AHOZ AHO JAIALDIA LARUNBATEAN BERRIRO MARTXAN

Joan den martxoaren 7an "Kontatu gurekin" narrazio lehiaketa egin zen D 'Elikatuz gunean, Udalak antolatzen duen "Ahoz Aho" Ahozkotasunaren Jaialdiaren barruan. Jaialdi hori bertan behera geratu zen egun batzuk geroago, alarma egoera ezarri zelako, eta horrek konfinamendu orokor batera eraman gintuen. Orain berriz aurkezten da jaialdia, larunbatean hasita eta datorren astean zehar.

COVID19k eragindako edukiera murrizketak direla eta, gonbidapena beharko da kontzertuetara joateko. Saioetara joan nahi dutenek gonbidapena eskatu beharko dute Barrena Kultur Etxean (943805630)/Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko..

Larunbatean Barrena Kultur Etxean bi saio eskainiko ditu jaialdiak. Lehendabizikoa arratsaldeko 5etan, Ane Gebara gasteiztarrak eta Tarana Karin Azerbaijanekoa eta Tolosan bizi dena, euskaraz eskainiko duten saioa. Eta Ahoz Ahok eskaintzen duen ohiko kale hitzordua Barrenara ere joango da aurten, segurtasun eta edukiera arrazoiengatik, eta 19: 00etatik aurrera magia saio berezia eskainiko du euskaraz eta gaztelaniaz Diego Calavia errioxarrarekin (Errioxa) eta David Blanco eta Imanol Ituiño euskaldunekin.

Astelehenean jarraituko du jaialdiak Barrenan, Odei Arregirekin eta arratsaldeko 6etatik aurrera euskarazko ipuin saioa eskainiko du. Horrez gain, Odei Arregi eta Aitor Vinagret narratzaileak Jakintza eta Urdaneta ikastetxeetara hurbilduko dira egunotan.

Ostegunean, hilak 12a, arratsaldeko 6etan Dorleta Cortazar narratzaile euskalduna eta Zoa Tamara Cuellar nikaraguarra izango dira bertan. Ostiralean, hilak 13a, itxiko da jaialdia 20: 15ean Barrenan, bertan martxoaren 7an Narrazio lehiaketako finalistek ,Ester Poveda, Ane Arrugaeta eta Joxe Aldasorok, euren istorioak kontatuko dizkigute, publikoak eta epaimahaiak aurtengo edizioaren irabazlea nor izango den erabaki dezaten. Eta, horiekin batera, beste narratzaile batzuk ere izango dira, ipuinak, istorioak, kontakizunak eta gertaerak ahoz kontatuz, publikoa lotuko dutenak, narrazio-estilo desberdinak ikusiz, eta guztiak agertokira aterako dira hitzaren eta ahozkotasunaren festa kolektibo batean.

May Gorostiaga jaialdiaren koordinatzaileak dioen bezala, "esan genezake urte berezi honetan gure jaialdia "upeltegian"egon dela zortzi hilabetez…, eta badakigu produktu askok hartzidura-denbora hori behar dutela…, ziur gure jaialdiko ipuinak ere inoiz baino goxoagoak izango direla". Horregatik, Mayk honako hau dio: "Istorioak entzuteko gosea baduzue, etorri! Mahaia jarrita dago eta kontalariak prest ".

AHOZ AHO jaialdia euskal kontagintzan erreferentea bihurtu da urte hauetan eta nazioarteko zein bertako kontalari profesionalak ekartzeaz gain, ipuinak kontatzearen zaletasuna dutenek ere beren espazio izan dute, profesionaltasuna eta zaletasuna jardun beraren bi zutabeak baitira antolatzaileen ustetan. Martxoan jaialdia aurkezteko erabili ziren hitzak jaso ditugu: …ezaguna da olatuek itsasertzean hiltzeko ohitura berezia dutela……baina ez da sekula jakin ze jaioleku duten olatuek, ze jaioleku duten ipuinek …” ziur leku hori Jaialdiako saioen zehar aurkituko dugula.

COVID19k eragindako edukiera murrizketak direla eta, gonbidapena beharko da kontzertuetara joateko. Saioetara joan nahi dutenek gonbidapena eskatu beharko dute Barrena Kultur Etxean (943805630)/Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko..

Trakamatraka instrumetu erreziklatuen kontzertua, bihar

Ostiral honetan, Plaza Nagusian, arratsaldeko 17:30etan Trakamatraka, instrumentu erreziklatuen kontzertua izango da  familia ororentzako, Udaleko Kultura sailak antolatuta eta Eusko Jaurlaritzako Hezkuntza, Hizkuntza Politika eta Kulturako «Kale antzerkia bultzatuz» programaren barruan.

