IGANDEAN HAUR ANTZERKIA BARROKO AIRE ZIKLOAREN BARRUAN - BARROKO TXIKI ANTZERKIA

LAU

Igandea 15 – 16:30. Herri Antzokia.  "Salto! Sorkuntza" taldearen eskutik  "Lau"antzerki  lana.

Aurten, Barroko Aire zikloaren osagarri berezi gisa, haurrentzako eta familientzako programa berezi bat sortu da, "Barroko Txiki" izenekoa, eta datozen zikloetan jarraitzeko asmoz sortu dena. Horrela, bada, jende guztiarentzat, baina bereziki 3 eta 8 urte bitarteko haurrentzat, zuzendutako antzezlan familiar bat ere programatu da. Musikatik abiatuta egindako kontakizuna da, Vivaldiren "lau urtaroak" lanean oinarritua, eta Salto Sorkuntzak taldeak ekoitzi du.

 Vivaldiren partitura ospetsua abiapuntu bezala hartuta, istorio    honetako narratzaileak eskutik hartu eta lau urtaroetatik bidaiatzera eramaten gaitu. Musikak natura iradokitzen digu: geogralia, klima, usainak, zaratak... Eta gorputza, egoera bakoitzari lotuta doakion emozio eta gertaerei egokituz adierazten da, abentura eta gertakari ezberdinetan murgilduz. Jantzi eta objetuen bitartez, eraldaketa harrigarriak lortzen ditugu, beti ere irudimenarekin jostatuz. Objetuek bizitza ezberdinak dituzte; bufanda bat ez da soilik bufanda bat...

Hitzekin ere jolasten dugu, eta poesiak badu bere lekua. Haikuen bitartez, pertsonaiak momentuaren edertasuna harrapatu eta helerazten dio publikoari.

Unibertso zabal bat da LAU; denbora laburrean istorio bat beste baten barruan eta horren barruan beste bat kontatzen diguna... Txikitxoei atentzioa lapurtuko dien sorkutza bitxia eta dibertigarria, beraien zentzumenak sustatu eta beti erne mantenduko dituena, partaidetza aktiboa bultzatuz.

Salto! Sorkuntzak egitasmoa Marta Urcelayk eta Leire Uchak bultzatutako egitasmoa da.Arte eszenikoen munduan urte askotan ibiliak dira, bai antzerki, telebista edo zineman, beraiek sortutako laneki edo beste konpainia batzuekin lan eginez.

Lau haurrentzako ikuskizuna da, Lau hitzak dira, Lau musika da, Lau antzerkia da eta sentsazio mundu bat deskubritzeko aukera bat da, Vivaldiren "lau urtaroen" musikaren bidez.


Emanaldia igande honetan izango da, Herri Antzokiaren haurrentzako ohiko saioaren barruan; kasu honetan, ohiko ordutegian ordu laurden bat aurreratuko da, eta saioa 16: 30ean hasiko da. Sarrerak salgai Kutxabank-sarrerak eta Herri Antzokian bertan.

 

IGANDEAN BARROKO AIRE JAIALDIAREN BIGARREN KONTZERTUA: LAU SASUAK

LAU SASUAK

Udalak eta Gipuzkoako Foru Aldundiak antolatutako Barroko Aire kontzertu zikloarekin jarraituz, igandean, hilak 15, Ordiziako Parrokia Elizan, arratsaldeko 6:30etan, bigarren kontzertua entzuteko aukera izango dugu, BABX (Behi bideko Andere xuriak)  eta Lau Sasuak taldeen eskutik.

