin genuen Miren Rosekin, eta bertatik sortu zen Altxa Burua talde hau, esan bezala, ikastetxe ezberdinetako gurasoek eta udalarekin elkarlanean". Izan ere, udalak "prestutasun osoa" du horrelako egitasmoetan parte hartu eta laguntzeko. Bide horretatik, abendurako Telmo Lazkanoren hitzaldi/tailerra antolatu dute elkarlanean. "Bi saioko tailer edo formakuntza txiki bat izango da, lehenengoa abenduaren 4an izango da, eta bigarrena 11n, 18:00etan, Barrenan". Saio hori interesa duen herritar orori zuzendutakoa izango da, baina ikastetxeei begira ere, beste saio batzuk antolatu dituzte: irakasleei begira, Telmo Lazkanok berak gidatutakoa, eta ikasleentzat Maitane Ormazabalek gidatuko duena.

Josune Ormazabal Altxa Burua ekimeneko kideak ere, "Ordizia mailako guraso talde bat" direla azaldu du. "Gure seme-alabengan pantailek eta mugikor adimentsuek izan ditzaketen ondorioek kezkatuta hasi ginen lanean". Altxa Burua ekimena "EAE mailan oso saretuta" dagoela dio; "herri askotan taldeak sortuta daude eta gu geu ere Goierriko eta Gipuzkoako taldeekin lanean hasi gara". Taldearen helburu orokorrak "sentsibilizazioa, hausnarketa eta herri mailan saretzea" direla azaldu du. "Dagoeneko ikastetxeekin eta udalarekin bildu gara, gurasoei galdetegi bat eta hausnarketa kanpaina bat zabaldu dizkiegu, eta esan dezakegu kezka orokorra dela, gizarte mailako arazo bat izateaz gain, osasun mailako arazo baten aurrean gaude eta denon ardura da gure haurrak eta nerabeak babestea".

Hainbat egitasmo esku-artean

Altxa Burua taldeko kidea da Amaia Epelde ere, eta une honetan esku artean dituzten ekimenen berri eman du. "Batetik, Altxa Burua Gipuzkoak bultzatutako ekimen batekin bat egin dugu, eta herrian dauden 'mugikorrik gabeko arnasguneak' identifikatu eta kartel batzuekin markatu nahi ditugu. Bestetik, hemendik gutxira 'gurea ere erabil dezakezu' kanpaina martxan jartzeko asmoa dugu; honen bidez, herriko komertzio eta zerbitzu publikoetan pegatina batzuk jarri nahi ditugu, gure txikiek jakin dezaten edozein larrialdiren aurrean edo beharra duten kasuetan, leku horietan sartu eta bertako telefonoa erabili ahal izango dutela". Triptiko bat ere prestatu dute, elkartearen eta dituzten helburuen berri emateko; eskuorri horiek ikastetxeen bidez banatuko dituzte familia guztietara. Horrez gain, Telegram kanal bat ere sortu dute, informazioa emateko, eta bide batez kontzientzia sortzeko, "azkenean hori baita gure helburu nagusia, kontzientziazio bide horretan lan egin, gure haurrei mugikorra edo smartphone-a ahalik eta beranduen eman ahal izateko".

Ordizia 'Harrera herria' da, eta Ordizia Kolore egitasmoaren barruan, aurten Kulturen Arteko VIII. Topaketa egingo da, azaroaren 4tik 9ra bitartean. Egitasmo hau urtez urte sendotzen ari da, eta hainbat ekitaldi parte-hartze handikoak izaten dira, hala nola, Munduko Arrozen Eguna. Ordizian elkarbizitzen diren jatorri eta kultura ezberdinak hobeto ezagutu eta harremanak bultzatzea da egitasmo honen helburu nagusia.

Ainhoa Jimenez Ongizate, berdintasun eta heziketa zinegotziak gogorarazi du “Ordizia Harrera Herria” dela eta horrek “poztasun eta aberastasun handia” ematen duela. Aurten “Errumaniari arreta berezia” jarriko zaiola azaldu du, “Ordizian bizi den etorkin komunitaterik zabalena” delako. “Hiri hezitzailea proiektuan foro ezberdinak ari gara lantzen, eta horietako bat da Harrera Herriarena. Bertan aipatu zen urtero komunitate bati aipamen berezia egingo zitzaiola, eta Errumania izan da aurten hautatua”. Hala, Kulturen Arteko Topaketan ere, keinu bat egingo zaio herrialde horri.

Bide horretan, aurten antolatu diren ekitaldietako batzuetan, Errumania izango da ardatza, hala nola ipuin kontaketan edota sukaldaritza ikastaroan, nahiz eta jatorri askotako herritarrek parte hartuko duten. Hilaren 4, 5 eta 7an, Kolore-Truk merkatu txikia egingo da D'Elikatuzen, eta Barrenan, 'Hizkuntza indigenak ama lurra zaintzen' izeneko erakusketa izango da ikusgai aste osoan zehar; gainera, hilaren 5ean, erakusketa honen inguruko azalpenak emango dituzte Garabide elkartekoek. Egun berean, 'Sormena eta migrazioa' mahai-ingurua ere izango da, D'Elikatuz zentroan. 

Ohiko beste ekitaldien artean, '11 zapore, Munduko pintxo-potea' egingo da. Asteartean, Otegi-eneko Nerea tabernan, eta asteazkenean, herriguneko Leizea, Olano, Pottoka, 1990, Martinez eta Kantoi tabernetan.

Bestetik, hilaren 8an, Ordiziako hizkuntza identitate anitzei buruzko topaketa egingo da, Barrenan, Garabide elkarteak dinamizatuta. Bukaeran, luntxa eskainiko dute.

