Ordiziako azoka ONCEko kupoietan

Ordiziako Azoka 'Este es tu mercado' ONCEko kupoi saileko protagonista izango da datorren asteartean, abenduaren 8an zozkatuko den kupoian. Azokaren irudia guztira 5,5 milioi kupoitan agertuko da.

Adur Ezenarro, Ordiziako alkateak, Juan Carlos Andueza ONCEren Euskadiko lurralde-ordezkariak eta Roberto Doval, Donostiako ONCEren Laguntza Zuzendaritzako zuzendariak kupoia ezagutarazi zuten Azokan bertan burutu zen prentsaurrekoan.

52 kupoik osatzen duten 'Este es tu mercado' kupoi saila udal merkatuei egindako omenaldia da; herri eta hirietako gune enblematikoak agertzen dira, eta herritarren egunerokotasunaren, ohituren, gastronomiaren eta ONCEko saltzaileek ere parte hartzen duten lekuen lekuko dira.

Kupoi horiek hilabete bakoitzeko astebetez saltzen dituzte, eta Eguneroko zozketetakoak dira (astelehenetik ostegunera), eta, harekin batera, kupoia udal merkatuen erakusleihoa izatea nahi du ONCE Gizarte Taldeak.

Asteazkenero 1512 geroztik


Ordiziako azoka Udaletxearen aurrean dago, eta gune irekia eta, batez ere, zutabe bikainak ditu. Kroniken arabera, Erdi Aroan merkataritza-jarduera zegoen San Bartolome ermitatik gertu. 1512ko martxoaren 8an sute suntsitzaile batek herria kaltetu zuen, etxe bat eta eliza bat bakarrik geratu zirelarik zutik. Gaztelako Joana I.a erreginak asteazkenero zergarik gabeko merkatu franko bat egiteko ahalmena eman zion herriari. Merkatua batez ere XVIII. mendean finkatu zen, eta 1860an trenaren etorrerak areagotu zuen bultzada.


Azokak produktu ezberdinak eskaintzen ditu, eskualdeko eta inguruko baserrietakoak. Ia berrogeita hamar postu, hamaika generorekin: kalabazak, sagarrak, tomateak, tipulak, zerbak, intxaurrak, endrinak, letxugak, niskaloak eta onddoak, besteak beste. Produktu landuak, hala nola marmelada biologikoak, arto-opilak, ogia, irasagarra eta ardi-, behi- eta ahuntz-gaztak. Euskal produktu tipikoak, hala nola Tolosako babarrunak, Gernikako piperrak, euskal pastela, sagardoa edo txakolina eta, Idiazabal gazta, arkumea edo loreak ere.


Aparteko merkatuak ere, aldi berean, benetako erreferentea dira. Irailaren 9ko Arantzazuko Ama Birjinaren jaiegunetik gertuen dagoen asteazkenean, azoka berezia egiten da, fruta eta barazki lehiaketa, behi azienda lehiaketa, produktuen erakusketak eta plater nagusia antolatuz: artzainek egindako gazta lehiaketa eta enkantea, ardi latxaren edo karrantzarraren esne gordinarekin, Idiazabal Gaztaren Kofradiak antolatua. Eta apirilean Artzain Eguna edo Artzai Eguna izaten da. Bertan, parke naturaletara igotzen diren artaldeak igarotzen dira, eta denboraldiko lehen gaztaren dastaketa eta Idiazabal gazta berriaren aurkezpena ere egiten dira.

ONCEren Eguneroko Kupoiak 35.000 euroko 55 sari eskaintzen ditu, 1,5 euroren truke. Gainera, bezeroak aukera du, 0,5 euro gehiago ordainduta, seriea ere jolasteko, eta 3.000 euroko "paga" irabazteko, 25 urtez hilero, 35.000 euroko sariari gehituko zaiona.

2020 urtean, ONCEk 9 milioi euro banatu ditu sarietan Euskal Erkidegoko hainbat lekutan. Aurten ONCEko agente saltzaileek etenaldian utzi zuten beren jarduera, pandemiagatik konfinatuta zeudelako. Gaur egun, jarduerak aurrera jarraitzen du urtarrilaren 1eko Gabonetako Zozketa Bereziaren atarian.

ONCEko kupoiak ONCEko 20.000 agente saltzailek saltzen dituzte. Gainera, www.juegosonce.es webgunetik eros daitezke, baita baimendutako establezimendu laguntzaileetan ere.

