'Prozak' kale antzerkia, ostiral honetan

Ostiral honetan honetan, Plaza Nagusian, arratsaldeko 17:30etan Malas Compañías taldeak “Prozak” ikuskizun familiarra eskainiko du, Ordiziako Udalak antolatuta eta Eusko Jaurlaritzako Hezkuntza, Hizkuntza Politika eta Kultura Sailak bultzaturiko «Kale antzerkia bultzatuz» programaren barruan. Emanaldia egingo den eremua, Plaza Nagusian, mugatuta egongo da, eta edukiera mugatua izango du, erabilgarri dagoen lekuaren arabera.

Malas Compañías Zirko Taldearen klowna eta umorea izango dira protagonistak "Prozak" ikuskizunean

Batere ohikoa ez den familia baten bitartez egoera burugabez beteriko unibertsoan murgilduko gara, oharkabean familia horren parte bihurtu arte. Antidepresibo osasuntsu eta eraginkorra dakarkigu taldeak, BARREA eta EMOZIOA., PROZAK propioa pilula ikusgarrian.

Mendebaldean gehien kontsumitzen den antidepresiboa omen da PROZAK, pilula magikoa. Baina Malas Compañias taldearen partaideek ez dute pilula magikoetan sinesten, eta antidepresibo eraginkor eta osasuntsu bat dakarkigute: barrea eta emozioa, PROZAK propioa alegia, zirkua, klowna eta antzerkia uztartuz, ikusle guztientzako ikuskizun berria, formatu anitzekoa.

Ez dakigu non dauden: etxean, zoroetxean, anbulatorioko itxarongelan, aireportuko igarobidean, espazio hutsean... Berdin dio! Bost pertsonai xelebre, bakoitza bere xelebrekeriekin, baina elkarrekin egotera ohituak. Besterik ez dutela susmatzen dugu, baina hemen inor ez da baztertua, edo gutxietsia; aitzitik, bakoitzaren zoramena taldearen laguntzaz anplifikatu egingo da, eta bide harrigarriak hartuko ditu.

Bazterketaren eta estigmatizazioaren kontrako begirada samurra eta komikoa, ikuslea bere burua ere berezi, ezberdin, apart, zoro sentitzera eraman nahi duena.

"Malas Compañias" taldea Euskal zirku konpainia beteranoenetakoa eta oparoenetakoa da. 12 urteko ibilbide profesionalean 7 ikuskizun aurkeztu ditu. Kalea eta aretoa uztartuz , bere lanek berezko zigilua dute, eta zirkua eta umorea ulertzeko eta eszenaratzeko estilo propioa. Prozak ikuskizunaren proptagonistas Maite Guevara, Javier Garcia "Mimo", Mikel Pikaza, Ariñe Azkue eta Koldo Arakistain izango dira.

Kultur emanaldietan bertan hainbat arau bete beharko dituzte ikusleek:

  - Leku mugatuak izango dira ekitaldietan, indarrean dagoen araudiaren arabera

  - Pertsonen arteko distantziak gorde beharko dira

  - Maskara jantzita edukitzea beharrezkoa izango da

  - Garaiz etorri, jende pilaketak saihesteko. Banan-banan esertzeko denbora beharko da

  - Une oro norbere tokian eserita egon beharko da emanaldia amaitu arte

Ordizian garatuko da 'Harimakilatik ihesi' egitasmoa

Iritsi da Harimakila egitasmoa Ordiziara. 2014an, Harimakila ekimen artistikoa Gasteizen sortu zen helburu honeki: Asian, Latinoamerikan eta Afrikan, ehungintzan lan egiten duten langileek pairatzen duten giza eskubideen urraketa plazaratu eta esperientzia artistiko baten bidez, norberak, langile horiek dituzten baldintzak lehenengo pertsonan bizitzea. Kontsumo eta ekoizpenaren inguruko begirada kritikoa aktibatzea bilatzen da. Aurkezpenean izan dira Maite Alonso Cuadrado, Setem Hego Haizea-tik, Maider Sagredo, Calcuta Ondoan-etik, eta Udal ordezkariak: Adur Ezenarro alkatea eta Maitane Alvarez alkateordea.

“Guretzako ohore bat da halako ekimena Ordizian egiteko aukera izatea; guztiok hausnartu behar dugu gure erosketa ohituren inguruan, eta are gehiago horien atzean zer dagoen. Horregatik animatzen ditut herritarrak esperientzia honetan parte hartzera, guztiok ikasteko balioko du eta”, azaldu du Ezenarrok.

2020an, Harimakilaren hasierako ideian oinarrituz, “Harimakilatik ihesi” egitasmoa sortu da. Ekimena Begirada Kontzienteak programaren barne kokatzen da, non kontsumo arduratsua eta pedagogia feministak sustatzen diren. Baina, zer da zehazki?

Ihes gela antzeko bat, jolas bat, esperientzia bat, froga bat... Ordizian bakarrik egongo da esperientzia hau bizitzeko aukera, irailaren 24tik azaroaren 28a bitarte. Epe horretan, 88 taldek soilik izango dute parte hartzeko aukera.