Emanaldian musika bihurtutako zaborra: luteria, birziklatzea eta musika-sormena. Jazz erritmodun mangerak, didgeridoo bihurtuko diren yogurt potoak, kriskitin konplejua daukaten maionesa tapa jotazaleak, erritmo afrikarrez beteriko kuboak, gorputzean itsatsirik geratzen den doinua fabrikatzen duten hodiak... Hori guztia Tramamatrakan dago: musika aniztasuna, sormena eta irudimena, birziklatzea eta ingurumenarekiko errespetua bateratzen dituen proiektua.

Gizarte honek baztertzen dituen objetuekin egindako musika-tresnak oinarri dituen ikuskizun musikala dugu Trakamatraka. Inoiz ikusi ez diren musika-tresnak bizitza ematen dien ikuzkizun antzeztua eta musikatua.

Trakamatrakak tailer eta kontzertu didaktiko bidez musika modu erakargarrian hurreratzen du eta, aldi berean, birziklatze-kontzientzia lantzen du. Gizarte honek baztertzen dituen gauzak eraldatu, eta zoragarriak diren musika-tresna bihurtuko ditu.

Giro atsegin eta partehartzaile batean, isiltasunari forma emango diogu sormena landuz. Musika ulertzeko eta maitatzeko bide berria.

Trakamatrakaren atzean Jon Urrutia (Bilbo, 1978) dago. Kitarra eta bibolina jotzen ikasi zuen  "Juan Crisostomo de Arriaga" (Bilbo) kontserbatorioan. Deustuko unibertsitatean Musika hezkuntza eta Antropologia burutu zituen. Proiektu ezberdinetan parte hartu du eta instrumentu ezberdinak landu ditu, kitarra elektrikoa kasu.

Horrez gain, musika ikerketa arlotik jarraitu du bere formakuntza: perkusio instrumentuak, haize musika-tresnak, armonia, konposizio-teknikak, moldaketak, eta abar, aztertuz.

Bere irakasleen artean hauek aurki ditzakegu: Carlos Velasco, Miguel Salvador, Blas Fernandez, Efren Lopez, Sofia Ribeiro, Miguel Gil, Iñaki Salvador, Kurt Rosenwinkel, Kenny Barron, Luis de Pablo, Raul Marquez, Diego Galaz, Eliseo Parra...

Musika ulertzeko eta maitatzeko bide berria erakutsiko du Trakamatrakak datorren ostiralean Plaza Nagusian.

Kultur emanaldietan bertan hainbat arau bete beharko dituzte ikusleek:

    Leku mugatuak izango dira ekitaldietan, indarrean dagoen araudiaren arabera

    Pertsonen arteko distantziak gorde beharko dira

    Maskara jantzita edukitzea beharrezkoa izango da

    Garaiz etorri, jende pilaketak saihesteko. Banan-banan esertzeko denbora beharko da

    Une oro norbere tokian eserita egon beharko da emanaldia amaitu arte

'Ongi etorri eskolara', kulturarteko harremanak bultzatzeko

Proiektuaren helburua Eskolan izena eman duten eta beste lurraldeetan edo erkidego autonomoetan jatorria duten familiei laguntza ematea da.

‘Ongi Etorri Eskolara’ proiektua berriz ere Ordizian garatuko da, iazko urteko esperientzia ona dela eta. Kultura arteko eredu pedagogikotik, eta eskola komunitate osoaren inplikazioaren bidez eskolan aniztasun kulturala eta honek sortzen dituen abantailak lantzeko egitasmoa da hau. “Iazko kasuan, Familia Laguna programan 40 familiak parte hartu zuten; 20 bikotek. Aurten, berriz, 34 familiak parte hartuko dute”, azaldu du Adur Ezenarro, Ordiziako alkateak.

Alde batetik, berdintasunezko bizikidetzan, familia guztien inklusio prozesua aurrera eramaten lan egiten da. Bestetik, familia hauei, euskara eta euskal kultura, beraientzako aukera bat bezala eta ez gainditu beharreko oztopo bat gehiago bezala, ikus arazten. Horretarako, eskola osatzen duten kultura guztiak balioztatzea beharrezkoa da. Berdintasunezko baldintzetan hurbileko erlazioak sortu daitezen. Bai jasotzen duen kulturak eta baita etortzen den kulturak ere sendo egon behar dute, batak bestearengandik ikasteko, norberak berea galdu gabe. Eta eskola guzti hau lantzeko eremu pribilegiatua da.

