LEKAROZKO KORTARIAK ERAMAN DU GAZTA LEHIAKETAREN TXAPELA

San Sebastian Gastronomikak 8.750 euro ordaindu dute enkantean irabazi duen gaztarengatik

‘Zeruan gaude’, esan du Nafarroako familia garaileak

Otsailean eginiko gazta nafarrak irabazi du Ordizian gaur ospatu den Artzainek eginiko Ardi latxa gazta Lehiaketaren 45. edizioa. Lekarozko SC Kortariak aurketu du gazta ketua, ‘orekatua’. Orain ‘zeruan’ daudela eta, irabaztearen ondorioak zer ekarriko zain dago artzain familia. Duela lau urte hasi ziren gazta egiten eta aurten Uharte Arakilgo sari nagusia eraman du. Bigarren saria etxean geratu da, Joseba Intsausti ordiziarrak irabazi baitu.

750. urteurrenari keinua

San Sebastian Gastronomikak urrian, 7tik 10era Donostian egingo den gastronomia kongresura eramateko enkantean aurkeztu da. Eta baita irabazi ere 8.750 euro ordainduta. Erakundeak 20 urte beteko ditu eta hori ospatzeko aurten mundu mailako gastronomía kongresurik ospetsuena ekarriko du hirira aipaturiko egunetan. Tokiko produktuak bultzatzea du helburuetako bat eta denak kontutan hartuta lehiatu da enkantean. Ordiziako hiribilduak 750 urte dituelakoan jarri du enkantea eramateko 8.750 euroko diru kopurua. ‘Gazta ahalik eta jende gehienak dastatzeko aukera izatea’ espero du erakundeko ordezkariak.

Nahiz eta lehen orduan eguraldiak ez duen asko lagundu,   giro jatorrean ospatu da gaur beste behin Ordiziako Euskal Jaietako aparteko azoka. Asteazkeneroko azokaz eta gazta lehiaketa entzutetsuz gain, fruitu eta barazki lehiaketa, perretxiko erakusketa, euskal oiloen lehiaketa eta Gipuzkoako Piriniar Arrazako Behi-Azienden lehiaketa ere izan dira Ordizian. Kalean jendearen joan etorria etengabekoa izan da, eta Goierriko produktu onenak bertatik bertara ikusi, erosi eta dastatzeko aukera izan dute feriara inguratu direnek. Asteazkeneroko azoka ere apain zegoen Plaza Nagusian.

Arratsaldez pelota eta herri kirolak eta garaileen zerrendak

OSTIRALEAN, KAFKAREN AULKIA HERRI ANTZOKIAN

Irailak 7, ostirala, 22:00 HERRI ANTZOKIAN /  Patxi Zubizarreta idazlea, Uxue Alberdi eta Jon Maia bertsolariak eta Pello Ramirez musikaria.

Ostiral honetan, gaueko 22:00etan aurkeztuko da Ordiziako Herri Antzokian KAFKAREN AULKIA emankizuna,  ordu eta erdi inguruko jarduna txirikordatuko dute idazle batek, Patxi Zubizarreta ordiziarrak kasu honetan eta bi bertsolarik Uxue Alberdi eta Jon Maia, Pello Ramirezen txeloaren eta akordeoiaren doinuen gainean. Hitza izango da emanaldiaren ardatza: hitz idatzia eta kantatua, neurtua eta laua, bat-batekoa eta patxadaz hausnartutakoa. Bertsolarien jarduna inprobisatua izango da eta idazleak sorturiko errelatoan txertatuko da hark agindu ahala.

Patxi Zubizarretak osatuko du emankizunaren ardatz izango den errelato nagusia, berak hautaturiko genero, molde eta tonuan. Patxi berak ekitaldiaren inguruan segidakoa adierazi digu:  “Egun seinalatua izango da Kafkaren aulki honek eskaintzen didana: alde batetik, Pello Ramirezekin berriro aritzeko aukera izango dut, ordiziarra bera ere, lotura berezia dut berarekin eta bere musikak hotzikara are bereziagoa eragiten dit; bestetik, sekula ez dut bertsolariekin lan egin, eta horrek bereziki motibatzen nau, batez ere hain maila onekoak izanda. Irrikaz nago, egia esan.  Baina egun seinalatua izango da beharbada nire lanik pertsonalenetako bat eskaintzeko asmoa dudalako, ekitaldi hau behin bakarrik gertatuko delako: gehienetan, idazlearen mozorrarekin ibiltzen naiz, idazlearen ikuspegitik, baina oraingo honetan jaioterrian zer nolako bizipenak izan ditudan kontatu nahi nuke, lehen pertsonan: zein pertsonak markatu nauten, inguruak zenbateraino eragin didan… hori guztia herriaren 750 urteurrenarekin lotuta, nire historia pertsonala jaioterriaren historia nagusian txertatuta.

