Antzerki Garaia urtarrilaren 10ean hasiko da

Antzerki Garaia. Beasain. Ordizia

Urtarrilaren 10ean hasiko da Beasaingo eta Ordiziako Udalak elkarlanean antolatzen duten Antzerki Garaia zikloa. Beasainen hasi eta, apirilaren 24an Ordizian bukatuko da. Guztira, zortzi antzezlan eta hamar funtzio programatu dituzte; Moko zorrotza eta Simplicissimus antzezlanak euskarazko eta gaztelaniazko bertsioan eskainiko baitituzte. Bi emanaldiak Beasainen izango dira, 20:00etan eta 22:15ean. Hamar funtzioetatik 7 euskaraz izango dira, eta gainontzeko 3ak, gazteleraz.

PROGRAMA

  • Urtarrilaren 10ean. Beasainen, 22:15ean, Utzi zure mezua seinalearen ondoren (Tanttaka Teatroa). Euskaraz.
  • Urtarrilaren 16an. Ordizian, 22:15ean, El gran crucero (La Pescaderia Ambulante). Gaztelaniaz.
  • Otsailaren 14an. Ordizian, 22:15ean, Giltzadun etxea (Tanttaka Teatroa). Euskaraz.
  • Otsailaren 21. Beasainen, (Tantaka) Moko zorrotza, 20:00etan, euskaraz; Mandibula afilada, 22:15ean, gaztelaniaz.
  • Martxoaren 6an. Ordizian, 22:15ean, Ene Ba!! (Ados Teatroa). Euskaraz.
  • Martxoaren 13an. Beasainen, 22:15ean, Igel Euria (Ados Teatroa). Euskaraz.
  • Apirilaren 4an. Beasainen, Simplicissimus (Tartean Teatro), 20:00etan, gaztelaniaz eta 22:15ean, euskaraz.
  • Apirilaren 24an. Ordizian, 22:15-ean, Harri orri har (Pez Limbo). Euskaraz.

SARRERAK

Urtarrilaren 7ra bitartean eros daiteke zortzi saioetarako abonua, 72 euroan. Emanaldi bikoitza den kasuetarako, euskarazko saiorako gordeko zaie lekua abonua dutenei. Aldatu nahi izanez gero, dagokion aretoarekin jarri beharko dira harremanetan, gutxienez zazpi egun lehenago. Sarrera arruntak 12 euro balio du, baina 10 sarrera baino gehiago eskuratu nahi dituzten taldeek merkeago izango dute, 10 euroan. 

Bi antzokietako leihatiletan eros daitezke abonuak eta sarrerak; baita Ordiziako Barrena Jauregian ere. Taldeko sarrerak lortzeko dagokion Udaleko sailean aldez aurretik jakinarazi beharko da.

Ordiziako Lasa Harategiak irabazi du Euskal Herriko txistorra lehiaketa

IMG 20191218 WA0006

Gipuzkoako Merkatarien Federazioko Harakin elkarteak, Ordiziako Udalarekin batera eta txerri-harakin eta harakin gremioaren laguntzarekin, Euskal Herriko XXII. Txistorra Lehiaketa antolatu du Ordizian gaur, Udaletxeko arkupetan, goizeko 10:30etatik aurrera.

Kontsumitzaileen arreta bertako ohiko hainbat produktuetara bideratu nahi da Santo Tomas jaiaren atarian, hala nola, txistorra. Usadio zaharraren arabera egiten den produktuetako bat da, eta hori, zalantzarik gabe, garantiaz eta kalitateaz hitz egitea da. Aurten 53 partaide izan dira; gehienak Gipuzkoatik, nafar batzuk, arabar bat eta aurtengoan bi bizkaitar ere bai.

Lehen saria Ordiziako Lasa Harategiarentzako izan da, 134,50 puntu lortuta. Bigarrena, Eibarko Mujika Harategiak eskuratu du (117,70 puntu), eta podiuma Elorrioko Patxi Aramberrik osatu du (115,50 puntu). Laugarren postua Dimako Zuazu Harategiarentzak lortu du (111,50 puntu) eta Ataungo Erauskin Harategia bosgarren gelditu da, 110,50 punturekin.

a6c2eb0f e250 40b6 a822 db0a660889bb

Nazioarteko Korto Lehiaketako sarituak

Ordizia. Nazioarteko Korto Lehiaketa

 

Nazioarteko Korto Lehiaketa martxan egon da hilabete hauetan, eta asteburuan banatu dira bertako sariak. Kortorik onena Italiara joan da, Love is Love izeneko ikus-entzunezkoak jaso du 1.000 euroko ordainsaria. Lan honen zuzendaria Alessia Pischedda da. Publikoaren saria, berriz, Espainiako Down To Earth ekoizpenak jaso du, Cecs Noguerasen zuzendaritzapean, eta 300 euroko saria eskuratu dute. Goierriko egilea duen korto onenaren saria, berriz, Oianguren Institutuko Terapistak antzerki taldeak eskuratu du, Ausarta lanarekin eta 300 euro irabazi dituzte.