Udalak ez-ohiko hobariak onartu ditu ostalaritza establezimendu eta azokako postuentzat

Udal Gobernuaren proposamena izan da %75eko ez-ohiko hobaria ematea establezimendu hauei, eta 100%koa azokako postuei

Udaberriko alarma egoeraren ostean, udazkenean alarma egoera berri bat etorri da, eta horrek ostalaritza establezimenduen itxiera ekarri du alde batetik, eta baita udalerrien arteko mugikortasuna galaraztea. Horregatik, Ordiziako Udalak, Udal Gobernuaren proposamena aho batez onartu du: ekainean onartu zituen hobariak handitzea; ostalaritzari dagokion hondakinen bilketa tasari dagokionean, eta baita ere, azokako postuei dagokien lurzoru publikoaren erabileragatik ordaintzen den tasari dagokionean.

“Badakigu egoera zaila dela, eta establezimenduek itxi behar izateak eragin zuzena izan duela haien diru-sarreretan. Horregatik, hirugarren sektorearekin bilerak egin ostean, lanean aritu gara zein laguntza martxan jarri aztertzeko. Ordenantza fiskaletako hobariak izango dira horiek, dagoeneko abian jarri ditugun laguntza zuzenez gain”, azaldu du Adur Ezenarro, Ordiziako alkateak.

Proposatzen diren aldaketak bi alderdi ezberdinetan eragingo dute: 6. eta 7. Ordenantzetan arautzen diren tasetan ez-ohiko hobariak.

Udalak Finantzatzeko Foru Funtsagatik 2020an egin beharreko konturako ordainketak aldatzen dituen eta toki-erakundeentzako aurrekontu eta zerga arloko hainbat neurri ezartzen dituen maiatzaren 12ko 3/2020 Foru Dekretu-Arauaren 3. Artikuluan ezarritakoaren arabera “2020an, toki-erakundeek aparteko hobariak onartu ahal izango dituzte Gipuzkoako Toki Ogasunak arautzen dituen uztailaren 5eko 11/1989 Foru Arauaren udal-tasen zenbatekoaren gainean. Hobari horiek Covid-19 gaitzaren osasun-krisiak eragindakoak izan beharko dira, eta krisi horrek bereziki kaltetutako kolektiboei aplikatu ahal izango zaizkie, 2020ko urtarrilaren 1eko atzera-eraginkortasunarekin. Honenbestez, eta 2020ko azaroaren 16an ospatu zen Antolaketarako Batzorde Informatiboarekin diktamenarekin, honakoa da erabakitzera daramagun.

Honakoa da akordio proposamena:

Maiatzaren 12ko 3 /2020 Foru Dekretu-Arauean ezarritakoaren arabera honako ez-ohiko hobariak onartzea tasetan:

  • Zerbitzu publikoak eta administrazio-jarduerak emateagatiko tasak arautzen dituen 6. ordenantzan xedapen gehigarri bat sartzea, honela idatzita:

"Xedapen gehigarria: COVID-19ren ondorioak arintzeko eta 2020ko ekitaldirako soilik, % 75eko ez-ohiko hobaria emango zaie alarma-egoera deklaratzeagatik itxita egon diren ostalaritza establezimenduei eta elkarte gastronomikoei urteko hondakinen bilketari dagokion tasan. Aipatu ez-ohiko hobariak 2020ko urtarrilak 1eko atzera-eraginkortasuna izango du".

Jatetxeak, erretegiak, sagardotegiak, antzekoak epigrafea ez aintzat hartzea 2020ko ekitaldian, eta epigrafe horretako establezimenduei tabernak sukaldearekin epigrafea aplikatzea, COVID19ak eragindako segurtasun baldintzek ezinezkoa egin dutelako jatetxeen ohiko jarduera.

  • Udal jabari publikoaren erabilera pribatibo edo probetxamendu bereziagatik ordaindu beharreko tasak arautzen dituen 7 ordenantza fiskalean xedapen gehigarri bat sartzea, honela idatzita.

“Xedapen gehigarria: COVID-19ren ondorioak arintzeko eta 2020ko ekitaldirako soilik, ez-ohiko hobaria emango zaie:

  • Asteroko azokan postua izateagatik postuei bigarren, hirugarren eta laugarren hiruhilekoetan %100eko hobaria.