Baionako Arranoa laukoteak eta Ipar Euskal Herriko beste hainbat musikarik osatzen dute Lau Sasuak. “Arranoa taldeko Marina Beheretxe biolin jotzaileak sortu zuen proiektua, eta Antonio Vivaldiren Lau urtaroak euskal maneran, euskal saltsan egitea zen asmoa. Biziki ikuspegi argia behar zuen, eta bazuen”, esan du Mikel Etxekoparrek, proiektuko txistulari eta kantariak. Berak, dena den, zalantza ugari izan zuen hasieran. “Oso ezaguna da Vivaldiren lana, eta nik Marinari esaten nion Vivaldik ez zuela gure beharrik Vivaldi eta eder izateko, baina berak argi zuen baietz”. Beheretxek “oso ongi” ezagutzen ditu Vivaldiren obra eta Lau urtaroak sortu zeneko garaia, barrokoa. “Garai hartan, musika egiteko manera ez zen mende bat geroago egiten zena bezalakoa, eta hori oso ongi menderatzen du Marinak”.

Obra bera eta testuingurua ezagututa, “euskal manerara” ekarri zuten lana, eta hori eskainiko dute kontzertuan. “Ahozkotasuna sartu dugu, inprobisazio batzuk ere bai… Espiritu berriarekin, garai hartako espiritua berreskuratzen saiatu gara”, azaldu du txistulari eta kantariak. “Euskal instrumentuak ere sartu ditugu. Nik ezagutzen ditut hemengo kantagintza, txirula eta ttun-ttuna, eta horiek sartu ditugu; baita bertsoak ere”. Louis Ligetx koblakari eta idazle zuberotarrak Lau sasuak bertso sorta idatzita dauka. “Eta horiek ere berreskuratu ditugu. Horregatik deitu diogu Lau sasuak eta ez Lau urtaroak. Ahotsa, ttun-ttuna, txirula, txistua, txalaparta eta panderoa sartu ditugu hari laukotearekin batera”.

Vivaldiren obra “errespetatu” dutela dio Etxekoparrek, eta lan horretako hamabi mugimenduak jotzen dituztela eurek ere. “Urtaro bakoitzak hiru mugimendu ditu, eta hamabiak eskaintzen ditugu gure emanaldian. Ligetxen bertsoekin hasten gara”. Lau urtaroak izaki, naturarekin lotura daukaten doinuak ere izango dira entzungai. “Txorien txistuak, ardien zintzarriak, baserri munduari lotutako hainbat soinu… Vivaldiren hamabi mugimenduez, Zuberoako hainbat kanta ere jotzen ditugu.”

Vivaldiren "Lau urtaroak" lanaren bertsio original horren osagarri, BBAX- Behi bideko Andere xuria taldea ere arituko da. Marie Hirigoien Bidart, Mirentxu Agerre, Pantxix Bidart, Paxkal Indo eta Allande Etxeberrik osatzen dute taldea, eta taldeak a capella proiektu berri baten lanak erakutsiko ditu. Taldeak Allande Oihenart zuberotarraren XVII. mendeko olerkiak aukeratzen ditu errepertorio berria sortzeko oinarri gisa.

Aurreneko kontzertuan bezala, edukiera mugatua izango da, dagozkion segurtasun-neurriak bermatzeko eta kontzertuetarako gonbidapenak jaso behar dira Barrena Kultur Etxean (943805630).

OSTEGUNEAN ETA OSTIRALEAN AHOZ AHO JAIALDIAREN SAIOAK BARRENAN

Zoa Tamara Cuellar

OSTEGUNA,– 18:00 H.  Dorleta Kortazar eta Zoa Tamara Cuellar narratzaileen saioa

OSTIRALA, 19:00 h . Narrazio Lehiaketa + Gala Nagusia

Ahoz Aho, Ahozkotasunaren Jaialdia azken txanpan sartu da aste honetan. Pasa den larunbatean Ane Gebara eta Tarana Karim saio liluragarria eta ariña eskaini zuten Barrena Jauregian. Astean zehar Jaialdiak umeentzako saioak eskaini ditu Urdaneta Ikastetxean eta Jakintza Ikastolan. Odei Arregi eta Aitor Vinagret Ordiziako ikastetxeetara gerturatu dira bere lana eskaintzera.