“Ongi etorri eskolara” proiektuak Urdaneta Eskolan eta Jakintza ikastolan kulturartekotasuna lantzen du. Eskola osatzen duten kultura guztiak ahaldunduz, jatorria beste herrialde batean duten kulturetako familiak euskarara eta euskal kulturara gerturatuz. Horretarako, ikasle, irakasle, irakasle ez diren langileekin eta familiekin lan egiten da. Azken hauek izaten dira gehienetan eskolan kulturartekotasuna lantzen denean, lanketa honetatik at geratzen direnak, baina aldi berean, hezkuntza prozesua eta bizikidetza lantzeko nahitaezko zati dira. Familiekin egiten den esku-hartzeak, eskolan aurrera eramaten den kulturarteko esku-hartze eta sentsibilizazioa eremu komunitariora zabaltzea dakar, auzoetan, udalerrietan edo/eta hirietan.

Familia laguna

“Ongi Etorri Eskolara” proiektuaren barruan gauzatzen den programetako bat “FAMILIA LAGUNA” programa da. Honek eskolan matrikulatzen diren beste herrialde batzuetako familia emigratuak, adin bereko seme-alabak dituzten familia euskaldun boluntarioekin harremanetan jartzen ditu. Familia hauek, boluntario aurkezten dira konfiantzazko harreman bat eraikitzeko, gizarte eta hezkuntza arloko ibilbidea egiten ahalbidetuko diena, alderdi hauei dagokienez: ikastetxeko informazioa, auzoko eta udalerriko baliabideak, familia etorri berriaren sare sozialak zabaltzea eta haiek euskarara hurbiltzea, eskolan eta komunitatean aukera-berdintasunaren bideratzaile gisa.

Ostegunean, Amorante musikariaren kontzertua

Ostegun honetan, hilak 8, Ordiziako Udalak antolaturiko “Bizi Musika” zikloan, bigarren kontzertua izango dugu Amorante musikariaren eskutik . Hitzordua Herri Antzokian, arratsaldeko 20: 30etan.

Proposamen musikal interesgarri baten txanda izango da: Amorante. 20 urteko ibilbidean hainbat proiektutan parte hartu duen Iban Urizarren proiektu pertsonala da Amorante. Urizar Euskal Herriko musika esperimentalaren eta inprobisazio librearen eszenarekin lotuta dago, Bizarra edo Mengele quartet, popa edo rocka bezalako proiektuetan Joseba Irazoki edo Rafa Ruedaren bandetako kide gisa ibilia edo folkean Joseba Tapia musikariarekin batera.

Amorante, Iban Urizar, bera bakarrik agertokian. Aldean darama gitarra, ukelelea, tronpeta, harmoniuma, zintzarria eta perkusio tramankuluak; eta looper bat darabil soinu horiek guztiak nahastu, ordenatu, eraiki eta apurtzeko.

Amorantek iturri ugaritatik edaten du, izen artistikotik bertatik hasita. Rodrigo Amarante musikari brasildarraren eta Enrique Morente flamenko kantari izandakoaren abizenak nahasi ditu, haiei dien miresmenenaren seinale. Eta hasiz gero kantuen aldamioei erreparatzen, han ere era askotako keinuak aurkituko ditu entzuleak, direla Bixenta Mogelen koplak, direla Antonio Molina edota Pepe Marchena flamenko kantarien itzalak, direla herri musikatik hartutako oihartzunak. Baiki, tradizioak pisu handia du Amoranterentzat, baina ez tradizioa ulertuta modu sakratu eta aldaezinean, ezpada zerbait berria sortzeko ezinbesteko zimendu bezala. Hori baita Amoranteren bigarren osagaia, tradizioa bezain ezinbestekoa: inprobisazio askea. Kantua etengabe aldatzen ari den zerbait da harentzat, eta, hortaz, aurrez ezarritako gidoirik gabe aritu zale da, unean uneko jardun erabatekoan, balizko akatsek bide ematen diotelako lehendik egindakoa beste zerbaitetan transformatzeko.

Ezohiko musikaria da Amorante, bai bazterrotan behinik behin. Ezohikoa, batetik, askotariko erreferentziak batuz iruditeria oso pertsonala osatzea lortu duelako, eta, ezohikoa, bestetik, apustu zintzo bezain zirraragarria delako berea, gutxitan antzematen den benetakotasuna dariolako bere jardunari. Eta artista bati nekez eska dakioke hori baino gehiago.

 

Harrigarria izan daitekeen proposamen musikala, baina bere arriskuagatik, originaltasunagatik eta freskotasunagatik ere harrapatzen zaituena. Amorante, inprobisazioaren maitalea, Musika Bulegoa Saria saria jaso duena, ostegun honetan Herri Antzokian. Sarrerak aldez aurretik salgai: Kutxanbank-sarrerak (webgunean eta kutxazainetan) eta Herri Antzokian.