Prebentzio neurriak COVID-19aren brotearen harira

PCR probak egiten hasi dira COVID-19aren fokoarekin kontaktua izan duten ordiziarrei

Ordizia. COVID19

Asteburuan Osasun Sailak detektatutako COVID-19 fokoaren harira, gaur goizean, hilak 6, PCR probak egiten hasi dira Etxezarreta kaleko fokoarekin kontaktua izan duten herritarrei.

Larunbatean, Osasun Sailak konfirmatu zuen atzemandako pare bat positibori jarraipena egin ondoren, bertako taberna bat izan zitekeela COVID-19aren fokoaren sorrera. Hori jakin ostean, Ordiziako Udalak taberna hori ixtea erabaki zuen, eta atzo bertan PCR probak egin zitzaizkien Zumarragan. Emaitza positiboa izan zuten, eta ezarrita dauden neurriak segiz, foko hori agertu den alboan dauden hiru establezimendu ixtea erabaki zen prebentzio neurri moduan; nahiz eta oraingoz ez dagoen positiborik bertan. “Zuhurtziaz hartutako erabakia izan da hiru taberna hauek ixtea, horrek erakutsiko digu ea birusaren transmisioa egon den edo ez”, azaldu du Adur Ezenarro, Ordiziako alkateak.

Gaur goizean, Barrena Jauregiaren parean gune berezi bat sortu da PCR probak egiteko herritarrei. Aurrez hitzordua hartu behar izan dute, eta gaur arratsalde/iluntzean jakingo dira lehen emaitzak. Aurreikuspenei erreparatuz, 500-700 test egingo dira gaur; eta emaitza horiek zehaztuko dituzte Udaletik hartu beharreko ondorengo erabakiak. Emaitzak telefonoz jakinaraziko dituzte, izan positiboa edo negatiboa. Gogorarazten da, PCR proba egin dutenek etxean egon behar dutela emaitza jakin bitartean eta maskara erabiltzea beharrezkoa dela.

Alkateak arduraz jokatzeko eskatu du: “egoera hauetan lasaitasuna mantentzea beharrezkoa da, baina zuhurtziaz eta arduraz jokatu beharra daukagu. Badakigu zer den konfinamenduan egotea, ezin atera izatea, eta ez dugu inolaz ere atzera pausorik eman nahi. Orain testen emaitzak zehaztuko dute zeintzuk izango diren hartu beharreko erabakiak. Herritarrak babestea izan da orain arte gure helburua, eta orain ere horixe da. Beraz, herritarrei arduraz jokatzeko eskatzen diegu beste behin, osasun neurriak mantentzea funtsezkoa dela gogorarazten dizuet, eta ez dugu ahaztu behar hau ez dela amaitu”.

ERABAKIAK

Bide batez, Ordiziako Udalak antolatutako udalekuak bertan behera gelditzen dira oraingoz, frogen emaitzak jakin arte, eta modu seguru batean egin ahal direla bermatu arte. Majori Kiroldegiko udalekuak martxan daude, baina bertan behera gelditu dira saskibaloia, errugbia eta igeriketako entrenamenduak.

Udalekuak 2020: Oharra

udalekuak

Ordizian aztertzen ari den COVID19 fokuaren inguruan, Etxezarreta kaleko hainbat tabernetan ibili diren pertsonei probak egingo zaizkie. Horregatik, adierazi nahi dizuegu gaur hasiko diren udalekuetan leku horietan ibili diren monitoreak ez direla oraingoz hasiko PCR probak egin eta negatibo eman arte.

Faltako diren monitoreen taldeak berrantolatu beharko ditugun eta beraz aldaketak egongo dira.

Egoeraren arabera erabakiak hartzen joango gara pausoz pauso. Beraz, gaur eraman haurra dagokion elkargunera.

Barkatu eragozpenak baina jokatzea behartzen gaitu, kasu honetan haur guztien segurtasuna lehen lerroan jarriz.

Ordizian egon den COVID-19 fokoaren inguruan, Osasun Sailak bidalitako oharra

WhatsApp Image 2020 07 05 at 22.46.36Osasun Sailak lotura epidemiologiko posible bat identifikatu du azken egunotan PCR positiboa izan duten eta beren artean beste harremanik izan ez duten pertsonen artean. Lotura hori Ordiziako ostalaritza-eremu batean egon liteke, zehazki, Etxezarreta kalean.

Hori dela eta, zaintza eta kontrol sareak ondorengo pertsona hauekin harremanetan jarri nahi du, aurreneurri gisa, eikainaren 27tik (larunbata) aurrera:

  • Etxezarreta kalean dauden Sarri, Haka, Miami eta Kebab tabernetako langileekin.
  • Lokal horietako ohiko bezeroekin.
  • Sintomak dituzten pertsonekin.

Horiei guztiei Ordiziako Osasun Zentroarekin harremanetan jartzeko eskatzen zaie, 943 007 635 telefono-zenbakira deituta. Goizeko 8:00etan hitzordua emango zaie PCR bat egiteko. Ekainaren 27tik aurrera beste herri batean egon diren pertsonen kasuan, Osasun Kontseiluaren telefonora deitu behar dute: 900 20 30 50.

Positibo eman duten pertsonen kontaktu zuzenei Osasun Sailetik deitzen ari zaizkie zuzenean. Beraz, kontaktu zuzena izan ez dutenek bizitza normala egiten jarraitu dezakete.

Era berean, Osasun Sailak prebentzio-neurri ezagunak gogorarazi nahi dizkie herritar guztiei, eta, COVIDarekin bateragarriak diren sintomak izanez gero (sukarra, eztula edo arnasa hartzeko zailtasunak), beren etxeetan isolatu eta beren osasun-zentrora dei dezatela. Aldi berean, lasaitasun-mezu bat zabaldu nahi du, eta azpimarratu du horrelako neurriak prebentziozkoak baino ez direla, eta lehenbailehen detektatu nahi dute transmisio komunitario posible bat eta kutsatze berriak saihestu.