Ordiziako Udalak euskara ikasten aritu diren herritarrei matrikula itzuliko die

Eskaerak aurkezteko epea ostegunean zabaltzen da, ekainaren 25ean eta uztailean 9an amaitzen da.

Ordiziako Udalak 2019-2020 ikasturtean euskara ikasten aritu diren herritarrei matrikula osoa, %100a, itzuliko die dirulaguntzen bidez baldintzak betetzen badituzte.

Ordizian azken urte hauetan euskararen erabilerak gora egin du. Soziolinguistika Klusterrak egin zuen kale erabileraren neurketan oinarrituta, 2011-2017 epealdian bost puntu igo zen euskararen kale erabilera: %38,6tik %43,7ra. Aldiz, euskararen ezagutza hazten ari bada ere, oso erritmo apalean doa goraka (Eustaten arabera 2011n Ordizian euskaldunak %57,2 ziren eta 2016an %60,75).

Datu hauek kontuan izanda, Udalarentzat ezinbestekoa da ikasi nahi duten herritarrei laguntza ematea eta horretarako beharrezkoak dituzten baliabideak eskaintzea. Hori dela eta, aurten, Ordizian erroldatutakoei euskaltegiko matrikularen %100a itzultzea erabaki du Udalak. Orain arte, Udalak dirulaguntza mota desberdinak izan ditu; diru-sarrera mugatuak zituztenei, langabetuei, ikasleei, gurasoei eta lanean ari zirenei, multzo horietan banatuta. Aurten, lehen aldiz, Ordiziako edozein herritarrek (oinarrietan jasotako baldintzak betetzen baditu) matrikularen %100 jasotzeko aukera izango du, beti ere urteko 500 €ko langa gainditzen ez badu.

Bestalde, herritarrez gain, Ordiziako Udalarekin euskara sustatzeko hitzarmena duten denda, establezimendu eta enpresetako langileek eta Ordiziako kirol elkarteetako entrenatzaileek ere izango dute urtero bezala euskara ikasteagatik dirulaguntza eskatzeko aukera. Kasu honetan ere, dirulaguntza areagotu egin da eta matrikularen %85a jaso ahal izango dute, baldintzak betetzen badituzte.

Eskaerak aurkezteko epea ekainaren 25ean hasiko da eta uztailaren 9an amaituko da. Dirulaguntzei buruzko informazioa www.ordizia-euskaraz.eus orrialdean dago eta eskaerak arreta bulegoan aurkeztu behar dira goizeko 9:00etatik 13:00etara, edo telematikoki www.ordizia.eus webgunearen bidez.

Horrez gain deialdi honetan ere Ordiziako Udalaren euskara sailaren ondorengo dirulaguntzak argitaratu dira:

-Udako euskarazko ikastaroetara joateko dirulaguntzak (UEU, EHU, Hik hasi…)

-Merkataritza, ostalaritza eta enpresa alorrean euskarazko errotuluak, irudi korporatiboa eta webguneak euskaraz jartzeko eta udalerriko elkarteek webguneak euskaraz jartzeko dirulaguntzak.

-Aisialdiko begirale eta zuzendari ikastaroa egiteko herritarrentzako dirulaguntzak eta kirol arloko hezitzaileei berariazko prestakuntza euskaraz jasotzeko dirulaguntzak.

-Udalerriko kirol elkarteentzako dirulaguntzak euskarazko formazioa emateagatik.

Gipuzkoako Boletin Ofizialean dago informazio osoa: https://egoitza.gipuzkoa.eus/gao-bog/castell/bog/2020/06/22/c2002805.pdf

Komertzioak: diru laguntzak eta baliabideak euskara sustatzeko

Euskarak gero eta funtzio gehiago ditu gure gizartean eta gero eta herritar gehiagok egiten dugu euskararen aldeko hautua. Horregatik, kalitatez lehiatu nahi duten establezimenduek euskara ere aintzat hartu behar dute, eta, horretan laguntzeko, Ordiziako Udalak herriko establezimenduei hainbat baliabide eta dirulaguntza eskaintzen dizkie.

1) HIZKUNTZA AHOLKULARITZA.

Testuen zuzenketa eta Itzulpenak (testuaren ezaugarriak: zabalpen publikorako izatea edo behin eta berriz erabiltzekoa eta 3 orrialdetik beherakoak).

2) HAINBAT MATERIAL

Kartel maketatuak (COVID-19arekin loturiko oharrak barne), zuk esandako testuarekin eta nahi duzun neurrian; zure eskura ere “Zabalik/Itxita” afitxak, “Merkealdia” eta “Eskaintza berezia” kartelak, inprimaki estandarrak (fakturak, ordainagiriak, loteria…).

