Haurrik ez jostailu gabe Gabonetan Ordizian

Aste honetan Ordiziako Udalak antolatutako jostailu bilketa burutu da. Gabonetara begira, haur ordiziarrak jostailu gabe ez gelditzeko egitasmoa izan da, eta, bide batez, etxean gordeta dauden eta erabiltzen ez diren jostailuei bigarren aukera bat ematea.

Jakintzan eta Urdanetan egin dira bilketak, eta erantzun izugarri ona izan du, ehunka jostailu bildu baitira.

Udalak herritarren jarrera eskertu du, asko izan direlako etxean gordeta zeuzkaten jostailuak eraman dituztenak. Horrez gain, jostailu bilketan lagundu duten guztienen jarrera ere eskertu nahi izan du; besteak beste, Guraso Elkarteak, Lagunkiroko kideak, eta bilketan parte hartu duten guztiak.

Pirritx, Porrotx eta Marimototsen emanaldiak

Lehenik eta behin barkamena eskatzen dugu larunbatean Pirritx, Porrotx eta Marimotots-en emanaldirako sarreren salmentarekin egon zen arazoarengatik. Zerbitzariak ezin izan zion erabiltzaile kopuru handiari, une berean, erantzuna eman. Igandean zehar arazoari konponbidea eman nahian aritu ondoren, azkenean erabaki dugu zuzenena eta guztiontzako justuena sarrerak anulatzea izango dela. Guztioi beraz, dirua itzuli egingo zaizue. Pazientzia pixka bat eskatzen dizuegu, posible delako itzulketa berehalakoa ez izatea.

Emanaldiari dagokionez, izan duen erantzuna ikusita, abenduaren 20an, igandean, bi emanaldi eskaintzea erabaki dugu, 16:00etan eta 18:30etan. Sarrerak oraingoan, era presentzialean salduko dira; pertsonako gehienez ere 10. Gogoratu gradatan banakako sarrerak izango dira eta kantxakoak familia unitatekoak:
- NON: Ordiziako Beti Alai pilotalekuan
- NOIZ: abenduaren 16an (asteazkena) eta 17an (osteguna).
- ORDUA: 17:00etatik 20:00etara.


Eskertuko genuke sarreren kostuaren diru kopuru zehatza eramatea.

AMAREN INTXAURRAK ikuskizuna: Heriotzaren gaia lantzeko proposamena

NONDIK GATOZ… Pirritx, Porrotx eta Marimotots pailazo taldea heriotzaren gaia lantzen ari da. Familia eredu anitzez, kultura aniztasunaz, hezkidetzaz, bizikidetzaz, inklusioaz, naturaz, gaixotasunaz, … irri, kantu, dantza eta jolas, bizitzaz aritu dira ibilbide luzean sudur-gorriak, bizitzaren parte baitira horiek guztiak, egunero partekatzen ditugunak eta eragiten digutenak. Oraingoan, aldiz, bizitzaren parte den heriotzaz jardun asmo dute. Arrazoia argia da, heriotza ere presente dago gure egunerokotasunean.

Antzezle / ikusle dikotomia hausten saiatu dira pailazoak sorreratik bertatik. Antzezlana amaitu, oholtzatik jaitsi eta muxu, besarkada, hitz goxo edota argazki forman bertaratutakoen etxeetara iritsi dira, lagunen lagun bilakatuz. Eta lagunen artean pozak bakarrik ez, tristurak ere partekatzen dira, goxoagoak direlako beti horrela. Sortutako harreman berezi bezain estu horietan eragina izan du, baita ere, haurren beharrak eta eskubideak bermatze aldera lanean ari diren elkarte ezberdinekin duten “eman-hartuak”.

Tristurak, pozak bezala, askotarikoak izan daitezke eta heriotza horietako bat da. Haurren aiton amonak hiltzen dira, baita gurasoak ere. Senideak, lagunak, herriko ezagunak, traturik izan gabe gure paisaia emozionalaren parte sentitzen ditugunak... Haurrak ere hiltzen dira tarteka, eta pailazoek ere negar egin dute halakoetan. Senide eta lagunengandik gertu egoten saiatu dira eta haien sudur gorrien maitasuna eta berotasuna eskaini eta partekatu dute, agur esatean eta doluan galera hori bizi duten pertsonen beharrak eta denborak zainduz eta errespetatuz.

