Oianguko txiringitoa kontratatzeko prozesua zabalik

Ordiziako Udalak aurtengo ekaina, uztaila, abuztua eta irailean Oianguko Txiringitoa kudeatzeko kontratazio prozesua abiatu du.  

Proposamenak maiatzaren 28a bitartean aurkeztu ahalko dira, Ordiziako Udaleko erregistroan, modu telematikoan, edozein unetan, edo Udaletxeko Erregistro Orokorrean (Udaleko arreta zerbitzuan), 9:00tatik 13:00etara eta arratsaldean Udaltzaingoan, gaueko 21:00ak arte. 

Xehetasunak: Oianguko txiringitoa 2021

Proposamenak gutun-azalean aurkeztuko dira “Oiangu parkeko udako taberna txikia edo Txiringitoa kudeatzeko zerbitzua” izenburuarekin. Eskatzaileak bere identifikazio datuak adierazi behar ditu bertan, baita administrazioa berarekin harremanetan jartzeko helbide elektronikoa eta telefono zenbakia ere.

Ordiziako Udalak jarduteko gaitasuna daukaten eta kontratatzeko debekurik ez duten pertsona naturalekin zein pertsona juridikoekin kontratatu ahal izango du.

Kontratu hartzaileak ez du inolako zorrik izango Ordiziako Udalarekin. Era berean, kontratu hartzailea egunean izango da Gipuzkoako Foru Ogasunarekiko betebeharrei dagokienez eta Gizarte Segurantzarekiko betebeharrei dagokienez.

Proposamenak aurkezteko 10 egun balioduneko epea emango da iragarkia udaleko webgunean eta kontratazio perfilean  argitaratzen denetik zenbatzen hasita.

Zerbitzuaren esleipenerako balorazio irizpenak eta puntuaketa

1) Memoria proiektua: 80 puntu.

Bertan zerbitzuaren kudeaketarako dauden baliabide pertsonalak eta kudeaketa plana zehaztuko dira. Memoria proiektua gehienez 5 orritan egingo da, orriak DIN A4koak izango direla, eta bi aldeetatik.

80 puntuak honela banatuko dira:

- Eskaintzaren aniztasuna: 15 puntu. (pintxoak, razioak, ogitartekoak, plater konbinatuak, menuak, menu bereziak…)  

- Produktuen jatorria: 10 puntu. (km0 produktuak, inguruko ekoizleen produktuak, produktu ekologikoak.)

- Tabernako bezeroei emango zaizkien prestazioak:  20 puntu. (eramateko erraztasuna, terraza zerbitzua….)

- Parkera bezeroak erakartzeko proposatzen diren ekintzak, (batez ere familia eta nerabeei zuzendutakoak): 20 puntu

- Udalerriko langileak izatea: 5 puntu gehienez.

- Hondakinen kudeaketa jasangarria: 10 puntu gehienez. Hondakinen kudeaketa plangintza baloratuko da.

2) Ostalaritza eskoletan lortutako ezagutza: 20  puntu. Arlo horretako goi mailako ikasketak dituela egiaztatzen duenari 20 puntu emango zaizkio eta erdi mailako ikasketak dituenari 10 puntu emango zaizkio. Esleipenduna  Enpresarien Elkartea izango balitz, bera osatzen duten pertsonen ikasketak batuko dira, gehienezko 20 puntuak lortu arte.

Esleipen prozesua

Udalak proposamenak aurkezteko epea igaro ondoren aurkeztutako proposamenak baloratuko ditu eta udaleko web orrian argitaratuko ditu horren emaitzak.

3.- KanonaHileko 400 euroko kanona ezarriko da zerbitzua garatzeko. Edozein zalantza izanez gero jarri harremanetan Udaleko Idazkaritza Sailarekin helbide elektroniko honen bidez: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. edo deitu telefono zenbaki honetara: 943 80 56 36

