WU-SHU ERAKUSTALDIA LARUNBATEAN PLAZA NAGUSIAN

2015 04 23 wushuSaioa 18:30ean hasiko da, eta ordubete inguru iraungo du

Larunbat honetan, hilak 25, Wu-shu erakustaldi bat egingo da Ordiziako Plaza Nagusian. Wu-shua arte martzial txinatarra da, eta etziko saioan modalitate ezberdinak bertatik bertara ikusteko aukera izango da: 'Lehoiaren dantza', formak (armekin eta armarik gabe egindako mugimenduak), borrokaldiak, akrobazioak eta jauziak, besteak beste. Erakustaldia 18:30ean hasiko da, ordubete inguru iraungo du eta 15-20 lagunek hartuko dute parte. Saio hau Udaberrian Martxan egitarauaren barruan dago, eta Beasaingo Lorea gimnasioak eta Eibarko Ttatt ginmasioak antolatu dute Ordiziako Udalaren babesarekin.

MAJORIKO KUBOKO KANTXAN ZORU BERRIA JARRI DA

2015 04 15 majoriZoru sintetikoa da, eta Mondo Iberico enpresak egin ditu lanak 39.800 euroan

Majori Kiroldegiaren kuboko kantxan zoru berria jarria da Pazko astean. Zoru sintetikoa da, gisa honetako azpiegituretan ohikoa izaten den moduan. Lanak Mondo Iberico enpresak egin ditu, 39.800 euroan (BEZ barne). Saskibaloian, eskubaloian eta areto futbolean jokatzeko egokitu da kantxa berria, baita tenisean aritzeko ere –maila baxuan–. Iaz eragileekin batera egin zen Ordizia Zabalik partaidetza prozesuan lehenetsitako proiektuetako bat zen kantxa berritzea. Horrez gain, Beti-Alai pilotalekuko frontisean eta ezker paretan ere zenbait konponketa lan egin dira.

‘GOIERRI EZAGUTZEN’ II. ZIKLOTURISTA MARTXA MAIATZAREN 31N

2015-04-15 zikloAurrez izena emateko epea maiatzaren 30era arte dago zabalik; 400 lagunek parte hartu ahal izango dute gehienez

Iaz Euskal Herriko Txirrindulari Itzuliaren bueltan antolatu zen 'Goierri ezagutzen' Ordiziako zikloturista martxak jarraipena izango du aurten. Bigarren ekitaldi hau maiatzaren 31n izango da, eta Ordiziako Txindokipe zikloturista taldeak antolatu du Ordiziako Txirrindulari Elkartearekin lankidetzan. Iazkoaren tankerako ibilbidea izango du, eta ibilbide motza (88 km) eta luzea (123 km) egiteko aukera izango da. Goierriko txokoak ezagutzera emateaz gain, kirol ekintzak eta kiroltasuna bultzatzea izango dira aurten probaren helburuak. Maiatzaren 30era arte dago zabalik izena emateko epea, eta gehienez 400 txirrinduzalek hartu ahalko dute parte.

PROBARI BURUZKO INFORMAZIO GUZTIA: http://www.ordiziakozikloturistak.com/index.php?lang=eu

HESIETAN HEZIZ, ATLETISMOA JOLASAREN BIDEZ SUSTATZEKO JARDUNALDIA

2015-04-14 hezizLarunbat arratsaldean izango da saioa, eta atletismo modalitate ezberdinak sustatzeko diseinatuta dago

Udaberrian Martxan programazioaren barruan, eta Ordiziako Udalak Txindoki Atletismo Taldearekin elkarlanean antolatuta, datorren larunbatean, hilak 18, Hesietan heziz ekimena garatuko da Ordiziako Plaza Nagusian eta haren inguruan. Jolasa eta atletismoa uztartzen dituen jardunaldi hau Euskadiko zenbait atletismo entrenatzailek sortua da, eta atletismo modalitate ezberdinak ezagutzera ematea du helburu.