NORA GOAZ… Gure gizartean, ohikoak izan dira zuri beltzezko agurrak. Aitzitik, beste era batekoak, bizi izan garen modukoak izan daitezke. Pailazoek agur ezberdinetan parte hartu dute senide eta lagunekin batera: batzuetan globoak askatu dituzte airera, etxe luzez inguratutako porlanezko plazatxo batetan, haurraren arratsalderoko jolaslekua izandakoan. Eskolatan ere izan dira, hezkuntza komunitatea osatzen duten partaideekin marrazkiak, bizipenak eta sentimenduak partekatuz. Herriko parke kuttunean arbola landatu izan dute bizilagunekin batera. Itsasertzeko txoko kuttunean esan diote agur lagunari, baita mendi puntan ere… Norberaren izaerak, zaletasunak eta gogoak kontuan hartuz ospatu dituzte agurrak, askotan kantu eta dantza artean, eta beti muxuz, besarkadaz eta hitz goxoz lagunduta.

Covid 19a geure bizitzetara iritsi den honetan askok eta askok bakardadean bizi izan dute familia arteko edo lagun baten heriotza. Inoiz baino gehiago agerian geratu da heriotzaren aurreko eta ondorengo momentuetan duintasunez laguntzeak eta agurtzeak berebiziko garrantzia dutela. Hutsunea sentitu dugu herri bezala, eta hutsune hau nabarmena da egunerokotasunean ere. Askotan ez baitakigu heriotzaren errealitatea nola ulertu, onartu, partekatu…

Bizitzaren parte dira jaiotza eta heriotza, biak. Jaiotzaren inguruko ezagutza zabaltzen joan den moduan, heriotzaren inguruko ezagutza ere zabaldu egin behar da gizartean, bizia osotasunean bizi ahal izateko.

Gai honi Katxiporretak Hil Argi Elkartearekin eta Hik Hasi pedagogia taldeko lagunekin elkarlanean bere ekarpen xumea eskaini nahi dio, apaltasunetik. Proposamena orokorra da, tokian tokira eta unean uneko egoerara egokitu behar dena.

 

 

Jostailu bilketa egingo da bihar eta etzi

Ordiziako Udalak jostailu bilketa antolatu du Gabonetara begira. “Gabonetan, haurrik ez jostailurik gabe Ordizian”, azaldu du Maitane Alvarez alkateordeak.

Hala, bi saio egingo dira. Lehena bihar izango da, asteartea, 16:00etatik 17:30etara, Urdanetako karpan. Asteazkenean, abenduak 16, Jakintzan, Villa Eugeniako karpan egingo dira, ordutegi berean. Karpa hauek Udalak bideratu dizkie eskolei neguan babesa izan dezaten.

Hala, eskaera egiten zaie herritarrei, erabiltzen ez diren eta egoera onean dauden jostailuak izanez gero, bigarren aukera bat eman eta jostailuak eramateko bi egunetako batean. Horiek beharra duten familiei bideratuko zaizkie, Gabonetan haur guztiek izan dezaten jostailuren bat.

'Ordizia Zabalik' programa, merkataritza biziberritzeko

Hutsik dauden lokal komertzialak berreskuratzea da helburu, belaunaldi aldaketa, negozio berriztatzaile eta ekintzaileen bitartez

Ordizia Zabalik laguntzaren zazpigarren deialdiaren bitartez herriko merkataritza biziberritzen jarraitzeko asmoz 27.500€ko aurrekontua bideratu du aurten Ordiziako Udalak

Ordiziako Udalak 'Ordizia Zabalik' laguntza programaren deialdi berria ezagutzera eman du, belaunaldien arteko erreleboa, negozio berritzaileak eta ekintzaileei orokorrean zuzendutako laguntza programa. Programa honen helburua merkataritza lokal hutsak berreskuratzea da, pertsona ekintzaileen bidez, eta baita belaunaldi txikietan belaunaldien arteko errelebuari erantzuna ematea ere.

Maitane Alvarez Sustapen eta Garapenako zinegotzia eta alkateordea, eta Aitor Velázquez, Merkataritzako teknikaria, izan dira gaur “Ordizia Zabalik” laguntza programa aurkezpenaren arduradunak.

