Ordiziako ikastetxeek euren egunak ospatuko dituzte asteburu honetan, Jakintzak, ekainak 17, ostiralean, eta Urdanetak, ekainak 18, larunbatean, eta herri gunea haurrez beteko da. Horregatik asteburu honetan proposatzen da espazio publikoa eraldatzeko laborategia.

Ekitaldiak plaza, frontoia eta Zuhaizti (Arboleda) artean egingo dira eta horregatik asteburu hau aukeratu da Donostiako Arkitektura Eskolan Koldo Telleria eta Irati Otamendik daramaten 5. mailako Gune Irekien Antolakuntza eta Hiri Ekipamenduak ( https://sites.google.com/view/auzo-sorkuntza ) ikasgaiko 9 ikasleek 3 lan-taldeetan garatu dituzten proposamenak ordiziarrei erakusteko.

“Unibertsitatetik Udalarekin jarri ziren harremanetan ikasleekin burutu behar zituzten proiektuak espazio eta egoera errealetan oinarritu nahi zituztela adierazi eta Ordizian espazio publikoaren lanketa egiteko proposamenarekin. Udaletik Ordizia ezagutzera gonbidatu genituen, herria erakutsi genien, zeuden espazio publiko ezberdinak ikusi zituzten, proiektua non garatu nahi zuten erabakitzeko”, zehaztu du Adur Ezenarro, Ordiziako alkateak.

Gauzak honela, “Barrena inguruko espazioa lantzea proposatu dute ikasleek, Nikolas Lekuona plaza, Fray Andres eremua, frontoia, Zuhaiztia, baina bata Barrena parkea, Gudarien etorbidea eta Jose Migel Barandiaran enparantza hartzen dituen espazio publiko osoa, alegia. Espazio publiko hauek elkarren ondoan daude, baina era berean oinezkoentzat elkarrengandik aldenduta era bai. Horregatik, orokorrean proposamena da, poliki-poliki espazio publiko hauek euren artean josten joatea, oinezko espazio jarraiak bilaka daitezen”.

Hala ere, proba bat izango da asteburuan egingo dena: egindako hausnarketa eta lanketaren ondoren, Arkitektura Eskolako ikasleek laborategi bat egitea proposatu zuten. Modu honetan, inolako eraldaketarik egin baino lehen, ordiziarrek aukera izan dezaten espazio horiek elkarrekin batuta eta oinezkotuta, nola funtzionatzen duten ikusteko.

“Nagusiki egingo dena da eraldaketa taktikoa, hirigintza taktikoa. Ehin betiko aldaketa eta gastua egin aurretik, herritarrei erakutsi beti kotxez inguru bat, aurrekontu gutxi eta moldaketa azkarrekin, beste bizipen bat izateko aukera eman nahi zaio herritarrari”, zehaztu du Telleriak. Proba hori asteburu honetan egingo da, espazio horretan ikastetxeetako eskolak ibiliko direla probestuta.

Aldaketa trafikoan

“Fray Andres inguruko asfaltuzko espazio zabala kolorez margotuko da, oinezko izaera autoen errepideen gainetik gailendu dadin. Pintaketa lan batzuk behin betikoak izango dira, eta beste batzuk ikasleek margotuko dituzte ostiralean eta larunbatean, elikadura koloranteekin egindako margoekin, baina parte-hartze deialdia herritarrentzat ere zabaldurik dago. Herritarrena da espazio publikoa, eta eraldaketan beraiek protagonista izatea nahi dugu”, gehitu du Otamendik.

Arkitektura eskolako ikasleak ostiralean 16:00etatik 20:00tara eta larunbatean 10:30-13:30 eta 16:00-19:00etara egongo dira.

Era berean, arkitektura eskolako ikasleek burutu dituzten hainbat altzari ekarriko dira, eremua oinezko espazio publiko bezala egokitzeko. Altzari horien artean, ikasleek landutako proiektuak azaltzen dituzten panelak egongo dira, eta ikasleen helburua da, proposamenak ordiziarrei azaldu eta erakustea herritarren iritzi ezberdinak jaso ahal izateko. “Guretzako oso aberasgarria da klasetik kanpo proiektu hau aukeratu ahal izatea. Ingurune hau herritarrek bere sentitzea nahi dugu, ikus dezatela bere osotasunean zein aukera dituen”, gehitu dute Mikel Idiakez eta Saray Hernandez ikasleek.

