Errenta aitorpena, euskaraz

Apirilaren 12tik ekainaren 30era herritarrek autolikidazio proposamenak jaso eta onartzeko aukera izango dute

Ordizia, Beasain eta Lazkaoko Udalek bat egin dute beste urtebetez ‘Errenta aitorpena euskaraz, Ogasunarekin euskaraz!’. Ordizian egin den prentsaurrekoan izan dira kanpainaren inguruko xehetasunak ematen Maitane Alvarez, Ordiziako Udaleko alkateordea eta euskara zinegotzia; Leire Artola, Beasaingo alkatea, eta Amagoia Naldaiz, Lazkaoko euskara zinegotzia. “2010az geroztik egiten den kanpaina da eta azken urteotan bezala, kanpainaren helburua da euskaraz egiten diren errenta aitorpen kopurua handitzea eta horretarako herritarrei jarraibideak eskaintzea”, azaldu du Alvarezek.

Gipuzkoako Foru Ogasunak, bestalde, iaz lau urteko egitasmoa abiarazi zuen. Egitasmo honen helburua da 2023ari begira 100.000 herritarrek euskara aukeratzea Aldundiko Ogasuna eta Finantza Departamenduarekin harremanak izateko (2020an Gipuzkoan 80.519 herritarrek egina zeukaten euskararen aldeko hautu hori).

“Edozein unetan aukera dezakezu euskara Ogasunarekin harremanak izateko eta errenta aitorpena aurkeztean ere bai”, gaineratu du alkateordeak.

Artolak, gaur egun errenta aitorpena aurkezteko dauden hiru bideak azaldu ditu, “guztietan erabili daiteke euskara”. Lehenengo aukera autolikidazio proposamena da. “Jasotako proposamena onartzerakoan, euskaraz egin nahi duzula esan eta aurrerantzean Ogasunak agiriak euskaraz bidaliko dizkizu”, zehaztu du.

Bigarrena mekanizatua da: “hitzordua hartzerakoan, Ogasunarekin harremanak euskaraz izan nahi dituzula adieraztea besterik ez da. Hau da, Ogasunarekin bulegoko aurrez aurreko harremanak, nahiz telefono edo Internet bidezkoak euskaraz izan ditzakezu, horrela eskatzen baduzu; eta Ogasunak sinatzeko ematen dizun orria ere euskaraz jaso dezakezu”.

Hirugarren bidea Internetez da,  Zergabidea atariaren bitartez:

Errenta programaren euskarazko bertsioa jaitsi Internetetik eta hobetsitako hizkuntza atalean euskara aukeratu. Bestalde, aholkularitza edo finantza erakunde batean egiten baduzu, euskaraz egiteko eska dezakezula ere nabarmendu du Artolak.

Datuak, gorantz

Aipagarria da azken 10 urteotan, 2010etik 2020ra,  Ordizian, Beasainen eta Lazkaon euskaraz egin diren errenta aitorpenen ehunekoa handituz  joan dela. Ordizian %8,29tik %21,15era igo da, Beasainen %8,37tik %19,71ra, eta Lazkaon, berriz, %15,52tik %29,20ra.

Eta horrek horrela izaten jarrai dezan, Naldaizek errenta aitorpena euskaraz egitera gonbita zabaldu du.

Kanpainako datei dagokienez, hauexek dira aurtengoak:

- Apirilaren 12tik ekainaren 30era  herritarrek autolikidazio proposamenak jaso eta onartzeko aukera izango dute.

- Errenta aitorpena internetez edo bulegoan bertan egin nahi dutenek ekainaren 30era arteko epea izango dute horretarako.

- Errenta mekanizaturako hitzordua eskatzeko epea apirilaren 16an hasi eta ekainaren 8an amaituko da.

“Euskarak Goierrin aurrera egin dezan nahi badugu behintzat, garrantzitsua da zergadun euskaldunek aitorpena euskaraz egiteko urratsak egitea; hau da, gutako bakoitzak hizkuntza hautatzeko dugun aukeraz baliatzea”, nabarmendu du Naldaizek.

Beraz, hiru ordezkariek euskararen aldeko aukeraz baliatzera gonbidatu dituzte goierritarrak, “errenta aitorpena euskaraz eginez, euskarari ere aitorpena egiten diotelako”.

