EUSKARAREN NAZIOARTEKO EGUNA 2025. ADIERAZPENA

Euskarak bide luzea egin du.
Luzeena, agian, Europa zaharrean.
Eta hala ere, bere bidea ez da amaitu: bizirik dirau, hazi eta berritzen ari da.

Zein da sekretua?
Zein indar, zein ilusio izan da gure hizkuntza gaur arte ekarri duena?
Milaka urte, milaka pertsona, milaka amets eta ahalegin.
Norbanakoen indar isilak, belaunaldiz belaunaldi, gure hizkuntza zaharra gazte bihurtu du.

Debekuen aurrean, eutsi genuen.
Isilaraztearen aurrean, hitza berreskuratu genuen.
Euskara, gure zaharren hizkuntza izatetik, gazteen hizkuntza izatera pasa da.

Argi-izpi berri hauekin marraztuko dugu etorkizuna.
Euskararentzat aukera berriak zabalik daude.
Hazi eta berritu dadin lanean ari gara.

Bizi garen mundu nahasi eta aldakor honek, ordea, zaildu egiten du komunitatearen indarra eta zentzua.
Hiztun-komunitatea ez da berez mantentzen.
Zaindu, elikatu eta piztu egin behar da.

Horregatik, unea da.
Euskararen erabilerarako eta transmisiorako bide berriak jorratzeko unea.
Aisialditik lan munduraino, eta norbanakotik erakundeetaraino, euskaraz hitz egiteko gune erosoak sortzeko unea. Belaunaldi berrien artean euskararen transmisioa indartzeko unea.
Euskararen ezagutza zabaltzeko unea.
Erabilera sustatuko duten ingurune biziak zaindu eta berriak irabazteko unea.
Euskararen biziberritze-prozesuari segurtasuna emateko indarrak biltzeko eta urrats berriak eta ausartak egiteko unea.

Asko dugu egiteko, badugu zer hobetu.
Eta prest gaude!
Euskaraz dakiten eta oraindik ez dakitenekin batera.
Elkarrekin egiteko.

Eskerrik beroena urte luzez euskara bizi, euskaraz bizi eta biziarazi dutenei.
Zuen lan isilak ekarri gaitu honaino, eta etorkizunak oraindik ere zuen beharra du.
Pozetik, atxikimendutik, ilusioz eta emozio positiboetatik abiatuta, euskarari distira emateko,
Eta euskara guztion hizkuntza bihurtzeko.

Euskara da!
Guztiontzat da.
Euskara ezagutzen ez dutenentzat ere, ate berri bat da.
Batzen gaituen hizkuntza bat.
Elkar ulertzeko gonbidapen bat.

Mundu berri bat irekitzen zaio euskarari.
Eta euskararekin, edonori.
Ate berriak zabaldu eta lur zoru berriak landuko ditugu, denon artean.
Hazi emankorragoak ditugu lur berria ereiteko.
Atzeak erakuts diezagula aurrea nola dantzatu.
Norberetik hasita egingo dugu bidea.
Guztion baitan baitago euskararen jauzia.
Zugan, nigan, gugan .

Euskaraz Bizi kanpainaren barruan, aurten ere euskara ikasteko edota maila hobetzeko ikastaroak doan eskainiko ditu Ordiziako Udalak.

Dirulaguntza hauek lortzeko, hainbat baldintza bete behar dira: Ordizian erroldatuta egotea, hamasei urte beteta izatea eta gutxienez %80ko asistentzia. Hala bada, matrikularen %100a ordainduko du udalak (beti ere, urteko gehienkoa 500 eurokoa izanda).

Euskaltegien bidez ez ezik, lan mundutik ere bultzatu nahi da euskara ikastea. Hala, Ordizian erroldatu gabe daudenei, baldin eta Ordizian dauden eta euskara plana duten enpresetako arduradun eta enplegatuak badira; euskara hitzarmena sinatu duten Ordiziako merkatal establezimenduetako arduradun eta enplegatuak badira; edo euskara sustatzeko hitzarmena sinatu duten Ordiziako kirol-taldeetako kirol-begirale eta entrenatzaileak badira. Kasu horietan, matrikularen %85a itzuliko zaie ikasleei.