Zer egin behar da abentura bizitzeko? Talde bat sortu (2-5 pertsona), erreserba egin www.harimakila.org, Harimakila-tik ihesi-ra etorri (Cartonajes Nadal, Herri Antzokia, Ordizia) eta frogak pasa eta erronkei aurre egin denboraren aurka. 60 minutu izango dira ihes egiteko. Erreserba beharrezkoa da, eta doakoa da. Musukoaren erabilera, berriz, derrigorrezkoa.

Asteazkenetik ostiralera: 17:00 eta 18:30; larunbatetan: 12:30, 17:00 eta 18:30ean.

Harimakilatik Ihesi elkarlanaren ondorioz sortu da.                        

  • Lan taldea: Calcuta Ondoan ONG, Ikertze, Setem Hego Haizea, Juntura arkitektura kooperatiba eta Experientziako kideak eta Ordiziako Udala.
  • Babesleak: Gipuzkoako Foru Aldundia eta Garapenerako lankidetzaren Euskal Agentzia.
  • Herriko ekimen eta dendak: Urrup Antzerki taldea, Oskarbi Oinetakoak, Marta Art , Vicuña sport, Bi Love arropa denda, Lua Basque Boutique, Lena lenceria y complementos, Intersport Urrutia , GEÊ shops, Arantxa Mertzeria-Lentzeria , Olatz mercería, Amatriain frutak , Sustrai fruta-denda, Tejidos El Kilo, Ordiziako Azoka, Kutixi, Goi Garbi garbiketak, Sasieta Mankomunitatea, Palets Beñat (Urnieta), Jositajosi (Donostia), Emaus Gizarte Fundazioa (Irun-Donostia), Uhinak (Zarautz), Pikor Teatro (Arraia-Maeztu), Eskenitek (Arraia-Maeztu).

Musika zikloa lau kontzertuk osatuko dute

Ikasturte berriaren hasierakin, pixkanaka, Ordiziako kultur bizitza martxan jartzen ari da, eta urteko azken lauhilekoak ekitaldiz betetako kultur agenda bat agintzen du, Udaleko kultura saila lantzen ari den beste berrikuntza batzuekin batera.

Horrela, lau proposamen biltzen dituen musika ziklo interesgarri bat iragarri da, hemendik abendura bitartean, eta Herri Antzokian ikusi ahal izango dira. Euskal Herriko musikariak bilduko ditu zikloak, publiko guztiarentzako kontzertuetan. Ostegunetan eta arratsaldeko 20: 30ean izango dira.

Datorren ostegunean, hilak 17, Amak taldeak irekiko du zikloa. Amak amak dira eta lau. Lau trikiti edo lau pandero eta lau ahots. Lau izenen lehen letrarekin osatutako taldea eta, gainera, lauak amak dira. Amak ikuskizun biribila eskainiko duen taldea da: Alaitz Telletxea (Alaitz eta Maider), Maixa Lizarribar (Maixa ta Ixiar), Amaia Oreja (M-n Ezten) eta Kristina Solano (M-n Ezten). Euskal Herriko folk musikaren ertzak betiko moldeetatik atera eta proposamena gorpuztu nahi dute plaza arruntetatik kanpo. Ikuskizuna bitxia eskainiko digute trikiti, pandero eta ahotsen hamaika bariazio edo konbinazioekin, eta horrela lortuko dute kantuei formula berriak lantzea.

Urriaren 8an, osteguna, proposamen musikal interesgarri baten txanda izango da: Amorante. 20 urteko ibilbidean hainbat proiektutan parte hartu duen Iban Urizarren proiektu pertsonala da Amorante. Urizar Euskal Herriko musika esperimentalaren eta inprobisazio librearen eszenarekin lotuta dago, Bizarra edo Mengele quartet, popa edo rocka bezalako proiektuetan Joseba Irazoki edo Rafa Ruedaren bandetako kide gisa ibilia edo folkean Joseba Tapia musikariarekin batera.

Azaroaren 19an, ostegunean, Maria Berasarteren ahotsaz gozatzeko aukera izango dugu. "Lurra eta Bidea" bere proiektu berria aurkeztuko du, non bere istorioa irudikatzen duen, bere lurrari eta jatorriari oda moduan. “Lurra eta Bidea” Maria Berasarteren proiekturik pertsonalena eta originalena da. Bertan, bere euskal sustraiak erakutsiko ditu, beste musika estilo batzuetan zehar egindako bidaia, non lehen aldiz euskal musika eta poetikara itzuli izana nabarmenduko den.

Eta zikloari amaiera emango diote abenduaren 10ean, osteguna, Iñaki Salvadorrek (pianoa) eta Loyola Garmendiak (ahotsa) osatzen duten bikoteak. “Real Book” izeneko proposamena aurkezten dute, saio inprobisatu batean, harrituko gaituena. Jazz, soul, zine eta Broadwayko musikal klasikoen doinuak eskainiko ditu ikuskizun honek.

Lau kontzertuetarako abonu bat jarri da salgai, 28 euroan, eta sarrera solteak 10 euroan izango dira. Abonuak Barrena Kultur Etxean eta Herri Antzokian eros daitezke, eta sarrera solteak Herri Antzokian edo Kutxabank-en (sarrerak).

Herri Antzokia: iraileko filmak

Hemen duzue Herri Antzokiko iraileko eskaintza. Mesedez, kontuan izan COVID-19aren ondorioz neurri bereziak hartu beharko direla: 

iraileko filmak