IRAILAREN 5a, EUSKAL JAIETAKO AZOKA BEREZIAREN EGUNA

Mikel Zeberiok jasoko du aurten aparteko aitortza gazta lehiaketaren alde egindako lanagatik

Abuztuaren 29an  hasi eta hilaren 9a arte iraungo du aurten Euskal Jaietako programak Ordizian. Aurreko urteetan bezala, egitaraua oparoa da. Besteak beste, datorren asteazkenean, irailaren 5ean, egingo den aparteko azoka eta latxa edo Karrantzako ardiaren esne gordinez egindako gazta-lehiaketa azpimarratu behar da. Era berean, azpimarratzekoak dira Ordiziako hiribilduaren 750. Urteurrenaren baitan antolatu diren ekitaldi bereziak. Hauen berri eman dute Donostian Xabier Arruti, Nekazaritza eta Landa Garapen Zuzendariak; Bittor Oroz, Eusko Jaurlaritzako Nekazaritza, Arrantza eta Elikagaien Politikako Sailburuordeak; Jose Miguel Santamaria, Ordiziako alkateak; Miriam Molina, Idiazabal Jatorri Izendapeneko gerenteak eta Ander Aizpurua, Kutxa Fundazioko ordezkariak.

Oraingo honetan ere Ordiziako azokan giro aparta izango dugu, eta goiz osoan zehar era guztietako lehiaketak, erakusketak eta enkanteak ikusi ahal izango ditu bisitariak. Azken hamar urteetako txapelketetan lehen postua hiru aldiz irabazi duen gaztagileari URREZKO KUTXA GARAIKURRA emango zaio. 2009. urtean irabazi zuen garaikurra lehenengo aldiz Elgoibarko Jesus Mª Ansolak eta orain dela bost urte (2013) Ricardo Remiro Eulateko artzainak bigarrenez.

HEMEN DATOZ HIRIBILDUAREN 750. URTEURRENAREN JAIAK

Txupinazoa Jakintza Ikastolak eta Jesus Mari Larizek botako dute

Jose Miguel Santamaria alkateak, Arantxa Fernandez jaietako zinegotziak, udal teknikariek eta hainbat ekintzen antolatzaileek hastear dauden Ordiziako Santana jaietako egitaraua aurkeztu dute. Edizio honek egun bat gehiago dakar opari gisa, izan ere hilaren 28an hiribilduaren ‘750. Urteurreneko Eguna’ ospatuko da.  Haurren egunak 21ean eta 22an izango dira. Baina, beti bezala,  egun batzuk lehenago hasten dira hainbat ekintza eta ostiral honetatik badago non gozatu, eta epilogoa Azarik prestatuko du 31ko usakume jaurtiketarekin. Jakintza Ikastolak, bere 50. urteurrenagatik, eta jubilatu berria den Jesus Mari Lariz, jaien antolaketarako udal koordinatzaileak  jaurtiko dute 24ko txupinazoa.

Ohiko ekitaldiei hainbat berrikuntza gehitu behar zaie aurten ere. Horietako bat, Iker Galarza aktoreak abian jarri duen ‘Gure Zirkua’ ikuskizuna. Goierrira lehenengo aldiz iritsiko da eta San Bartolome auzoan kokatuko da. Hilaren 19, 20, 21 eta 22an irekiko ditu ateak sei saio eskaintzeko. Sarrera gehienak saldu dira dagoeneko. Azkenak Vicuña Sport dendan eros daitezke. Horrez gain, hilaren 21ean urezko txirrista erraldoia jarriko da Eguterabidean eta bazkari batean elkartuko dira 500 haur plaza Nagusian.