3) DIRU LAGUNTZAK

Errotuluak:* Euskara hutsean jarriz gero, kostuaren %50 ordainduko dizu Udalak, gehienez ere 300€.

Irudi korporatiboa:* Euskaraz jarriz gero, kostuaren %50a lagunduko du diruz Udalak, gehienez ere 120 €. Elementu hauek, besteak beste: barruko eta eskaparateetako errotulazioa, ibilgailuen errotulazioa, bisita-txartelak, zigilua, poltsak, produktuak biltzeko papera.

Webguneak:* 1)Euskara hutsezko webgunea, kostuaren %50a, gehienez ere 350 €. 2)Euskaraz ireki eta hizkuntzaz aldatzeko aukera ematen duenean, kostuaren %50a, gehienez ere 250€. 3)Hizkuntza aukeratzea sarbide duten webguneen kasuan, kostuaren %50a, gehienez ere 150€.

*OHARRA: testuak euskaraz zuzen idatzita egon behar du; inprimatu aurretik, galdetu Euskara Zerbitzuan.

Euskara ikasteko: euskara hitzarmena sinatuta duten establezimenduetako arduradun eta enplegatuei, Udalak matrikularen %85a itzuliko die.

ESKAERAK ETA INFORMAZIOA:   Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.   Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.   688757540 (whatsapp bidez)   Solicitudes e información:                 www.ordizia-euskaraz.eus    

Euskararen eguna, ekintzaz betea

EGITARAUA kartela. Abenduak 3

Bihar, abenduak 3, Euskararen nazioarteko eguna ospatuko dugu. Ordiziako Udalak ere bat egiten du.

Hemen duzue egitaraua: 

ABENDUAK  3:

  • GOIZEZ, Ordiziako Udalak, Urdaneta Ikastetxeak, Jakintza ikastolak eta Oianguren institutuak antolatuta:

-10:00etan, Herri Antzokian: “Oxigenoa euskarari 6000 metroan ere” dokumentala eta Felipe Uriarte zuzendariarekin elkarrizketa.  Nori zuzendua: DBH4 eta Batxilergoko ikasleei.

-10:30ean, Plaza Nagusian:  Lehen Hezkuntzako eta DBH1-3 bitarteko  ikasleek euskararekiko bizipenei eta desioei buruzko mezuak Euskararen Sarean zintzilikatu.

-11:00etan, Plaza Nagusian: Itoitz taldearen“Lau teilatu gainean” kanta abestu .

-11:00etan, J.M.Barandiaran plazan: Haur Hezkuntzako haurrek “Gu euskaraz” kanta abestu eta dantzatu. Aurretik Euskararen egunarekin loturiko irudiak zintzilikatu D´elikatuzen.

-11:45ean, Plaza Nagusian: DBH4 eta Batxilergoko ikasleek euskararekiko bizipenei eta desioei buruzko mezuak Euskararen Sarean zintzilikatu.

  • ARRATSALDEZ

-18:30ean, Plaza Nagusian:   2. Euskaraldia plazaratzeko "AHOBIZI ETA BELARRIPRESTAK KALERA" EKITALDIA.  Antolatzailea:  Hitzaro euskara Elkartea eta  Euskaraldia.

* Euskararen eguneko manifestuaren irakurketa.

*Ahobizi eta Belarripresten bizipenen eta desioen saretzea.

*Ordiziako Bertso eskolari omenaldia.

* Urdaneta  dantza taldea,  Amets Bide dantza taldea, txaranga...

ABENDUAK  5, 16:15ean, Zuhaizti zentroan:  Bingoa euskaraz.  Antolatzailea: Zuhaiztiko euskara eskola taldea.

ABENDUAK  7, 10:00etan: Durangoko liburu azokarako autobusa. Izena emateko epea: abenduak 4  (Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.   whatsapp bidez:  609818017). Antolatzailea: Hitzaro euskara Elkartea.

 

Euskara sustatzeko Ekintza planaren bigarren bilera

Euskara Zerbitzuaren logoa

Ordiziako Udalaren Euskara Sustatzeko Ekintza Plana, ESEP, diseinatzeko partaidetza prozesuko 2. bilera burutuko da azaroaren 26an D´elikatuzen, 18:00-20:00.

Bertan, diagnostikoa eta aurreko bileran jasotako aurrera begirako lan-ildoak abiapuntutzat hartuta, datozen urteetarako lan-ildoetan sakondu eta ekarpenak jasoko ditugu. Hori horrela, bertaratuen iritzi eta ikuspegiak aintzat hartuko dira behin betiko plana osatzeko.

Bilerara etortzea erabakiz gero, Euskara Zerbitzura idaztea edo deitzea eskertuko da: Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.  943805622