Euskaraz Bizi kanpainaren barruan, aurten ere euskara ikasteko edota maila hobetzeko ikastaroak doan eskainiko ditu Ordiziako Udalak.

Dirulaguntza hauek lortzeko, hainbat baldintza bete behar dira: Ordizian erroldatuta egotea, hamasei urte beteta izatea eta gutxienez %80ko asistentzia. Hala bada, matrikularen %100a ordainduko du udalak (beti ere, urteko gehienkoa 500 eurokoa izanda, 650 barnetegien kasuan).

Euskaltegien bidez ez ezik, lan mundutik ere bultzatu nahi da euskara ikastea. Hala, Ordizian erroldatuta egon gabe ere, egoitza Ordizian duten eta Euskara Plana martxan jarria duten lantegietako langileek ere lortu ahal izango dituzte laguntzak. Baita udalarekin euskara bultzatzeko hitzarmenen bat sinatua duten merkataritza establezimenduetako langileek edo kirol entrenatzaile eta begiraleek ere. Kasu horietan, matrikularen %85a itzuliko zaie ikasleei.

Euskaltegiak izen-emate kanpaina betean daude irailean, eta udaleko euskara sailetik, jendea animatu nahi dute. Goierrin dagoen euskaltegi sareak euskara ikasteko hainbat aukera eskaintzen ditu. Ordizian bertan, Goiztiri AEK euskaltegia dago; Beasainen, Udal Euskaltegia eta Goiztiri AEK; eta Lazkaon, Maizpide Euskaltegi-Barnetegia.

Euskara ikasten ari direnek, berriz, Mintzalaguna egitasmoaren bitartez ahozko euskara lagun giroan praktikatzeko aukera ere badute. Ekimen honetan parte hartzeko, Hitzaro Euskara Elkartera jo daiteke.

Informazio hau guztia jasotzen duten 400 eskuorri argitaratu ditu Udalak, eta egunotan banatuko ditu Ordiziako etxebizitzetan.

Lazkao Txiki Bertsopaper Lehiaketaren XXXIII. edizioa jokatu da aurten, Argi Berri Elkarteak antolatuta Ordiziako Udalarekin batera. Igandean egin zen sari banaketa, Barrena jauregian. Hauek izan dira sarituak maila desberdinetan:

GAZTETXOETAN (13 urte artekoak): 7 lan guztira

1. Narbarteko MAIALEN URTXEGI BIDEGAIN
2. Hernaniko EKAI LEGORBURU ETXEBESTE
3. Azkoitiko NORA ARRIZABALAGA ARRIETA

Oharra: maila honetan gaia denentzat berbera izan da: “olinpiar jokoak badatoz”.

GAZTEETAN (14-18 urte bitartekoak): 4 lan guztira

1.Desert
2.Bilboko MARA ORBE ALKALDE “babes ditzagun guztiak” lanagatik
3.Villabonako ARATZ ARZELUS ARANBURU “nahi dutenaren islada” lanagatik

HELDUETAN (18 urtetik gorakoak): 13 lan guztira

1.Hernaniko IÑIGO LEGORBURU ARREGI “irreal apolitik” lanagatik
2.Errenteriko JULIAN ALBISTUR ARANBURU “23. Korrika Euskal Herria ezagutuz” lanagatik
3.Hernaniko IÑIGO LEGORBURU ARREGI “hamarren bularra” lanagatik

Oharra: azken bi mailok gaia librea zuten.

Ordiziako Udalak harrera egin die gaur, asteazkena, Ateak Ireki egitasmoko partaideei. Adur Ezenarro alkatearekin elkartu dira udaletxeko batzar aretoan, eta ondoren, Ordiziako Azoka ezagutu ahal izan dute, alkateak berak gidatuta. Azokan erositako produktuekin, sukaldaritza arratsaldean berriz, sukaldaritza tailerra egingo dute Ane Otegirekin.

Ateak Ireki egitasmoaren helburua, AEBtako Euskal Komunitateko gazteek Goierriko familietan egonaldiak egin eta gure hizkuntza, ohiturak eta kultura bertatik bertara ezagutzea da, harremanak estutuz eta zubiak eraikiz.

Ekainaren 22an iritsi ziren 30 AEBtatik Goierrira, eta hiru asteko egonaldia egingo dute bertako familietan. Uztailaren 14an itzuliko dira jaioterrira; agurtu aurretik, ordea, larunbatean, Ordiziako plazan elkartuko dira partaideak eta haien familiak, elkarrekin bazkaltzeko.

Ordiziako udalekuetan izena eman duten haur guztiek plaza izango dute aurten. Izen ematea epez kanpo egin dutenak, berriz, itxarote zerrendan daude. Udalekuetan plaza lortu dutenei Ordiziako Udalak dagokien kuota kobratuko die ekainean. Plazari uko egin nahi bazaio, eskaera orria aurkeztu beharko da Ordiziako Udaleko Arreta bulegoan edo Udalaren egoitza elektronikoaren bitartez.

Zerrenda onartuak 2024