Euskararen Eguneko adierazpen ofiziala

Euskara, aurrerabide. Abenduaren 3a, Euskararen Nazioarteko Eguna

Gizartea euskaraz biziberritzea helburu

Inoiz inork pentsatuko ez zukeen eran jo gaitu gaitzak. Beste horrenbeste, gaitzaren ondorioek. Mundu osoa, gizarte guztiak, egitura guztiak, pertsona guztiok jarri gaitu geure benetako neurriaren aurrean, buruz buru. Kupidarik gabe utzi du agerian ahaztu nahi genukeen zerbait: zaurgarriak gara; zaurituta gaude.

Erantzukizunaren bidetik heldu diogu erronkari, denon indarrak batuz. Bai baitakigu ez dagoela beste irtenbiderik. Euskararen hiztun elkarteak ere sufritu du pandemiaren eragina, bereziki erabilera mailan. Zentzu horretan, erakunde publikoen konpromisoa sendoa eta egindako lana handia izanagatik ere, ezin izan diogu nahi bezala erantzun.

Euskaldunok, baina, ezin dugu ahaztu badela funtsezko ekarpen bat, gizarte-ahalegin itzel eta miresgarri horren osagai ezinbestekoa eta geure esku soilik dagoena: euskaraz egin behar diogu aurre mundu mailako krisiari; euskaraz egin behar dugu ilunpetik argira eramango gaituen bidea; euskaraz sendatuko gara, euskaraz sendatuko dugu geure gizartea; euskaraz besarkatuko ditugu mundu osoko gizakiak. Bat garelako. Euskaraz bat mundu osoarekin.

Horixe da euskaldunok –neurri batean edo bestean euskaraz bizi garen munduko herritarrok, alegia– euskara gero eta gehiago, gehiagorekin eta gehiagotan erabiliz giza garapenari egiten diogun ekarria. Gizarte kudeaketa aurreratuari gaineratzen diogun balio erantsia.

Banaka heltzen diogu, jakina, euskaraz gero eta gehiago bizitzeko konpromisoari. Nahitaezko zutabea baita norberaren eginahal hori edozein aurrerabidetan, oso bereziki gizarte prozesu konplexuetan, eta horixe da euskara biziberritzea helburu duena ere: gizarte prozesu konplexu bat, ertz eta osagai ugari duena.

Ongi asko dakigu hori mundu osoko euskaldunok.

Badakigu, besteak beste, euskaldunok euskararen hiztun elkartea osatzen dugula, eta Euskaraldian norberaren erabakimenetik abiatzen dela euskara gehiago, gehiagorekin eta gehiagotan erabiltzerakoan inguruan hainbatetan sortzen zaizkigun oztopoak gainditzeko bulkada.

Baina badakigu, era berean, ezinbestekoa dugula elkarrengana biltzen gaituen bulkada ere. Norabide biko bektorea baita euskara eta euskaldunok lotzen gaituena: euskarak herri egiten gaitu; euskal hiztunon komunitateak egiten du euskara orainaren eta etorkizunaren hizkuntza.

Bide horretatik heldu zaizkio beti euskarari aurrerapauso behinenak: norberaren eta gizartearen konpromisoak sendo uztartzetik; unean uneko beharrizanei euskaraz erantzuteko erabaki sendotik; etorkizunerako bidea euskaraz zolatzeko euskal instituzioek, gizarteak eta gutariko bakoitzak egindakotik.

Euskaraldiak eskaintzen digu aurten berriz ere zailtasunak aukera bilakatzeko abagunea, krisia aukera bihurtzeko lanabesa. Ingurumari aldrebesean dator, ezbairik gabe, aurtengoa, eta horrek areagotu egingo du guztion eta bakoitzaren konpromisoaren balioa, administrazio eta erakunde publikoena barne.

Aurtengoan, balio berezi batez apainduko da ahoa bizi, belarria prest eta bihotza kartsu dugun guztion ekimena. Aurtengoan, inoiz baino erabakigarriagoa izango da euskararekiko gertutasunezko keinu praktiko oro, euskal hiztunongandik zein euskararen zabalkundean erdaretatik lagundu nahi dutenengandik datorrela ere.

Esanahi berezi batez jantziko da aurten, ezinbestez, euskara gehiago, gehiagorekin eta gehiagotan erabiltzeko ahalegina: egokitu zaigun ataka larritik ateratzeko erabakiari, euskaraz ateratzearen ezinbestekotasuna erantsiko diogu euskal hiztun nahiz euskararen lagun orok.

