Datorren asteartean, hilak 7,  La Enana Naranja taldeak "Kontukantari"  ikuskizun familiarra aurkeztuko du Plaza Nagusian, arratsaldeko 17:30ean, haurrentzako musika ikuskizunarekin; sarrera dohan eta edukiera mugatua. Emanaldia Udaleko Kultura sailak antolatzen du eta  Eusko Jaurlaritzako Kultura Sailak babestutako "Kale Antzerkia Bultzatuz" programaren barruan egiten da.

La Enana Naranja konpainia, titiriteroa bokazioz, Bilbon eratu zen, 1999an, egunerokotasunari hel diezaion familiako antzerki kritiko – konstruktiboa egiteko asmoz. Txotxongiloak bezalako zenbait elementu baliatzen ditu antzerki garaikidea garatu nahian. Hogeitabi urteko ibilbide honetan, umeei hurbiltzeko biderik aproposena txotxongiloak direla ikusi dute. Txotxongilo antzerki garaikidea egiten ahalegintzen dira, arte honen historian zehar beste sortzaile askok egindako lana ahaztu gabe.

Bere ibilbidean zehar mahai txotxongiloekin egindako trilogia nabarmenduko genuke: "Lolo; 215. Eskakizuna", "Imundo; Hesi-Puskatzailea", "Ma; Tren Taupadak". “Kontukantari”, txotxongiloekin egindako antzerki kontzertua, 2014ko abenduan aurkeztu zuten lehen aldiz. Konpainiaren azken egitasmoa  “Altzoko Handia”, txotxongiloen opera izan da, Donosti 2016 eta Topic, Tolosako nazioarteko txotxongilo zentroarekin batera ekoiztua.

Kontukantari ikuskizunak oroimenean dauzkagun abestiak bildu ditu eta horiek reggae, rapa edo bluesa bezalako erritmo desberdinetara eramango gaituzte. Sandra eta Boti txotxongiloen laguntzarekin betiko abestiak berrikusiko ditugu, nagusiek ez ahazteko eta txikiek ikasteko aukera izateko. Eta honela, Arratoitxoak itsasontzi batera igotzen, lanera joan nahi ez duten Txonbo eta Ziku, edo Nana eta Granu azokan txakur bat erosten ikusiko ditugu.

Errepertorioan, "Txiki Txikia", "Txakur bat", "Kanuto", "Txan Txibiri", "Ran Rober Ran", "Sorgina Pirulina", "Baga Biga Higa", "Ixil Ixilik", "Itsasontzi baten", "Ez goaz lanera" eta "gora ta gora beti".

Familia osoarekin musikaz eta txotxongiloen mundu magikoaz gozatzeko aukera paregabea datorren asteartean Plaza Nagusian.

Emanaldian hainbat arau bete beharko dituzte ikusleek:

    Leku mugatuak izango dira, indarrean dagoen araudiaren arabera

    Pertsonen arteko distantziak gorde beharko dira

    Maskara jantzita edukitzea beharrezkoa izango da

    Garaiz etorri, jende pilaketak saihesteko. Banan-banan esertzeko denbora beharko da

    Une oro norbere tokian eserita egon beharko da emanaldia amaitu arte

Igandean, Plaza Nagusian, arratsaldeko 19:00etan GenEroa dantza-ikuskizuna eskainiko da. Genero-ikuspegiaren inguruko lanketa da, originala bezain berritzailea den dantza ikuskizun eta mediazio parte-hartzaile bidez proposatzen du Kimua Dantza Kolektiboak. Biologia, genetika zein euskal hizkuntzari dagokionean, loturak, kateak... ote ditugun galdetuko dugu genero ikuspegiari dagokionez, barrura begira.

