Ordiziako Zuhaizti zentroak prest dauka ikasturte berrirako 'Aktibatu zaitez' ekintza programa. Urtero 400 bat lagunek parte hartzen dute adinekoen artean ikastaro eta aktibitate ezberdinak bultzatzen dituen egitasmo honetan.

Jon Ander Caballero zinegotziak azpimarratu du “ez bakarrik gazteak, adineko herritarrak ere aktibo mantentzea garrantzitsua” dela, eta zentzu horretan Zuhaizti zentroak “oso aukera zabala” eskaintzen duela, “kiroletik eta ongizatetik hasi eta informatika ikastaroetaraino”. Hala, Ordiziako heldu eta adineko guztiak animatu ditu ekintza eta ikastaro hauetan parte har dezaten.

Guztira 23 aktibitate antolatu dira aurten, hiru arlo nagusitan banatuta: kultur ekimenak eta jarduera fisikoa, Informazioa eta komunikazioa, eta Osasuna eta ongizatea.

Programa hau Ordiziako heldu eta adineko (erretiratuak eta pentsiodunak) guztiei zuzenduta dagoela gogorarazi dute. Hala, Zuhaiztiko bazkide ez direnek ere parte hartu ahal izango dute, beti ere, kuotaren %20ko igoera batekin.

Informazioa eta izen-ematea, Ordiziako Zuhaizti jubilatu eta pentsiodunen elkartean edo 943 88 92 88 telefono zenbakian. Bulegoko ordutegia: asteazkenak eta ostegunak, 10:30etik 12:30erta.

Zuhaizti zentroan aste honetan hasi dituzten lanak direla eta, programak eta ikastaroek aldaketak izan ditzakete.

• Aktibatu zaitez 2024/25
• Zuhaizti programa otsaila