Ostegunean, arratsaldeko 6etatik aurrera Barrenan izango dugu beste aukera bat Jaialdiaren narratzaile bi ezagutzeko: Zoa Tamara Cuellar (Nikaragua)) eta Dorleta Kortazar (Euskadi).

Zoa Tamara Cuellar ISA-an ( Kubako arte unibertsitatea) Antzerki Artean lizentziatu zen teatrologia espezialitatean 2013 urtean. "Gazteok eszenan" proiektuarekin, antzerki, txotxongilo eta ahozkotasun ikastetak burutu zituen "Guachipilin" Nicaraguako taldean (2006). 1994tik Guachipilin txotxongilo taldean antzezle modura aritzen da eta 2009an Extra teatro proiektu interdiziplinarioa sortzen du. Disziplina eszeniko ezberdinetan lanean haritu da, 30etik gorako proiektu ezberdinetan murgilduz. Antzerki zuzendari gazte bezala, permormance, ahozkotaun eta txotxongilo antzezle proiektu ezberdinak zuzendu ditu. Kritikari eta ikertzaile gisa, Cuba, Nicaragua eta Costa Rican argitaratu dituzte bere lanak eta "Ixpolot" Nicaraguako Antzerki kritika bloga kudeatzen du David Rocha-rekin batera.

Dorleta Kortazar ipuin kontalaria da. Eskoriatzatik mundura eta bueltan ibili da, istorioak garraio, aitzakia, inspirazio eta bizimodu ere badirelako. Haur, nerabe zein helduak ditu entzule eta ipuinak kontatzen erakustea bakarrik ez, ipuinak emakumeen jabetze tresna gisa proposatu ditu maiz; errealitateaz jabetu eta espazio publikoa berreskuratzeko.

Eta Ostiralean, Barrena Kultur Etxean, 19:00etan, Ahoz-Aho Jaialdiaren Ikuskizun nagusia ospatuko da, Narrazio Lehiaketa finalarekin batera.

Eta Jaialdiari amaiera emateko, ostiralean hitzaren Akelarrea antolatuko da, hau da, Ahozkotasunaren Jaialdi Nagusia. Ordiziako Barrena Jauregia izango da gure akelarrearen kobazuloa eta hitzordua esan dugun bezala ostiralean, arratsaldeko 19:00etan

Istorioek eta ipuinek sorginduko gaituzte, ez dugu edari magikoen beharrik izango. Narrazioaren aztiak gonbidatu ditugu horretarako, Arrate Leunda eta Ainhoa Jimenez herriko narratzaileak, Maider Alcelay eta Itziar Rekalde.

Gaueko sua Ahozko Kontakizunen VIII. Lehiaketako hiru finalistek piztuko dute: Ester Povedak (Berrobi), Ane Arrugaetak (Gasteiz) eta Joxe Aldasorok (Etxarri Aranatz) Jaialdia amaitzean zortzigarren edizioaren irabazlea zein izan den jakingo dugu.

COVID19k eragindako edukiera murrizketak direla eta, gonbidapena beharko da kontzertuetara joateko. Saioetara joan nahi dutenek gonbidapena eskatu beharko dute Barrena Kultur Etxean (943805630)/Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko..

Igandean hasiko da Barroko Aire, musika barrokoaren jaialdia

Joan den igandean zabaldu behar zen Ordizian "Barroko Aire. Musika barrokoaren egunak” jaialdia, baina Covid-19ak  Ordizian eragindako egoerak ikusita hamar egunerako  zenbait jarduera bertan behera uztera behartu zuen, eta horien artean zikloa irekitzen zuen kontzertua. Epe hori igarota, berriro ekingo zaio kulturgintzari eta igande honetan Musbika Ensemble taldearekin hasiko da zikloa.

Musika barrokoa, beraz, protagonista, berriz ere interpretatzaile eta musika talde kontrastatuak aurkezten dituen ziklo batean, non eta errepertorio interesgarria eskainiko dute, maila altuaren erakusgarri. Edukiera mugatua izango da, dagozkion segurtasun-neurriak bermatzeko eta kontzertuetarako gonbidapenak jaso behar dira Barrena Kultur Etxean (943805630).