Fray Andres inguruko espazioa asteazkenetik astelehenera itxita egongo da, eta trafikoa ezingo da bertatik igaro. Horretarako, Alde zaharretik irteera Euskal Herria kaletik bideratuko da, eta Etxezarreta kaletik berriz, Gudarien etorbidetik behera.

Foruen Pasealekua eta Gudarien Etorbideko aparkalekuak ostiral arratsaldean eta larunbatean zehar beharren arabera hartuko dira, eta bi norabideetarako sarbideak antolatuko dira, hoteletik eta Aita Urdaneta etxaldetik sartu eta irten beharko baita bi eremuetara.

Eskola Agenda 2030eko Udal audientzia egin da gaur goizean. 15. Garapen Jasangarriko Helburuaren inguruko lanketa egin dute Oianguren, Jakintza eta Urdanetako ikasleek, hain zuzen ere, zelaiak, larreak eta landare-itsutasuna. Lanketa horren ondorioak, konpromisoak eta proposamenak elkarbanatu dituzte Adur Ezenarro alkate eta Maitane Alvarez alkateordearekin.

Egindako lanketako ondorioetako bat izan da belardietan jolasten asko gozatzen dutela eta bertan animalia ugari bizi direla. Alderdi txarrak ere ikusteko aukera izan dute lanketa honi esker, besteak beste, belardi batzuetan jendeak zaborrak botatzen dituela.

Herriko belardien inguruko kezkak ere helarazi dituzte, hala nola, azken hamarkadetan desagertu diren belardi eta larreei erreferentzia eginez.

Konpromisoak ere hartu dituzte udalerriko gazteek. Hain zuzen, “gutxiago kutsatuko dugu eta zaborra ez dugu lurrera botako”, izan da adierazitako konpromisoetako bat. Zuhaitzen landaketetan parte hartzeko prestutasuna adierazteaz gain, babesguneak eraiki eta zaintzeko asmoa erakutsi dute.

Udalak esker onez hartu ditu ikasleen ekarpenak. “Guretzako oso garrantzitsua da zuen ikuspegia. Udalak konpromiso irmoa du jasangarritasunarekin eta gure udalerriarekin, horregatik lanean jarraituko dugu. Besteak beste, hondakinei bigarren bizitza bat emateko kanpainak segiko dute eta baita zuhaitz landaketek ere. Zuoi ere eskatzen dizuegu zaborrak dagokion gunera botatzea, guztion artean herri garbiagoa egin dezagun”, zehaztu du Adur Ezenarro alkateak.

Ordiziako Udalak Mugikortasun Plana eguneratuko du eta hori osatzeko herritarren iritziak jasoko ditu. Horregatik, Udalak dagoeneko inkesta bat abiatu du eta edonork eman ahalko du bere iritzi edo ekarpena. www.ordizia.eus helbidean aurki daiteke inkesta, honako hizkuntzetan: euskara, erdera, ingelesa, frantsera, errumanierra eta arabiera.

“Oso garrantzitsua da udalerri irisgarria izateaz gain, Mugikortasun Plana eguneratua izatea. Ordizia 2030 Ekintza Planeko 12.14 puntuan aurreikusten genuen bi ekintza ziren Irisgarritasun Plana eta Mugikortasun Plana eguneratzea. Lehenengoa egin da, eta orain bigarrenaren txanda dugu”, zehaztu du Adur Ezenarro, Ordiziako alkateak.

Hain zuzen ere, Endara Ingeniaritza izango da Mugikortasun Plan honen eguneraketa garatuko duena. Honako helburuak ditu, besteak beste:

• Egunero egiten diren bidaietan jendearen ohituretan eragitea, efizientzia energetiko handiago bat bilatuz, ahalik eta errekurtso gutxien kontsumituko dituen modu aldaketa bat eman dadin. 
• Norberaren mugikortasuna arduratsuagoa eta iraunkorragoa izan dadin, oinezkoentzako eta txirrindularientzako sareak osatu eta hobetuko dira, garraio publikoaren erabilera bultzatzeko neurriak proposatuko dira, adibidez.
• Oinezkoen segurtasuna eta pertsonen osasuna zaintzea: Haur, adineko eta elbarriei mugikortasuna erraztea, “8-80 hiria” sustatuz.

Plana aurrera eramateko martxan jarriko den prozesuak hiru fase izango ditu, bakoitzean zuzeneko parte-hartze saio bat egongo da.

