Plana herritarrekin batera sortu da, herriaren beharrei erantzuteko. Udalean ordezkaritza duten hiru alderdiek aho batez onartua izan da

Plan berri honekin batera lelo eta logo berria ere sortu dira: Arian-arian euskara abian

Ordiziako Udalak 2014-2018 epealdirako euskara plan berria aurkeztu du, ESEP izenekoa (Euskara Sustatzeko Ekintza Plana). ESEP egitura Eusko Jaurlaritzak eztabaida prozesu baten ondorioz adostutako eredua da. Ordiziako esparru guztietan euskararen erabilera indartzea da erronka nagusia. Plana herritarrekin batera sortu da, herritarren beharrei erantzuteko. Plana aho batez onartu zuten iazko abenduan Ordiziako Udalean ordezkaritza duten hiru alderdi politikoek. Plana gizarteratzeari begira liburuxka bat egin da, eta datozen egunetan banatuko da Ordiziako etxeetara.

ESEP PLANA (PDF)

Ordiziara igandetik astelehenerako gauean (00:24) iritsiko da Korrika Aramatik barrena

Gero eta gutxiago falta da 19. Korrika Ordiziara iristeko. Hilaren 22tik 23rako gauean, 00:24 inguruan, iritsiko da, eta Arama eta Ordiziaren arteko mugan dagoen Isuses industrialdean izango da hitzordua. Ordizian 25 talde, elkarte eta erakundek erosi dute Korrikaren kilometroa. Ordiziako Udalaren lekukoa San Jose egoitzako Arantxa Martin langileak hartuko du, udalak kontratatuko zerbitzuak euskalduntzeko bidean hartutako erabakiari bide emanez. 878. kilometroa izango da udalarena, eta Frai Andreseko estatuaren parean hartuko du lekukoa, bigarren itzulian.

19. Korrika. Goierriko ibilbidea eta ordutegia

Autobusetarako izen-ematea eta afarirako txartelak hilaren 16a arte egongo dira

19. Korrika martxoaren 22tik 23rako gauean pasako da Goierritik –Ordiziatik 00:23an– eta hainbat ekitaldi izango dira datozen egunetan Goierriko Korrika Kulturalaren barruan. Herrietako ekintzez gain, eskualde mailako Korrika afaria egingo da hilaren 18an Ordizian. Horri lotuta, 19. Korrikaren hasierara Urepelera (hilak 19) eta Bilbora bukaerara (hilak 29) joateko autobusen txartelak salgai daudela jakinarazi du Goierriko Goiztiri AEKk. Bi kasuetan hilaren 16an amaitzen da txartelak erosi eta izena emateko epea.

GOIZTIRI AEK EUSKALTEGIAREN BIDEOA
19. KORRIKAREN ABESTIA 

Korrika Laguntzaile egiteko deia egin die herritarrei, eta gogoratu du autobusak antolatu direla Korrikaren hasierara eta bukaerara joateko

Hilaren 18an elkarteen arteko sukaldaritza lehiaketa eta Goierri mailako afaria izango dira Ordizian

Goierriko Goiztiri AEK euskaltegiak 19. Korrikaren iritsiera girotzeko antolatu diren ekimen eta ekitaldiak aurkeztu ditu gaur Ordiziako euskaltegian. Herrietan sortu diren batzordeak kilometro salmenta egiten ari dira, eta Korrika Lagun Goierriko enpresa, taberna eta dendetan. Horrez gain, herritarrei Korrika Laguntzaile izateko deia egin diete, 12 euroren truke pina eta hainbat komertziotan erabil daitezkeen deskontu txartela eskuratzeko aukera emanez. Goierrin zehar egingo diren ekitaldien berri ere eman du AEK-k. Ordizian, esaterako, eskualde mailako sukaldaritza lehiaketa eta afaria egingo da martxoaren 18an. Ondoren, Igor Barrerosen kontzertua eta Amets Bideren dantza emanaldia izango dira.

EKIMEN ETA EKITALDIEI BURUZKO INFORMAZIO GUZTIA (PDF)