Jakiteak ebaki du Idiazabal Gazta berria

Gaur goizean Ordiziako Oiangu baserrian egin da XXVII. Idiazabal Gazta berriaren aurkezpena, eta ebakiera. Bertan izan dira, Adur Ezenarro, Ordiziako alkatea; Arantxa Tapia, Ekonomiaren Garapen, Jasangarritasun eta Ingurumeneko sailburua; Bittor Oroz, Nekazaritza, Arrantza eta Elikagaien Politikako sailburuordea; Xabier Arruti, Nekazaritzako eta Lurralde Orekako zuzendaria; Arantxa Ariztimuño, Mendiak eta Natura inguruneko zuzendaria; Daniel Solana, Basquetourreko Zuzendari Nagusia; Felix Ajuria, Idiazabal Gaztaren Jatorrizko Deituraren Kontseilu Arautzaileko Lehendakaria; Jose Mari Ustarroz, Idiazabal Gaztaren Jatorrizko Deituraren Kontseilu Arautzaileko Lehendakari-ohia; Miriam Molina, Idiazabal Gaztaren Jatorrizko Deituraren Gerentea; Belen Landa, Artzai Gazta Elkarteko gerentea; Mariano Imaz, Latxa Esnea kooperatibako lehendakaria; Juanma Garmendia, FECOGAko lehendakaria; Maria del Mar Churruca, Euskal Gastronomiaren Akademiako Lehendakaria; Ioritz Berra, Goimeneko ordezkaritzan, eta Niko Osinalde, Goiturreko zuzendaria.

Ongietorriaren ostean, alkateak hartu du hitza, eskerrak emanez ordezkariei ekitaldian parte hartzeko gonbita onartzeagatik, eta baita Jose Mari Ustarrozi, Idiazabal Gaztaren alde hainbeste urtez egindako lanagatik, zein erregulartasun sariak jaso dituztenei. Gazta ebakieraz arduratu direnei ere zuzendu dizkie hitzak: “eskerrik asko Jakiteako lagunei, gure sukaldaritzatik beti Idiazabal Gaztarekiko apustua egiteagatik, eta egoera zail eta ilun hauetan ostalaritzan aurrera egiten jarraitzeagatik”.

Bide horretan, azoka izan du hizpide alkateak: “Ordizia ezin da gure azokarik gabe ulertu, garena zor diogu. Eta gure azoka ere, ziurrenik, ezingo genuke ulertu Idiazabal gaztarik gabe. Produktu izarra izan da mendeetan, eta gaur egun, oraindik horrela jarraitzen du. Asteazkenero, gazta erosteko sortzen diren ilarak ikustea besterik ez dago. Behinola gurean sagardoa izan zenaren oroimena ere ia galdua dugun honetan, gaztak eusten dio. Idiazabal gaztak eusten dio asteazkenetako lehia gogorrari, eta izugarri pozten gaitu gaur saria jasoko duen gaztagilea asteazkenero gure plazan izateko ohorea dugulako”.

Idiazabal Gazta “gure DNAren zati bat dela” ere aldarrikatu du: “euskaldunon nortasunaren zati handi bat zor diogu”. “Idiazabal gazta zati bat dastatzen dugun bakoitzeko, bere zapore eta usain bereziak hori guztia bizitzeko aukera ematen digu. Gure herri nortasunaren sustrai sakonetaraino heltzeko aukera. Horregatik da inoiz baino beharrezkoagoa geureari eustea, geure altxorra den artzainen gazta erostea”, amaitu du.

Agintarien adierazpenen ondoren, Miriam Molinak 2020ko kanpainaren berri eman du, eta erregulartasun sariak eman dizkie ondorengo bi gaztandegiei:

1) Artisau gazta egile Kategorian-Categoría Queso Artesanal : Ander Barandiaran. Gaztañaditxulo Gaztandegia (Idiazabal).

 Ander Barandiaranek Goierriko Idiazabal herrian egiten ditu bere gaztak, larre eta basoz inguratuta, Gaztañaditxulo baserriak duen nortasunaz jantzia. Arbasoen usadioak mantenduz eta berrikuntzarekin uztartuz, ingurugiroarekiko jasangarritasunean esne kalitate gorenena lortzea da gaztandegi txiki honen helburua. Gazta bakoitza  egindako lanaren, esfortzuaren eta bere zaporearen atzean dagoen bizimodu eta pasioaren emaitza delarik, artzaintzarena alegia.

  • Abel Goiburu. Goiburu Gaztandegia (Idiazabal).

Abel Goiburuk, Idiazabalen du gaztandegia. Abelek bere familiatik hartu du artzaintza eta gaztagintzaren testigua. Juanak eta Domingok haien bizitza osoa Idiazabal gazta munduan pasatu ostean, haien jakintza eta kalitatezko errezeta semeari utzi diote. Izendapenetik garrantzia handia ematen diogu kasu hauei; non ezagutzen transmisio familiarra uztartzeaz gain, lan onaren eta arrakastaren aldeko apustua egiten den belaunaldi berrietan.


