OIANGUKO HABIA-KUTXEN JARRAIPENA ETA HEGAZTIEI ERAZTUNA IPINTZEKO SAIOAREN KRONIKA

2015 04 27 hegaztiakZazpi hegazti espezieri eraztuna ipintzeko aukera izan dute bertaratuek

Iazko udaberrian Oiangun jarritako habia-kutxei jarraipena egin, eta hegaztiei eraztuna ipintzeko saioa egin zen atzo goizean Oiangun. Eguraldi euritsuaren eraginez jende asko inguratu ez bazen ere, jardunaldia bera "arrakastatsua" izan zela adierazi dute Aranzadi Zientzia Elkarteko ornitologoek, zazpi hegazti espezie eraztuntzeko aukera izan baitzuten: zozo emea, kaskabeltz arra, txantxangorria, garrapoa, txonta arra eta emea, erregetxo bekainzuria eta birrigarroa. Txepetxa ere harrapatu zuten, baina ihes egitea lortu zuen. Habiak ere aztertu zituzten, eta horietako askotan arraultzak zeuden, eta beste batzuetan habiak egiten ari ziren. Horietako batetik amilotxa atera zen. Partaide guztiei parkeetako hegaztiak identifikatzeko gida bat banatu zieten.

SAIOAREN ARGAZKIAK (FLICKR)

OIANGUKO HABIA-KUTXEN JARRAIPENA ETA HEGAZTIEI ERAZTUNA IPINTZEKO SAIOA HILAREN 26AN

2015-04-15 habiakDeialdia irekia da, eta interesa duen edonork har dezake parte

Ordiziako Udalak eta Aranzadi Zientzia Elkarteak, Oianguren Parkeko ezagutza eta naturaren sentsibilizazioa sustatzeko iaz abiatutako lankidetzaren barruan, Oianguko habia-kutxen jarraipena eta hegaztiei eraztuna ipintzeko saioa antolatu dute hilaren 26rako. Deialdia irekia da, eta interesa duen edonork har dezake parte. Oianguko baserrian elkartuko dira parte hartzaileak, 09:00etan.

ORDIZIAKO UDALAK BAT EGITEN DU “PLANETAREN ORDUA” EKIMENAREKIN

2015-03-27 planetaEraikin publikoetako argiak itzali egingo dira bihar 20:30etik 21:30era, eta udalak gauza bera egiteko deia egin die herritarrei

Ordiziako Udalak bat egingo du klima-aldaketaren kontra WWF erakundeak (Natura Babesteko Mundu Erakundea) biharko, hilak 28, antolatu duen mobilizazio kanpaina orokor handienarekin: Planetaren Ordua. Horrela, itzali egingo dira herriko monumentu esanguratsuenetako eta eraikin publikoetako argiak, gaueko 20.30etik 21.30era. Udalak dei egiten die ordiziarrei euren etxeetako argiak itzali eta klima aldaketaren kontrako aldarrikapen hau egitera. Atzoko osoko bilkuran erabaki zuen Udalbatzak deialdi hau egitea.

LANDARE-HESIA OIANGUTXIKI BASERRIRA BIDEAN

2015-03-24 auzolana2Herenegun 200 zuhaitz eta zuhaixka landare landatu ziren auzolanean

Eguraldiarengatik aurreko bi deialdiak bertan behera utzi ondoren, joan den igandean, hilak 22, Oiangutik Oiangutxiki baserrira bidean landare-hesi bat sortzeko auzolana egin zuten 15 bat lagunek, Ordiziako Udalak eta Aranzadi Zientzia Elkarteak egindako deiari erantzunez. Landare-hesien funtzio eta onuren azalpenak entzun ondoren, lanari ekin zioten partaideek, eta elorri zuriak, beltzak eta hainbat fruta-arbola landatu zituzten. Ongarri modura iazko auzolanean egindako konposta erabili zuten. Ateri eutsi zion ia goiz guztian eguraldiak, eta giro onean aritu ziren lanean. Hamaiketako baten bueltan eman zioten amaiera auzolanari.

AUZOLANEKO ARGAZKIAK (2015-03-22)