Ordiziako Klasikoaren 103. edizioak nazioarteko txirrindularitza onena ekarriko du berriro Santa Ana jaietara

Uztailaren 25ean jokatuko da Ordiziako Klasikoaren 103. edizioa. Santa Ana jaien barruko hitzordu nagusietako batek mundu mailako txirrindulariak bilduko ditu berriro Ordizian.

Santa Ana jaien barruan, Ordiziak urtero bezala bere kirol hitzordu garrantzitsuenetako bat hartuko du uztailaren 25ean: Ordiziako Klasikoaren 103. edizioa. Txapel Gorri Txirrindulari Elkarteak antolatutako lasterketa 10:00etan abiatuko da, eta aurten ere nazioarteko txirrindularitzako izen handiak bilduko ditu.

Lasterketaren aurkezpenean izan dira Ordiziako alkate Adur Ezenarro, Gipuzkoako Foru Aldundiko Kirol zuzendari Roberto Ramajo, Diario Vascoko erakunde harreman eta babesletzen arduradun Iosu Larrarte, Rural Kutxako ordezkari Ander Justo eta Ordiziako Klasikoko zuzendari Josean Etxezortu.

Ordiziako alkate Adur Ezenarrok probaren balio historikoa eta antolakuntzaren lana nabarmendu ditu: «Ordiziako Klasikoa bezalako proba bati eustea lan erraldoia da, eta hori posible da soilik auzolanari eta eskualde oso baten elkartasunari esker. Goi mailako txirrindularitza Ordiziara ekartzeko, maila bereko sare boluntarioa behar da. Horregatik, nire aitortzarik handiena Txapel Gorriko lan taldeari eta urtez urte lasterketa posible egiten duten pertsona guztiei».

Alkateak herritarrak eta bisitariak uztailaren 25ean Ordizian izango den giroaz gozatzera ere gonbidatu ditu: «Ordiziako zaleei eta bisitariei eskerrak eman nahi dizkiet urtez urte proba hau babesten jarraitzeagatik. Zuen babesari esker, Ordiziako Klasikoak bere nortasunari eusten dio eta nazioarteko egutegian erreferente izaten jarraitzen du».

Gipuzkoako Foru Aldundiko Kirol zuzendari Roberto Ramajok azpimarratu du Ordiziako Klasikoa «esfortzuaren, konpromisoaren eta maitasunaren emaitza» dela. Bere hitzetan, 103 urteko ibilbidea izateak erakusten du proba honek duen balioa, eta Ordiziarentzat zein Gipuzkoa osoarentzat nazioarteko erakusleiho aparta dela.

Diario Vascoko erakunde harreman eta babesletzen arduradun Iosu Larrartek ere antolakuntzaren lana goraipatu du, lasterketaren atzean dagoen ahalegin kolektiboa nabarmenduz eta urte osoan lanean aritzen diren pertsona guztiak zorionduz.

Rural Kutxako ordezkari Ander Justok, berriz, erakundearen konpromisoa berretsi du: «Bi urte daramatzagu antolakuntzarekin elkarlanean, eta bide horretan jarraitzeko asmoa dugu. Txapel Gorrik eta boluntarioek ordezkatzen dituzten balioekin bat egiten dugu, eta horrek eman dio jarraipena lasterketa honi».

Aurkezpena ixteko, Ordiziako Klasikoko zuzendari Josean Etxezortuk aurtengo edizioaren xehetasun nagusiak eman ditu. Azaldu du iazko ibilbideari eutsiko zaiola eta txirrindulariek bost itzuli osatu beharko dituztela helmugara iritsi aurretik.

Era berean, parte-hartzearen maila nabarmendu du. Irteeran UCI WorldTeam, UCI ProTeam eta UCI Continental mailako taldeak izango dira, tartean UAE Team Emirates, Astana, Jayco AlUla, Movistar Team, Burgos BH, Caja Rural-Seguros RGA, Euskaltel-Euskadi eta Kern Pharma. Txirrindulari ezagunen artean izango dira, besteak beste, Jesús Herrada, Diego Ulissi, Jhonatan Narváez, Davide Formolo, Jon Barrenetxea, Fernando Barceló, Txomin Juaristi, Xabier Berasategi eta Jhonatan Lastra.

103 urteko historian zehar, Ordiziako Klasikoa Euskal Herriko txirrindularitza-proba entzutetsuenetako bat bihurtu da, eta nazioarteko egutegian bere tokia sendotzen jakin du. Aurten ere, Santa Ana jaien barruan, goi mailako kirola eta herri giro aparta uztartuko dira, uztailaren 25ean Ordizia berriro ere munduko txirrindularitzaren erdigune bihurtuz.