OMENALDIA

Urtero, omenaldia egiten zaio Idiazabal Gaztaren zabalpenean lan egin duen pertsona edo erakunde bati. Aurtengoan, aitortza hau Ordiziako Udalak eta Ordiziako Idiazabal Gaztaren Kofradiak azken urteotan Idiazabal Jatorri Izendapenaren Lehendakaritzan egon den Jose Mari Uztarrozi itzuli nahi lioke.

Jose Mari Ustarroz

2004an Jose Mari Ustarrozen Idiazabal Jatorri Izendapen Babestuaren Kontseilu Arautzaileko lehendakari izendapena nabarmentzekoa izan zen ordurarte ardura hau ekoizpenarekin zuzenean lotutako pertsonen gain erortzen baitzen. Batzar hartan aho batez onartu zuten urtetan Idiazabal Gaztaren defendatzaile sutsu izango zenaren izendapena. 15 urte emankor izan dira bere lehendakaritzapean pasatakoak, hainbat lorpenekin. Hauen artean ondorengoak nabarmendu genitzake: izena emandako gaztandegi kopuruaren %20ko igoera, kontrolean aurrerapenak, lege moldaketa eta garapen normatiboak, Idiazabal Baserrikoa logotipoaren bidez gaztak bereiztea, “Euskal Herriko Mendiko Gazta” markaren garapenean elkarlana, etab. Jose Marik baldintzarik gabeko konfidantza eta miresmena pizten du doan tokietan, pere izaera eta lan ibilbidearen balioagatik. Horrela egin du bai Ordiziako Idiazabal Gaztaren Kofradia eta bai Ordiziako Udalarekin urte guzti hauetan izan duen elkarlanean eta horrexegatik gaurkoan gure aitortza eskaini nahi genioke ekitaldi xume honen bitartez.

Gazta ebakiera

Aurtengoan, Jakitea Elkarteak ebaki du Idiazabal Gazta berria. "Jakitea Elkartea 2009. urtean Aratz Erretegian Xabier Zabaleta sukaldaria eta zenbait gastronomikoa kritiko eta zaleren artean ospaturiko bileratik sortutako proiektua da. Jakitea Elkartea betiko sukaldaritza, gure betiko euskal sukaldaritzak sortutako platerak eta bere tradizioa mantentzen duten sukaldariak indartzeko eta sustatzeko helburuekin jaio zen. Aurreko helburuei heltzeko oinarria kalitatezko produktuetan hartzen dute, inguruko ekoizleak, Km 0ko produktuak eta jatorrizko produktuak erabiliz. Euskal Herrian oso ondo jaten da, eta zaila da betiko sukaldaritzak eskeintzen duen prezioan jaten den kalitatearekin beste leku batzuetan aurkitzea.

Jakitea Elkartea osatzen duten lagunak ondorengoak dira, Gipuzkoan zehar banatzen direlarik: Aratz Erretegia (Donostia), Arraunlari Berri Jatetxea (Hondarribia), Beheko Plaza (Zumaia), Bera Bera Restaurante (Donostia), Beheko Plaza Jatetxea(Zumaia), Bodegón Joxe Mari (Orio), Botarri Jatetxea (Tolosa), Casa Julián (Tolosa), Casa Nicolás Restautante(Tolosa), Felix Manso - Ibarla (Irun), Hotel de Londres - La Brasserie Marie Galant(Donostia), Kattalin Erretegia (Beasain), Kostalde Jatetxea (Donostia), Landa Erretegia(Mendaro), Martinez Jatetxea (Ordizia),  Patxikuenea Erretegia(Lezo), Rafa Gorrotxategi (Tolosa), Sansonategi Bodas y Eventos (Hernani), Tripontzi Jatetxea (Hernani), Txola Jatetxea (Donostia), Txuleta Jatetxea (Donostia), Urgain Jatetxea (Deba), Xixario Erretegia (Orio), Ziaboga Jatetxea(Pasai Donibane).