D a n t z a r e n b i d e z , g o r p u t z a r e n mugimenduek gidatuta, hartzen ditugun rolak edo ezartzen dizkigutenak hautemateko parada izango dugu. Benetan askeak bagina, nola mugituko ginateke? Nola dantzatuko genuke? Eta zu, ausartuko zara lehen dantza pausua ematera? Loturak puskatzera? Benetan aske izatera?

Dantza emanaldian, 6 dantzari eta ikuskizuna gidatuko duen pertsona bat izango dira taula gainean. Hainbat koreografia interpretatuko dituzte,  musikek, zuzeneko errezitaldiek, bertsoek, off-eko ahotsek, trantsizioek zein hainbat baliabide materialek ikuskizuna osatuko dutelarik.

Euskal Dantza Tradizionalak oinarri hartuz, dantza diziplina ezberdinen (garaikide, klasiko etab.) ukitua duten koreograf ia eta interpretazio  uztarketa eskaintzen du Kimua Dantza Kolektiboak proiektu honetan. Segidan aurrera emango den mediazio parte-hartzailea, gorputza,  mugimendua eta espazioaren erabilera esploratu eta kontzientzia introspektiboa lantzeko helburuz egingo da.

Sarrera doakoa eta librea da, aforoa bete arte.

Ostiral honetan, 19:00etan, “Gazte” ikuskizuna eskainiko da, Majori Plazan.

GAZTE, OINKARI Dantza Taldearen eta HIKA Teatroaren arteko hirugarren elkarlana da. Ikuskizun gaztea, gazteekin egina eta gazteak mintzagai. Zuzendaritza eta dramaturgiaz Agurtzane Intxaurraga arduratu da, eta koreografiak osatzen Eneko Gil dantzari eta koreografoa aritu da.

Hamar dantzari GAZTE (16 eta 24 urte bitartekoak) eszenan, Eneko Gil eta Agurtzane beraren kolaborazioarekin. Musikaz DJ Zigor arduratu da, eta Little Martin DJ eta Eneko Dieguez saxofonista ditugu zuzeneko musika egiten. Tradiziotik abiatuta, kaleko dantza, mugimendu eta hip-hop erritmoetan murgildu gara gazteen ahotsak plazaratzeko.

Publiko orori zuzendua dago.

Estetika eta lengoaia propio baten bila jarraitzeko asmoak eraginda, ikuskizunak Euskal Dantza abiapuntu izanda, Dantza Garaikidea eta garaiko dantza modernoak eta gorputz mugimendua uztartuko ditu, ahotsari eta testuari ere tokia utzita.

Musika aldetik ere, berrikuntzari ateak irekiko dizkio. Euskal folkloreko doinuei muzinik egin gabe, zuzenean entzungo diren erritmoek oinarri elektronikoa izango dute, Hip hop kulturaren kutsu handiarekin eta elektronikak sortzen dituen giroekin lagunduta.

Sarrera doakoa da eta librea, aforoa bete arte.

Ordiziako erdigunean kokatzen den Herri Antzokiak ordutegi berria estreinatuko du ostiral honetan, irailak 3.  Hain zuzen ere, honakoa izango da aurrerantzean bertan eskainiko diren filmek izango duten ordutegia:

Ostiraletan 22:00etan, larunbatetan 19:30ean eta 22:00etan; eta igandeetan 16:45ean eta 19:30ean, eta astelehenetan eta astearteetan 19.30ean.

Zine alternatiboa dagoenean, bestalde, 19:30etan hasiko dira saioak.  Opera eta balleta eskaintzen denetan, eta zuzenean ez denean, 19:00etan hasiko da, eta zuzenean denean, berriz, antolatzaileek ezarriko duten ordutegia mantenduko da.

Horrez gain, zine emanaldietan 10 urtetik beherako haurrak heldu batek lagunduta joan behar dira. Aforoaren murrizketa azken dekretuak ezartzen duenari jarraituz egingo da: Lehen 188 (106 beheran eta 82 goran), orain 133 pertsona (106 beheran eta 27 goran).