Euskaltegiak izen-emate kanpaina betean daude irailean, eta udaleko euskara sailetik, jendea animatu nahi dute. Goierrin dagoen euskaltegi sareak euskara ikasteko hainbat aukera eskaintzen ditu. Ordizian bertan, Goiztiri AEK euskaltegia dago; Beasainen, Udal Euskaltegia eta Goiztiri AEK; eta Lazkaon, Maizpide Euskaltegi-Barnetegia.

Euskara ikasten ari direnek, berriz, Mintzalaguna egitasmoaren bitartez ahozko euskara lagun giroan praktikatzeko aukera ere badute. Ekimen honetan parte hartzeko, Hitzaro Euskara Elkartera jo daiteke.

Informazio hau guztia jasotzen duten 400 eskuorri argitaratu ditu Udalak, eta egunotan banatuko ditu Ordiziako etxebizitzetan.

Eskuorria 

Ordiziako Udalak bat egiten du Euskaraldiarekin. Ahobizi eta Belarriprest, jantzi dezagun euskaraz Ordizia.

Herritarrek aitorpena euskaraz egin dezaten animatzeko ‘Ogasunarekin euskaraz!’ kanpaina aurkeztu dute hamabostgarrenez Beasaingo, Ordiziako, eta Lazkaoko Udalek elkarlanean.

Gipuzkoan, apirilaren 8an zabalduko da 2024ko errenta aitorpena egiteko eskaintzen diren aukeretan lehena eta datorren ekainaren 30era bitarte egongo da zabalik.

Leire Artola Beasaingo alkateak, Kepa Zubiarrain Lazkaoko alkateak eta Adur Ezenarro Ordiziako alkateak Beasaingo Udalean egindako prentsa agerraldian eskaini dituzte gaur egun errenta aitorpena egiteko bideak eta xehetasunak. 2010az geroztik egiten den kanpaina da honakoa eta azken urteotan bezala, kanpainaren helburua euskaraz egiten diren errenta aitorpen kopurua handitzea eta horretarako herritarrei jarraibideak eskaintzea da.

Errenta aitorpena egiteko bideak eta datak

Gaur egun errenta aitorpena aurkezteko hiru bide daude eta guztietan erabil daiteke euskara:

● Auto-likidazio proposamena. Martxoaren 31tik ekainaren 30era herritarrek autolikidazio proposamenak jaso eta onartzeko aukera izango dute. Jasotako proposamena onartzerakoan, euskaraz egin nahi duzula esan eta aurrerantzean Ogasunak agiriak euskaraz bidaliko dizkizu.

● Mekanizatua. Errenta mekanizaturako hitzordua eskatzeko epea apirilaren 4an hasiko da. Hitzordua hartzerakoan, Ogasunarekin harremanak euskaraz izan nahi direla adierazi behar da. Ogasunarekin bulegoko aurrez aurreko harremanak, nahiz telefono edo Internet bidezkoak euskaraz egin daitezke. Horrez gain, Ogasunak sinatzeko duen orria ere euskaraz jaso daiteke.

● Internetez, Zergabidea atariaren bitartez. Errenta aitorpena Internetez edo bulegoan bertan egin nahi dutenek apirilaren 3tik ekainaren 30era arteko epea izango dute horretarako. Errenta programaren euskarazko bertsioa jaitsi Internetetik eta hobetsitako hizkuntza atalean euskara aukeratu behar da. Aholkularitza edo finantza erakunde batean egiten baduzu, euskaraz egiteko eska daiteke. Beste modu batean egiten bada (finantza erakunde batean, adibidez), euskaraz egiteko eska daiteke.

Euskaraz egindako aitorpen kopuruak goruntz egin dezala

Azken 2 urteetan, Beasainen eta Ordizian euskaraz egin diren errenta aitorpenen ehunekoa egonkortu bada ere -Lazkaon handituz joan da-, hiru herrietako udal ordezkariek kopurua handitzen jarraitzeko gonbitea zabaldu dute. Mantso mantso bada ere urtetik urtera kopuruak goruntz egiteko joera hori ez etetea eskatu dute.

Euskararen aldeko keinu hau egitera gonbidatu nahi dituzte herritarrak. Aukera badago euskaraz jarduteko, baita errenta aitorpenean ere, era oso errazean gure hizkuntzan egin daiteke. Hori ikusarazi eta errazteko kanpaina da hau, gure hizkuntzaren erabilera sustatzekoa. Beraz, euskararen aldeko aukeraz baliatuz, errenta aitorpena euskaraz eginez, euskarari ere aitorpena egiten zaiola nabarmendu dute hiru ordezkariek.