Urtean zehar hainbat ekitaldi antolatzen dituzte eta azken urteotan Ordiziako Idiazabal Gaztaren Kofradia bidelagun izan dute  horietako batzutan, hala nola: Euskal Herriko Parrileroen Txapelketa, Gipuzkoako Parrileroen Txapelketa, Euskal Herriko Burruntzilarien Txapelketa, Jakitea Festa, Jatorrizko Produktuen hilabetea, Gipuzkoako jangela

Hortaz gain, hainbat ferietara, kanpora joaten dira euren sukaldariekin eta produktuekin.

Oiangu Natur Eskola martxan da

Aste honetan bertan hasi da Oianguko Natur Eskola ekimena, beste urtebetez, Aranzadi Zientzia Elkartearen eskutik, eta maiatzaren amaiera arte luzatuko da, 31a arte, hain zuzen ere.

Aurten ere 8 eta 12 urte bitarteko Jakintza eta Urdanetako haurrek Oiangu parkearen eskaintzaz gozatzeko aukera izango dute. Hain zuzen, egitasmo honekin, Udalak herriko txikienak inguruan duten naturara gerturatu nahi ditu, eta horretarako aukera paregabea eskaintzen du Oiangu parkeak.

Urtez urte jarraipena duen ekimena da. Maitane Alvarez, alkateordea: “Ordiziarrontzat gure leku kuttuna da Oiangu, eta haur garenetik ingurune horretara jotzen dugu, azkenean, asko direlako parkeak eskaintzen dizkigun aukerak”. Bide horretan, “ordiziarrak Oiangu gertutik ezagutzeko aukera izatearen aldeko apustua” egiten jarraituko dutela nabarmendu du Alvarezek.

Naturarekin harreman zuzena

Urtez urte garatu da Oiangu Natur Eskola, eta bertan, Aranzadi Zientzia Elkarteko kideek bi ikastetxeetako 3. zikloko ikasleekin lan egiteko aukera izango dute. Funtzionamendua orain artekoaren berdina izango da: Ordiziako ikastetxeetako haurrak Oiangura igoko dira Aranzadiko begiraleekin eta bertan egun osoa irauten duten jarduerak egingo dituzte, jolas librerako astia ere utziz. Jarduerak, jolas eta tailerretan oinarritzen dituzte, non ikasleak beraiek diren Oianguko bitxikeria eta altxorrak deskubritzearen protagonistak.

Aranzadi Zientzia Elkarteko kideak “gustura” agertu dira esperientziarekin lortutako guztiarekin: “urtero egiten dugun balorazioa oso ona izaten da. Proiektuaren helburu nagusietako bat da haurrak naturarekin esperientzia zuzenak izatea, honekiko erlazio afektibo bat sortuz, naturarekiko errespetuzko jarrerak. Ekintza dinamikoak eta elkarlanean egitekoak garatzen dituzte Natur Eskolan. Duen berezitasuna, gainera, Oianguko biodibertsitatera egokituta dauden ekintzak egiten dituztela da, hau da, bertako landare eta fauna ezagutzen dituzte, hala nola, sagastia eta putzua", zehaztu du Yoana Garcia, Aranzadiko kideak.

“Garrantzitsua da txikitatik naturarekiko lotura mantentzea, onura izugarriak dakartza eta. Ez bakarrik gaitasun motorra lantzeko aukera paregabea eskaintzen duelako, elkarren artean harremanak sendotu, eta ikasketa prozesuan garrantzitsuak diren aptitudeak hartzen dituztelako, baita ere gure ingurunea behar bezala zaintzeak duen garrantziaz jabetzen baitira”, gehitu du alkateordeak.

DATUAK

Iazko kasuan, esaterako, eskaintza zabaldu egin zen eta 3. ziklokoez gain, 2. zikloko ikasleak ere batu ziren egitasmora. Guztira, 500 haur inguruk parte hartu zuten. Aurten ere, datuak antzekoak izango dira eta ordiziako gaztetxoek esperientzia honetaz gozatzeko aukera izango dute.

Jakitea Elkarteak ebakiko du XXVII. Idiazabal Gazta berria

Covid19ak eragindako pandemiak iazko Artzain Eguna bertan behera utzi zuen, eta urtebete ondoren, oraindik ere zuhurtziaz jokatzeko garaia dela gogorarazi du Adur Ezenarro, Ordiziako alkateak. “Horregatik, eta segurtasun neurriak osotasunean bermatzea ezinezkoa izango denez, Artzain Eguneko azoka ez ospatzea erabaki da”.