PERCOk, Ordiziako Merkataritza Eraberritze Plan Bereziak, jasotzen duen jarduketa-ildoetako bat zen Ordiziako merkataritza eta ekonomia suspertzea, Ordiziako merkataritza eta ekonomia biziberritu egiten zituena, merkataritza-lokalei erabilera berriak emanez; eta proiektu hori abian jartzearekin batera, Ordiziako merkataritza eta ekonomia biziberritu egin ziren, eta, horri esker, merkataritza-lokalei erabilera berriak eman zitzaizkien, eta, ondoren, horri jarraipena eman zaio oraingo zazpigarren deialdira iritsiz.

Aurreko sei deialdietan, guztira 42 ekintzaile izan dira laguntza-programan, eta ekintzaileen jarraipena %75etik gorakoa izan da (laguntza jaso dutenetik hamar bakarrik geratu dira bidean eta beste 32 negozioek aurrera egiteko aukera izan dute), oraingo honetan aurrekontua bost-zazpi eskaera berriei erantzuna emateko baliagarria izango delarik. Oraingo deialdia Gipuzkoako Aldizkari Ofizialean azaroaren 25ean argitaratu zen, eta eskaera egin nahi dutenek, beren proiektua balioesteko eta adjudikazioduna izateko, abenduaren 10eko epemuga dute, dagokion dokumentazioa aurkezteko.

'Ordizia Zabalik' hiru norabidetan landutako proiektua da. Batetik, herrian ez dauden negozio berritzaileak erakarri nahi dira ekintzaile berrien bitartez. Bigarrenik, herriko gune desberdinetako beharrak asebete nahi dira, eta hirugarren eta azkenik, belaunaldi aldaketari erantzun bat eman nahi zaio.

Beraz, Ordiziako Udalak 27.500 euroko diru partida bideratu du urte honetarako, eta diru kopuru hori ekintzaileei lokalaren alokairuaren zati bat ordaintzen laguntzeko erabiliko da baita lokala erosketaren kasuan katastro-balioaren %4an laguntzeko, gehienez 3.000€. Alokairuaren kasuan, laguntza hori gehienez ere bi urtez jaso ahal izango da, 2020ko urtarriletik atzeraeraginezko izaerarekin: lehenengoan, Udalak %40 finantzatuko du (300 euro gehienez hilean) eta bigarrenean %25 (hilean 200 euro gehienez).

Ordiziako merkataritza-dentsitatea azpimarratzekoa izanik, 200 bat establezimendu 10.000 biztanle baino gehiagorako, Udalak lehiakortasuna indartu nahi du eta udalerriko merkataritza-sektorea osatzen duten saltokien, zerbitzu-enpresen eta ostalaritza-establezimenduen jarraipena bermatu.

Bete beharreko baldintzak: Ordiziako lokal komertzial batean jarduera ekonomiko bat hasteko interesa duen edozein pertsona fisiko edo juridikori zuzenduta dago, bizilekua edozein dela ere.

Hutsik dauden merkataritza-lokaletan jar daitezkeen jarduerak honako hauek dira: txikizkako merkataritza, elikagaigintza-sektorea, pertsonei zuzendutako zerbitzu-enpresak, interesekotzat jotzen den beste edozein eta zona komertzialaren biziberritzeko ekarpenarekin koherentea dena, betiere merkataritza-jarduera badago.

Lokal huts bat berreskuratzeko eskatzen duten ekintzaileek honako baldintza hauek bete behar dituzte: negozio proiektu bideragarri bat izatea, eta proiektu berriaren xede den lokalaren jabeak proiektu honetan parte hartzeko eskaera-inprimakia aurkeztu izana, proiektu horretan parte hartzeko eskabide-orria, ekintzailearen curriculuma eta jardueraren memoria-proiektua edo bideragarritasun plana, hain zuzen ere.

Pertsona ekintzaileentzat eta hutsik dauden lokalen jabeentzat izena emateko bidea Ordiziako Udaleko Herritarren Arretarako Bulegoan inprimaki bat betetzea da. Programaren inprimakiak eta oinarriak Udalaren web orrian (www.ordizia.eus) eta Herritarren Arretarako Bulegoan kontsultatu ahal izango dira. Oinarri arautzaileetan jasotako epaimahai kalifikatzailea izango da laguntzak esleitzeko eskumena duen organoa.

Informazio gehiago jasotzeko:

-Udal web orria: www. ordizia.eus

-Merkataritzako helbide elektronikoa Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

-Telefono zenbakia 639513495