Ordenantza jendaurrera jarri Iragarki-Taulan eta Gipuzkoako Aldizkari Ofizialean 30 egunetan, eta Korporazioak erabakiko dituen erreklamazio eta iradokizunetarako interesa dutenei aukera eman. Erreklamaziorik ez balego, behin betirako onartutzat joko da Ordenantza, erabaki gehiago beharrik gabe.

Karpak ezarri ditu Ordiziako Udalak herriko ikastetxeetan

Ikasturte guztian zehar egongo dira jarrita eta bertan ekintzak egitea ahalbidetuko die

Ordiziako Udalak herriko bi ikastetxeetan, Jakintza Ikastolan eta Urdaneta Eskola Publikoan karpa bana jarri ditu, neguaz babestu eta bertan ekintzak egitea ahalbidetuz. Bi kasuetan eskolako patioan kokatu dira, eta dagoeneko ari dira erabiltzen.

Eskola bakoitzeko espaziora egokitu dira karpak, guneak ahalbidetzen duenaren arabera. Hala, Jakintzaren kasuan, karpak 20x10 metroko dimentsioa du, 200 metro karratu babestuz euriaz, haizeaz, eta bestelakoez. Urdanetari dagokionez, bestalde, 25x10 metroko dimentsioa hartzen du karpak, eta 250 metro karratu hartzen ditu.

“Garrantzitsua da Udalak dituen baliabideak herritarren eskura jartzea, eta, batez ere, egungo egoera kontuan hartuz, elkarlana bultzatzea”, zehaztu du Ainhoa Jimenez, Hezkuntza zinegotziak. Hala gaineratu du: “osasun krisi honetan garrantzitsua da haurrak erdigunean jartzea, beraien beharrak identifikatzea eta horiei erantzuna ematea. Haurtzaroari modu zuzenean eragin dio pandemiak, eta ikastetxeekin komunikazio zuzena izan dugu sortzen ziren beharrei aurre egiteko”.

Igande honetan Astronomia Gaua egingo da Oiangun

Azaroaren 22an Astronomia gaua antolatuko da Oiangun. Ordiziako Udalak eta Aranzadi Zientzia Elkarteak antolatzen dute 7. urtez segidan. Herrian arrakasta handiko ekintza da, non haur, gazte eta helduak hurbiltzen diren zeruko eta unibertsoaren inguruko jakinminak asetzera.

Bi saio antolatu dira eta egungo egoerari egokitutako segurtasun neurriak bermatuko dira. Egoera meteorologikoak laguntzen ez badu, bi saioak bertan behera geratuko dira.

17.30-18.30. Unibertsoaren sorreraren aurkezpena. 6-12 urte.

Aurkezpen honek, modu erakargarri eta gertukoan Big Bangaren teoria azaltzea du. Unibertsoan, ez argirik eta ezta berorik ere zegoen garaietara eramango gaitu eta, pixkanaka, salto erraldoiak emanez gure planetaren sorreraraino iritsiko gara. Milioika urte ordu batean azaltzea ez da lan samurra, baina hainbat esperimentu eta adibide sinpleekin ezezagunak diren kontzeptu eta egoerak ulertzen ahaleginduko gara. 

Aurkezpen honen sortzailea Maria Montessori pedagoga izan zen eta denborak aurrera egin ahala hainbat aldaketa jasan dituen arren bere xarma guztia darama hasieratik amaierara. 

Aurkezpenean astronomia, geologia, eta beste hainbat gaiei buruzko zertzeladak emango dira. Horietan sakontzea zaila izango den arren azaltzen diren interesak etxean asetzea gomendatzen dugu. 

Edukiera: 10 pertsona

Gonbidapena beharrezkoa da.

Partehartzaileek gonbidapena bibe.me plataformaren bitartez lortu dezakete.

19.00-21.00. Behaketa astronomikoa.

Aranzadiko Astronomia saileko kideek gau honetako zerua proiektatuko dute pantaila batean. Honi esker zeruko elementu ezberdinak ikusi ahal izango ditugu: izarrak eta konstelazioak, Ilargiaren kraterrak, Jupiterren sateliteak, Marteko gainazala, Saturnoren eraztuna eta beste zeruko elementu batzuk. Azken hau eguzkiaren argia desagertzearekin batera hasiko da, gaueko 19.00etan hain zuzen ere.

Edukiera: 20 pertsona

Gonbidapena beharrezkoa da.

Partehartzaileek gonbidapena bibe.me plataformaren bitartez lortu dezakete.