Hala ere, artzainen lana zaildu denaren eta esfortzuak biderkatu behar izan dituzten honetan, sektoreari babesa eman eta izan ditzaketen salmentetan eraginez, Ordiziako Udalak XXVII. Idiazabal Gazta berriaren aurkezpena egingo du, apirilaren 7an, goizeko 11:00etan, Oianguko parkean. Idiazabal Gaztaren Jatorriko Izendapenak eta Ordiziako Idiazabal Gaztaren Kofradiarekin elkarlanean antolatutako ekitaldi honek edukiera mugatua izango du, eta komunikabide eta gonbidatu gutxietara bideratua izango da. Idiazabal Gaztaren mozketa, aitortza berezi bat, eta erregulartasun sariak emango dira ekitaldian.

Jakiteak ebakiko du gazta

2021eko Idiazabal gazta berriaren ebakiera, urtero legez, gure gazta sustatuko duen pertsonaia edo elkarte batek burutzen du, eta aurtengoan, sukaldaritza tradizionala sustatzen duen Jakitea Elkarteak egingo du.

Jakitea Elkartea betiko sukaldaritza, gure betiko euskal sukaldaritzak sortutako platerak eta bere tradizioari mantentzen dioten sukaldariak indartzeko eta sustatzeko helburuekin jaio zen. Aurreko helburuei heltzeko oinarria kalitatezko produktuetan hartzen dute, inguruko ekoizleak, Km 0ko produktuak eta jatorrizko produktuak erabiltzen dituzte.

Aitortza Ustarrozi

Aurtengo ekitaldian ez da ohiko omenaldirik eskainiko, baina hamazazpi urteko jardunaren ondoren Idiazabal Jatorri Izendapenaren lehendakaritza utzi duen Joxe Mari Ustarrozi aitortza ekitaldi xume bat egingo zaio Ordiziako Udalaren eta Ordiziako Idiazabal Gaztaren kofradiaren aldetik.

Erregulartasun sariak

Idiazabal Gaztaren Jatorrizko Izendapenak iragan urteko ekoizpenaren datuak emango ditu eta artzain eta gaztandegi erregularrenak sarituko ditu. Kontseilu Erregulatzaileak 2020 urtean bere kalitate eta erregulartasunagatik gazta egile hauek saritzea erabaki du:

Artzain ekoizle saritua: Ander Barandiaran Mujika (Gaztañaditxulo, Idiazabal)

Ander Barandiaranek Goierriko Idiazabal herrian egiten ditu bere gaztak, larre eta basoz inguratuta, Gaztañaditxulo baserriak duen nortasunaz jantzia. Arbasoen usadioak mantenduz eta berrikuntzarekin uztartuz, ingurugiroarekiko jasangarritasunean esne kalitate gorenena lortzea da gaztandegi txiki honen helburua. Gazta bakoitza egindako lanaren, esfortzuaren eta bere zaporearen atzean dagoen bizimodu eta pasioaren emaitza delarik, artzaintzarena alegia.

Gaztandegi saritua: Goiburu Gaztandegia, Idiazabal.

Abel Goiburuk, Idiazabalen du gaztandegia. Abelek bere familiatik hartu du artzaintza eta gaztagintzaren testigua. Juanak eta Domingok haien bizitza osoa Idiazabal gazta munduan pasatu ostean, haien jakintza eta kalitatezko errezeta semeari utzi diote. Izendapenetik garrantzia handia ematen diogu kasu hauei; non ezagutzen transmisio familiarra uztartzeaz gain, lan onaren eta arrakastaren aldeko apustua egiten den belaunaldi berrietan.

Gazta berriaren mozketaren inguruan informazio gehiago hemen duzue eskuragarri: https://www.ordiziakoazoka.eus/azoka-bereziak/artzai-eguna/historia

 

 Hemen dituzue Idiazabal Jatorri izendapenaren datuak: Idiazabal Gazta Ekoizpena

 

OHARRA: Kontuan izan aurtengo ekitaldiak edukiera mugatua izango duela, eta komunikabide, gonbidatu eta ordezkari gutxi batzuetara bideratuta izango dela ekitaldia. Izena ematea beharrezkoa izango da Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidean. Bestalde, momentuan indarrean dauden neurriak beteko dira, eta unean uneko erabakiak hartu.

 

logo ordizia bizi herria

Image
Image
Image