Munduko Arrozen Eguna

Eta nola ez, Munduko Arrozen Eguna. Ainara Ormaetxea Ordiziako Aniztasun kudeatzaileak azaldu duenez, “oso ekintza partehartzailea da, eta urtero 400-450 lagunetik gora” biltzen ditu. Aurten, hilaren 9an egingo da, larunbatarekin. Munduko herrialde eta kultura ezberdinetako arrozak probatzeko aukera izango da bertan. Aurten, 10 herrialdeetako sukaldariek parte hartuko dute, eta Peru, Japonia eta Ekuatoriar Ginea dira berrikuntzak:

1- Divinas Mujeres de Nigeria Elkartea (Nigeria)
2- Cristhian (Nikaragua)
3- Serafina (Ekuatore Ginea)
4- Embrca (Sahara)
5- Amel (Algeria)
6- Patricia + Rosalía (Peru)
7- Lina (Kolonbia)
8- Lourdes (Ekuador)
9- Ana, Koordinadora feminista (Euskal Herria)
10- Mimi + Kumiko (Japonia)

Arrozen otorduaz gain, haurrentzako jolasak, bingoa, DJa izango dira egunean zehar. Berrikuntza moduan, gauean kontzertuak ere izango dira: Samba Badago, Lua Matheus & Revolutionary Brothers, eta DJ Angel ariko dira eskenatokian. Kontzertuetarako barra ere jarriko da, eta bertatik ateratzen den dirua Palestinako UNRWA agentziara bideratuko da.

Bazkarirako txartelak salgai daude D'Elikatuzen, Buztuntzako Magazine Romanesc dendan eta Otegieneko Nerea tabernan, 3 euroan helduena eta euro batean umeena.

Bukatzeko, gogorarazi azaroaren 24an Bizilagunak egitasmoa egingo dela, eta udaletik, herritar guztiei egiten zaie gonbitea ekimenean parte hartu eta beste jatorri eta kultura batzuetako jendearekin otordu bat konpartitu dezaten.

Ordiziako Udalak 2022ko martxoko Udalbatzaren Osoko Bilkurak konpromisoa hartu zuen COVID19ak ekarri zuen pandemiak gure herrian utzi zituen bizipen ezberdinak aztertu, jaso, eta argitaratzeko. Lan horren emaitza da gaur aurkezten dugun Pandemian Bizi argitalpena, non ordiziar eta herriko eragile ezberdinek euren bizipenak partekatu dituzten, Farapiko kideen bide-laguntzarekin pandemian bizitako egoeren herri narratiba anitz bat osatzeko.

Guztira 62 lagunen testigantzak jaso dira, horietatik 43 emakumezkoak eta 19 gizonezkoak. Sektore edo esparru ezberdinetako jendea da, besteak beste gurasoak, egoera zaurgarrian dauden pertsonak, zaintza zerbitzuetako langileak, merkatari eta ostalariak, edota Covid-19aren eraginez senideren bat galdu duten herritarrak, besteak beste.

Ainhoa Jimenez ongizate eta berdintasun zinegotziaren hitzetan, pandemia “aztarna handia utzi zuen garai bat izan zen, denok oso modu intentsoan bizi izan genuena, eta erabaki zen herritarren bizipenetatik abiatuta diagnosi bat egitea”. Horretarako, garrantzia berezia eman zitzaion kolektibo ezberdinen hitzak jasotzeari. “Ez da lanketa kuantitatibo bat, kualitatiboa baizik, oso pertsonala eta bizipenetatik abiatutakoa”. Bizipen ezberdin horietatik abiatuta, hala ere, “besteen egoerarekin enpatizatzeko gaitasun hori” agerian gelditu dela uste du Jimenezek, “teorian denontzako berdina zen egoera bat bakoitzak bere lekutik bizi izan du, eta hori jaso nahi zen lan honetan”.

Behin testigantza horiek guztiak jaso eta liburua argitaratu zenean, lehen aurkezpen bat egin zen, ekainean, testigantzak eman zituzten herritarrekin. Jimenezek azaldu du “modu diskretu eta goxo batean” egin zela aurkezpen hura, “testigantzak modu anonimoan” eman dituztelako, eta ekitaldian ere anonimotasun hori gorde nahi izan zelako. Bilera hartan “oso modu positiboan” baloratu zen lana, eta liburua eta esperientzia horiek guztiak gainontzeko herritarrekin elkarbanatzea interesgarria izango litzatekeela azaldu zuten. Horregatik erabaki da orain, ordiziar guztiei ere liburua lortzeko aukera zabaltzea.  

Liburua jasotzeko interesa dutenek, izena eman beharko dute, urriaren 18a baino lehen, liburutegian edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidean, harremanetarako telefono zenbakia edo e-posta helbidea emanda. Eskariaren arabera argitaratuko dira liburuak, eta eskaera egin dutenei zuzenean jakinaraziko zaie non eta noiz jaso ahal izango dituzten. Horrekin batera, Udalaren asmoa leku estrategikoetara ale bana eramatea da, hala nola ikastetxe edo osasun zentroetara, haiek ere egin den lanketaren berri izan dezaten.

Bukatzeko, Adur Ezenarro alkateak aipatu du “pandemian gertatutakoetatik ikasteko modurik eraginkorrena gure ikuspegia bera zalantzan jartzea dela. Eta bide horretan, guk bezala pentsatu edo bizi ez zutenen bizipenetan murgiltzeko liburu hau ezinbesteko tresna” dela.

• Liburua bertsio digitalean (PDF)