1. Diagnosia: Oinezko, bizikleten eta ibilgailu motordunen sarea aztertuko da, baita garraio publikoaren zerbitzu eta erabilera ere. Halaber, herritarren ohiturak eta kezkak/beharrak jasoko dira. Zure ekarpen eta iritzia oso baliagarria zaigu (bete galdetegia: https://www.ordizia.eus/mugikortasuna). Herritarren ekarpenak aurrez-aurre jasotzeko, batzarra egingo da maiatzaren 18an, asteazkena, 18:00etan Udaletxeko batzar aretoan. Batzarrean, herriko mugikortasuna hobetzeko dituzten ideiak jasoko dira.

2. Proposamenak: Galdetegian bertan dago lehen ekarpenak egiteko aukera. Iraila hasieran proposamenak egin ahal izango dira aurrez-aurre. Saio berean azalduko dira diagnosiaren emaitzak. Lanaren aurkezpena burutuko da azaroan egingo den azken batzarrean.

3. Aurkezpena: taldean proposamenak komentatzeko aukera izango da. Aurkezpen bileraren ondoren eta hilabeteko epean, alegazioak aurkeztu ahal izango dituzte herritarrek.

Gipuzkoako Foru Aldundiko Ingurumen eta Obra Hidraulikoetako Departamentuak, Ordiziako Udalarekin elkarlanean, Energia Argitu programaren baitan, energia modu eraginkorrean erabiliz eta erosotasunik galdu gabe energia eta dirua aurrezteko gomendioak ezagutzera emateko tailerra antolatu du, maiatzaren 11ean, 18:00etan, Udaletxeko Batzar Aretoan.

Denok erabiltzen dugu energia (argiterian, berokuntzan, sukaldean…) gure egunerokotasunean, horregatik da guztiontzako interesgarria saio hau. Norberak bere etxean ezarri ditzakeen eraginkortasun neurrietarako beharrezko materialak erakutsiko dira eta energia aurrezteko balio duten ohitura aldaketak zein diren azalduko da. Parte hartzen dutenei, “Energia-aurrezkiari eta –eraginkortasunari buruzko aholku praktikoen gida” banatuko zaie. Gida honetan modu erraz eta ulergarrian azaltzen dira energia aurrezteko eta eraginkorragoak izateko baliagarriak diren hainbat aholku.

Tailer honetan parte hartu nahi duten herritarrek, maiatzaren 9a baino lehen izena ematea beharrezkoa da, saioak aurrera egiteko ezinbestekoa baita aldez aurretik ikasleen kopurua ezagutzea. Horretarako, honako bideak erabil daitezke:

• Posta elektronikoa bidaltzea ondorengo helbidera: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.
• Honako telefono zenbakira deitzea: 628-532-248 (astelehenetik ostiralera. Ordutegia 9:00-18:00)
• Informazio osagarria: www.argitu.eus

Tailer hauek Energia Argitu programaren baitan kokatzen dira eta bere helburua Gipuzkoako sektore ezberdinei (etxebizitzak, merkataritza, enpresa txikiak, etab.) energiaren kontsumoaren murrizketa lortzeko, eraginkortasuna handitzeko eta energia berriztagarriak bultzatzeko tresnak eskura jartzea da. Horretarako, Ingurumen eta Obra Hidraulikoetako Foru Departamentuak baliabide-multzo bat jartzen du lurraldeko eragile ezberdinen eskura; hala nola, aurrez aurreko prestakuntza-saioak, on-line tutorialak, energia aurrezteko eta eraginkortasunez erabiltzeko gidak, Energia Argitu programaren web gunea, eta abar. Honakoak dira 2022 urtean zehar Gipuzkoako Foru Aldundiko Ingurumen Zuzendaritza Nagusiak martxan jarritako gainerako prestakuntza- eta sentsibilizazio-ekintzak:

• Nola egokituko etxeko kontsumo elektrikoa tarifa berrietara erotu gabe
• Energia berriztagarriak zure etxean…posible da!
• Ibilgailu elektrikoa eta mugikortasun jasangarrirako aukerak.
• Komunitate Energetikoak: zer dira eta nola funtzionatzen dute (Berria)
• Energia Argitu kit kanpaina (Berria): kanpaina honen helburua herritarrei etxeko energia-kontsumoa modu pertsonalizatuan auto diagnostikatu eta ulertu ahal izateko beharrezko tresnak ematea da, baita energia-eraginkortasuna hobetzeko eta, ondorioz, faktura elektrikoa murrizteko irtenbideak proposatzea ere.