16 GARAJE PLAZA SALGAI LUKUSAIN INGURUAN

Interes orokorra defenditu eta aparkatzeko beharrari erantzun nahi zaio parking plazak udalerrirako berreskuratuta

Ordiziako Udalak 16 aparkaleku plaza jarri ditu herritarren eskura Zuberoa kaleko sotoan, Lukusain plazan, 50 urteko eperako. Jose Miguel Santamaria alkateak Iñaki Dubreuil eta Josi Iturrioz zinegotziekin batera garajeetara egin duen bisitan esan duenez, eskaintza honekin ‘auzoko bizilagunek egindako eskaerari’  eta udalerrian dagoen ‘aparkaleku beharrari’ neurri batean erantzuten zaio. Plaza itxiak dira, 14 metro koadro ingurukoak, eta prezioa 13.222 euro da, gehi  %4ko zergari dagokiona.

Plaza horietako bat eskuratu nahi dutenek izena eman behar dute. Prozesuaren hasiera iragartzen duen dekretua asteazken honetan, azaroaren 28an argitaratu da eta hamar lanegun daude, abenduaren 12ra arte hau barne, izena emateko argitaratu eta gero. Eskaera egiteko edo informazioa eskuratzeko Udal arreta bulegora (astelehenetik ostiralera 8:00etatik 13:30era) edo Udaltzaingoaren bulegora (astelehenetik ostiralera 15:30etik 19:00etara edo larunbat goizean 9:00etatik 13:30era) joan behar da. Informazioa telefonoz jasotzeko 943805611 zenbakira dei dezake. Garajeak zozketa bidez emango dira.

JUBILATUEI ZUZENDUTAKO ARGITU TAILERRA EMANGO DA

Argindarraren kontsumoa kontrolatzeko saio praktikoa da

Gipuzkoako Foru Aldundiko Ingurumeneko eta Obra Hidraulikoetarako Departamentuak, Lazkaoko Udalarekin elkarlanean, Gipuzkoa Argitu programaren baitan, elektrizitate-kontsumoari buruzko datua ezagutzeko eskubidea praktikan jarri eta hortik abiatuz erabaki egokiak hartzeko balio duten doako tailerra antolatu du azaroak 26, astelehena, 17:30etan, ZUHAIZTI jubilatu elkartean.

Tailer praktikoan parte hartu nahi duten herritarrek, azaroak 23 baino lehen izena ematea beharrezkoa da, saioak aurrera egiteko ezinbestekoa baita aldez aurretik ikasleen kopurua ezagutzea.

Informazio osagarria: www.gipuzkoaingurumena.eus/eu/argitu

Tailer hauek Gipuzkoa Argitu izeneko programaren baitan kokatzen dira eta bere helburua Gipuzkoako sektore ezberdinei (etxebizitzak, merkataritza, enpresa txikiak, etab.) energiaren kontsumoaren murrizketa lortzea eta eraginkortasuna handitzea da, modu erraz batean. Horretarako, Ingurumen eta Obra Hidraulikoetako Foru Departamentuak baliabide-multzo bat jartzen du lurraldeko eragile ezberdinen eskura; hala nola, aurrez aurreko prestakuntza-saioak, on-line tutorialak, aurrez aurreko aholkularitza-zerbitzua Energia Azoketan, Gipuzkoa Argitu programaren web gunea, eta abar.

3.500 KILO HONDAKIN ATERA DITU ORIA ETA AMUNDARAIN ERREKETAKO LAU KILOMETRO ETA ERDIKO IBILBIDEAN

Tokiko Agenda 21 programaren baitan egiten ari da garbiketa osoa

Ordiziako Udala udalerriko bi ibai nagusietako ubideak garbitzen ari da. Oria eta Amundaraingo lau kilometro eta erdian burutzen ari dira lanak aurreko astean eta aste honetan ere horretarako kontratatutako Txukun Lorezaintza enpresaren bidez. Oraingoz 3.500 kilo zabor atera dituzte, eskuz, ibaiari ahalik eta kalte gutxien egiteko. Pisatu, sailkatu eta Ordiziako Garbigunera eramaten dira egunero.

Programaren asmoa 2030. Urterako finkatuta dauden Garapen Iraunkorreko programaren tokiko eta bailarako helburuak betetzea da. Ibaien garbiketa 14.puntuan dago barneratuta eta ibai, ozeano, itsaso eta itsas baliabideak artatzea eta modu iraunkorrean erabiltzea eskatzen du.

Garbiketa urtean behin eta eskola-kanpainak

ORDIZIAKO BARATZE PARKEA ZABALDU DA

 San Joan auzoan 35 lursail ditu behar desberdinetara egokituta

Kutxa Ekogunea erakundeak elikadura eta ohitura osasuntsuak sustatzearen aldeko apustua egitenez, Baratze Parkea Sarea martxan jarri du Gipuzkoako hainbat herritan. Ordiziako Udalak bat egin du egitasmoarekin eta Gipuzkoako 19. Baratze Parkea zabaldu da bertan.

Ordiziako Baratze Parkea larunbat honetan inauguratu da. Ekitaldian erabiltzaileez gain, Jose Miguel Santamaria alkatea, Joseba Aranburu Ingurumen zinegotzia, Rosa Aurkia udal teknikaria eta Kutxa Ekogunearen eta Baratze Parke Sarearen ordezkari gisa Itsaso Olaizola teknikaria izan da, eta baita Ordiziako  Kutxabank bulegoko zuzendaria, Idoia Goñi. 

Ordezkari bakoitzak proiektuaren ezaugarri eta helburu nagusiak nabarmendu ditu. Aranburukproiektua gauzatu arteko jarraitu diren  pausoak azpimarratu ditu. Horrez gain, ‘Ordiziar guztientzako berdegune ireki eta berri bat prestatu dugu elkarlanean eta Baratze Parkeko baratze-kideek, baratzean arituaz, ingurumenarekiko eta elikadura osasuntsuarekiko sentsibilizazioa garatzeko eta  elkarbizitza eta elkarlanerako aukera paregabea izango dute’, esan du zinegotziak. Izan ere, larritasunezko egoeran aurkitzen diren kolektibo edo pertsonei beren kontsumo pertsonalerako erabiliko dituzten elikagaien laborantzarako eremu arautu bat eskainiko zaie.