Izan ere, bagenekien euskaraz zetorrela geroa, euskaraz ere mintzo dela etorkizuna, eta aurten beste zerbait ikasi dugu: egoera zailetatik ateratzeko eginahalean lagungarri dugu euskara, bidelagun ezinbestekoa. Krisialditik sendoago ateratzea helburu dugun honetan, erabil dezagun euskara ere aurrera egiteko lanabes gisa.

Euskaraz biziberritu behar dugulako geure gizartea.

Euskararen ahotsa zor diogulako munduari.

Euskaraz garelako munduko herritar.

Euskara aurrerabidea delako.

OSTEGUNEAN MARIA BERASARTE BIZI MUSIKA ZIKLOAN HERRI ANTZOKIAN

MARÍA BERASARTE 02 REC

Ostegun honetan Ordiziako Udalak antolaturiko “Bizi Musika” zikloan, hirugarren kontzertua izango dugu Maria Berasarte abeslariaren eskutik . Hitzordua Herri Antzokian, arratsaldeko 19:00etan.

María Berasartek “Lurra eta bidea” proiektua aurkeztu du, non bere lurrari eta jatorriari oda forma ematen dion istorioa irudikatzen duen. Iberiar musikatik abiatuta baina beti euskal sustraiak zainduz, bere karrera garatu duen emakume baten kezka da. Joan-etorriko bidaia da hau.  Bere ibilbidean, klasikotik abiatuta, fadora eta flamenkora iritsi zen, musika zeltara eta sefardira, eta beste genero batzuetako ezagutzak bereganatu zituen bere jatorria galdu gabe. Besteak beste, Jordi Savall, Ara Malikian, Paco de Lucia eta Carlos Do Carmo artistekin elkarlanean aritzea lortu zuen, eta nazioarteko hainbat gune eta jaialditan parte hartu du, besteak beste, Sibiuko Nazioarteko Jaialdian, Hong Kong Arts Festival eta Bruselako Palais de Beaux-Arts-en.

Lurra eta Bidea, Berasarteren proiekturik pertsonalena eta originalena da. Bertan, bere euskal sustraiak erakutsiko ditu, beste musika estilo batzuetan zehar egindako bidaia, lehen aldiz euskal musika eta poetikara itzuli izana nabarmenduko den, «lehenengo aldia da nire herriari lan bat eskaintzen diodana».

Ideia, euskal sustraiei dagokienez lehen aldiz, lan berri eta pertsonal bat egiteko borondatetik sortu zen. Bere jatorriaren iruditeriarekin, bere nazioarteko ibilbidearekin eta abeslariaren eta euskal kulturaren sentimenduekin bat egiteko musika berriak ekartzeko borondatea. Jarraipena izan eta mugak gainditu nahi dituen proiektua da. Euskal izaera musikala ezagutzera emateko modu bat, hain dokumentatua ez den ikuspegi batetik. Gutxi dira honelako proiektuak zuzentzen dituzten emakumeen ahotsen erreferentziak, gure mugetatik kanpo beren burua gehiago ezagutarazteko gaitasunarekin.

Abeslari donostiarrak bere errepertorioan euskal kantua sartzen du beti eta aukera paregabea izango da ikuskizun inspiratzaile eta paregabea garatzeko, artistaren ezaugarriengatik. Maria Berasartek Joseba Irazoki, gitarra, Igor Telletxea, perkusioa eta David Azurza izango ditu lagun. «Ez da aurretik egin dudan proposamen bat, baina noski jendeak niri entzungo dit, ez zaio arrotza egingo. Gitarra klasikoa egon beharrean Berako musikarien elektronikoa agertuko da, efektuak egongo dira. Ez nuen geratu nahi abestu eta txaloak jasotzearekin. Haratago joan nahi dut Lurra eta Bidearekin. Jatorrira, sustraietarako buelta izatea nahi dut, garai batetik, bidea eginez etorkizunera iritsi nahian. Modu elegantean ariko gara, baina ausardiaz».

Sarrerak aldez aurretik salgai: Kutxanbank-sarrerak (webgunean eta kutxazainetan) eta Herri Antzokian.

 

Feminismo eta euskalgintza hizpide ostiralean

Ostiral honetan Ordizian izango ditugu Lorea Agirre eta Idurre Eskisabel, "Euskalgintza eta feminismoa, bidaikidetza oparo bat" gaia lantzen. Hitzordua 18:30ean da, Barrena kultur etxean.

logo ordizia bizi herria

Image
Image
Image