Terrazak erabiltzeko gomendioak

Tabernak. Gomendioak. Covid 19

Bihartik aurrera ostalariek terrazak irekitzeko aukera izango dute, hainbat baldintza beteta. Ordiziako Udala ostalariekin batera lanean aritu da hasieratik, egoera honek bereziki kolpatu duen sektoreari arnas bide bat eman nahian, beti ere segurtasun baldintzak beteta.

Horretarako, kasuz kasu aztertu dugu terraza bakoitza, eta Udala ahalegindu da baimendutako mahaiak birkokatzen segurtasun distantziak bermatuz. Hona hemen bezeroek kontuan hartu beharreko gomendioak.

Ordiziako Udalak merkatariei babeserako materiala banatuko die

 

Ordiziako Udalak babes materiala eskuratu eta banatuko du Ordiziako merkatarien artean, bihar eta etzi. Besteak beste, 196 babes pantaila, eskularruak eta gel hidroalkoholikoa banatuko dira. Azken honetarako dispensadore edo pote txiki bat ekarri beharko dute komertzioek, horiek bete ahal izateko.

Egun hauetan, poliki-poliki herriko komertzio batzuk hasiak dira zerbitzua ematen; aurreatiazko hitzorduarekin, bezeroak bakarka artatuz, eta prebentzio eta higiene neurriak jarraituz. Udalak, baina, irekiera fase honetan komertzio guztietan segurtasun neurriak indartuko ditu eta horregatik egingo du materialaren banaketa.

Hain zuzen ere, ostegunean eta ostiralean, maiatzak 7 eta 8, Santamaria kaleko 21 zenbakian dagoen Ordizian merkatari elkarteko bulegoan egingo da horien guztien banaketa, goizeko 8:30etatik 14:30era. Norbaitek ordutegi horretan ezingo balu azaldu, deitu 639 513 495 zenbakira.

Alarma egoerara egokitutako "azokak" aurrera darrai

 

 

mercado actual 2

mercado adaptado

 

 

 

 

 

 

 

 

 

 

 

 

 

 

 

Asteazkeneroko frontoi barruko 11 ekoizle-saltzaileen azoka bereziaz gain, Ordiziako Udalak kanpoan geratzen den frontoi txikian beste 4 postu berri prestatuko ditu bihartik aurrera, plaza barnean dauden beste saltzaile batzuei ere, aukera zabaltzeko. Edonola ere, 4 postu hauek ez dira astero finkoak izango, momentuz bi astean behin etorriko baitira, guztira 8 saltzaile ezberdin direlako oraingoz. Bihar eskaintza zabalduko da beraz, gazta, pastak, olibak eta fruitu lehorrak eskainiz.

Ordiziako ohiko azoka ospatzea ezinezkoa da Alarma Egoera honetan, eta Euskal Herriko Agintaritzaren Aldizkarian apirilaren 16an argitaratutako 2020ko apirilaren 14eko Osasun sailburuaren 1855 Agindura egokitu da (zeinaren bidez aldi baterako eteten baitira nekazaritzako eta abeltzaintzako elikagai eta produktuen zuzeneko salmentako aisialdiko edo jai giroko merkatu eta azoka tradizionalak, ezartzen baitira nekazaritzako eta abeltzaintzako elikagai eta produktuen zuzeneko salmentako merkatu eta azoka tradizionalen -normalean, asterokoak- baldintza sanitarioak eta arautzen baita EAEko zenbait udalerritan denda-ibilgailuak baliatuz saltoki ibiltariek gauzatzen duten jarduera, SARS-CoV-2 (Covid-19) birusak sortutako pandemia dela eta).

Egoera honetan bete beharreko segurtasun neurriak eta distantziak betetzeko, ekoizle ez diren eta plaza barnean dauden saltzaileei aukera ireki zaie, baina lau postu bakarrik sartzen dira, eta horregatik errotazio sistema bat erabiliko da. Zentzu honetan, azoketan soilik saltzen duten saltzaileak lehenetsi dira, saltoki finko bat dutenen aurretik, guztientzat ez dagoelako behar adina lekurik ezarritako segurtasun neurriak eta distantziak bete ahal izateko.