Aurtengoan, 165 korto jaso dira munduko 24 herrialdetatik: Thailandia, Taiwan, Frantzia, Belgika, Canada, Estatu Batuak, Mexiko, Venezuela, Angola, Senegal eta Australia, besteak beste. Ikuskapen komisio batek, 165 korto horietatik 15 korto hautatu ditu eta, ondoren, parte hartze prozesu bat eraman da aurrera eta Ordiziako 400 herritarrek eta hainbat eragilek, 11 korto onenak finalera pasatzeko aukeratu dituzte.

Azkenik, artea eta ikus entzunezkoen profesionalez (Teresa Calo, Asier Zinkunegi, Maider Bartolome) eta udal ordezkariez (Iñaki Hidalgo kultur teknikaria eta Lander Mujika udal zinegotzia) osaturiko epai mahai batek, eta publikoak irabazleak hautatu ditu.

Euskal Herriko txistorra lehiaketa, asteazkenean

887D9146 962E 4A24 AE3D D70C4DC3C4E6

Gipuzkoako Merkatarien Federazioko Harakin elkarteak, Ordiziako Udalarekin batera eta txerri-harakin eta harakin gremioaren laguntzarekin, Euskal Herriko XXII. Txistor-Lehiaketa  antolatu du Ordizian datorren asteazkenean, abenduak 18.  Plaza Nagusian, Udaletxeko arkupetan izango da, 10.30etatik aurrera. Kontsumitzaileen arreta bertako ohiko hainbat produktuetara bideratu nahi da Santo Tomas jaiaren atarian, hala nola, txistorra. Usadio zaharraren arabera egiten den produktuetako bat da, eta hori, zalantzarik gabe, garantiaz eta kalitateaz hitz egitea da. Aurten 50 partehartzaileen muga gainditu dugu, gehienak Gipuzkoatik, Nafar batzuk , Arabar bat eta aurtengoan bi Bizkaitar ere bai. 

Adituek esaten dutenaren arabera, txistorra ona izateko honako ezaugarriei  erreparatu behar zaie: neurria eta homogeneoa izatea, gustua, txikitua, giharra eta koipea erdibana, ontze-puntua, etab. Epaimahaikoek  lehenik eta behin produktu freskoak duen itxurari begiratuko diote: betetzerakoan berdina izatea, eskuz lotutakoa izatea, hestea, lodiera, eta abar. Ondoren, gordinik dagoela, txistorra ebaki eta giharra eta koipearen proportzioari erreparatuko  diote, baita haragiaren txikitzeari ere, eta, azkenik, zartaginean frijitu eta duen zaporea, usaina eta ahogozoa hartuko dituzte kontutan.

Hiru atal horietan lortutako puntuekin jakingo dugu zein izango den Euskal Herrikohogeitabigarren txapelketan garaile, eta hori egiaztatuko duen Txapela, garaikurra eta diploma jasoko ditu. Bigarren eta hirugarren sarituek garaikurra eta diploma jasoko dute eta epaimahaiak, gainera, beste bi diploma emango ditu.

Epaimahaia ondorengoek osatuko dute: Imanol Gaztañaga (Zubibi Jatetxea, Ordizia), Amaia Blazquez (Tximista Sagardotegia, Ordizia), Sonia Tapia (Fronton Jatetxea, Tolosa), Xabier Zabaleta (Jakitea Elkartea), Juanma Garmendia (Kattalin erretegia, Beasain), Rebeca Barainca (Galerna Jatetxea, Donostia), Jose Juan Castillo (Sukaldaria), Ramon Roteta (Sukaldaria), Jesus Mari Deba (Odolkigilea, Ezkio), Laura Tamayo (Basque Culinary Center-eko irakaslea), Aitor Buendia (Radio Euskadiko “La Ruta Slow” programako aurkezlea), Tere Madinabeitia (Goierriko Hitza / Diario Vasco).

Txapelketa-mota horiekin bertakoak diren produktuen aldeko arreta piztu nahi da, eta, aldi berean, kontsumitzaileek estimatzen duten kalitateko produktuak eginaraztea artisauei.

Txerri-hilketarekin lotzen da txistorra, eta oso erro sendoak ditu Euskal Herrian eta  Gipuzkoan batez ere, San Tomas eguna txistorraren eta txerriaren inguruan ospatzen baita. Usadioko txerri-hilketan gizonezkoen lana zen txerria hiltzea eta emakumezkoena berriz, gainerakoa, esate baterako, odolkiak, lukainkak...egitea, horretarako giharra txikitu eta gatza, piperbeltza eta abar botatzen zioten. Txistorra egiteko txerri-haragia eta urdaia behar da, gatza, baratxuria eta piperrautsa. Hori dena, ardi edo arkume-hestean sartu eta egurasten uzten da egun batzutan.