Hona hemen aurtengo egitaraua:

Parrokia /  18:30 h.

Azaroak 8: Musbika Ensemble “Antonio Gaztañetaren bidaia”

Azaroak 15: Lau sasua (Vivaldiren “Lau urtaroak”)

Azaroak 22: Vocalia eta Conductus Ensemble: "Le muse veneziane"

Azaroak 29: Thomas Ospital (organoa) eta Lucas Lipery-Meyer (tronpeta)

Abenduak 6: Euskadi Brass

Igande honetan Musbika Ensemble taldeak "Antonio Gaztañetaren bidaia" izenburuko ikuskizuna  aurkeztuko du. Kontzertuaren programan Josu Camara aktorea marinel paperean, Antonio Gaztañeta Mutrikuarraren gora-beherak kontatzen dizkigu. Kontakizunak kontestualizatzen du taldeak jotzen duen musika.

Euskal Herrian hainbat itsas-gizon garrantzitsu izan ditugu, tartean Antonio Gaztañeta (1656-1728). Musbika Ensembleak, Antonio Gaztañetaren bidaia ikuskizun honetan, bere itsasontzian bidaiatzeko aukera eskaintzen dizu, testu dramatizatu eta musikaren bitartez. Tripazko sokak, klabea, arku barrokoak, larruzko estalkiak eta barroko garaiko kriterio historikoekin interpretatutako musikak Antonio Gaztaiñetaren garaiko Mutriku herrira eramango gaitu bidaiari ekiteko.

Antonio Gaztañetak, denboran bakarrik ez, bere intsasuntzian, Europako eta Ameriketako hainbat herrialdetara eramango gaitu, eta bertako musika eta kultura ezagutzeko aukera emango digu, bidaian hainbat bataila eta ekaitzi ausardiaz aurre eginaz.

Musbika musikaren sentsibilizazio eta difusiorako lan egitea helburu duen musika konpainia bat da. Musikari lotutako hesi eta etiketak hautsi eta arte hau txoko guztietara zabaltzearen nahiarekin lan eginaz, edonork musika estilo ororekin harritu eta gozatzeko aukera izan dezan.

Musika klasikoa eta antzinako musika pertsona ororengana iristeko dauden oztopo eta clichéak gainditzeko asmoz, musbikak, berritasunez hornituriko MUSBIKA ENSEMBLE proiektua aurkezten dizu, eszenaratze fresko eta dinamiko baten bitartez. Pertsona orok izan dezan musika honekin gozatu eta harritzeko aukera.

Ganbera musika talde honek, 2016ko abenduan ekin zion bere ibilbideari Elgoibarren. Abenduko estreinaldiari, Gipuzkoako Foru Aldundiak udalekin elkarlanean antolatzen dituen Azkoitiko eta Zarauzko jaialdiekin eman zion jarraipena taldeak. Abuztuan berriz, Bizkaiko Foru Aldundiak udalekin elkarlanean antolatzen duen Lekeitioko “Itxas-soinuak” Jaialdian aritu zen, eta azaroan berriz, Ordiziko “Barroko Aire” jaialdian. 2018a Bilboko “Musika-Música” jaialdiarekin estreinatu zuen ensembleak eta abuztuan hiri berean aritu zen Aste Nagusiko musika klasiko zikloan. 2019an berriz “Musika-Música" jaialdira itzuli zen eta urteari Arabako Antzinako Musikaren Astea, Bergara, Plentzia eta Oñatiko emanaldiekin eman zion amaiera. 2020an berriz, hiru jaialditan egin du estreinaldia, Mutrikun, Bakioko "Musika Astea”n eta Amorebieta-Etxanoko “Eleizetan” jaialdian.

"Barroko Aire" zikloaren hasiera igande honetan, 18: 30ean, parrokian. Sarrera doakoa da, gonbidapena jaso ondoren, Barrena Kultur Etxean.