Segurtasun neurriek orain arte bezala jarraituko dute, eta aldez aurretik erositako erosketen banaketa frontoiko eremutik aterako da, parean dagoen Zuhaizti edo Arboledara mugituz, beti ere jende pilaketak ekiditeko.

Zentzu honetan, frontoira adinagatik etorri ezin diren saltzaile-baserritarrei zuzenean erosteko aukerak bere horretan jarraituko du, eta aukera hori frontoira etortzen direnei ere zabalduko zaie. Horrela, itxaron ilarak murriztu nahi dira, eta erosketa horiek Zuhaiztin egokituko den gunean jasotzeko aukera izango dute erosleek, gainerako aurretiazko erosketekin batera.

Asteazkenerako euria aurreikusten denez, itxaroteko ilara babestuko da karpen bidez eta irekiera ordua goizeko 8:30etara aurreratuko da.

Ordiziako baratze parkea zabalik, protokolo zorrotzarekin

 

 

COVID19 birusak eragindako larrialdi egoeran ezarritako lege-arauak errespetatuz Kutxa Ekoguneko Baratze Parke sareko Ordiziako Baratze Parkea martxoaren 12an itxi zen.

Apirilaren 15ean argitaratu zen Ertzaintza eta Udaltzaingoak aplikatu beharreko eguneratutako irizpideak oinarri hartuta eta erabiltzaileen eskaerari erantzunaz Ordiziako Udalak herriko Baratze Parkea irekitzea erabaki du Kutxa Ekogunearekin batera.

Izan ere arau berrian ezarritakoaren arabera baratzeetan jada landatutakoa jasotzeaz gain erein daiteke eta beharrezko mantenu lanak egin daitezke, baldin eta hara joateko eta bertan egoteko behar-beharrezkoa den denbora baino hartzen ez bada eta Osasun Agintaritzak ezarritako neurriak betetzen badira.

Ordiziako baratze parkeko erabiltzaileek proposatutako protokoloa aitzat hartu eta Kutxa Ekoguneak bidalitakoa kontutan hartuta hurrengoak zehaztu dira:

  1. Erabiltzaileak sintomarik badu, etxean geratuko da.  
  2. Norberaren eta gainerakoen osasuna arriskuan ez jartzeko arretaz aritu eta pertsonen arteko gutxieneko 2 metrotako segurtasun tartea errespetatu behar da.
  3. Baratza bakoitzeko erabiltzaile bakar bat arituko da.
  4. Lanabesen biltegian eta aldageletan pertsona bakarra sartu eta sartu aurretik eta ondoren eskuak modu egokian garbituko ditu ura eta xaboiarekin.
  5. Norberak beharko duen xaboia, desinfektatzeko produktuak, eskuak lehortzekoa eta behar izanez gero, bestelako babes neurriak eramango ditu.
  6. Erabilitako lanabesa, ateetako heldulekuak eta gainontzeko gainazal arriskutsuak, garbitu eta desinfektatuta utzi behar dira.
  7. Osasun Agintaritzak ezarritako neurriak betetzen direla bermatzeko, Baratze Parkera sartzeko erabiltzaile elkarteak ezarritako txandak eta hartutako konpromisoak errespetatu beharko dituzte Instalakuntzak irekita edukitzeko:
  • Gehienez hiru orduko iraupena izango duten txandak antolatuko dira, txanda bakoitzean hiru edo lau baratzak izango dute lanean aritzeko baimena plangintza baten baitan (Txanda berean dabiltzan erabiltzaileak, bata bestearengandik urrun egongo dira).
  • Txanda batetik besterako aldaketa denbora ondo antolatuko da, ateratzen direnak ez daitezen sartzen direnekin elkartu.
  • Baratze bakoitzak astean bitan txanda izango du.  

Gogoratu, arduraz jokatu eta elkar zaindu!