TREN GELTOKIKO IRISGARRITASUNA HOBETZEKO LANAK OTSAILEAN HASTEA AURREIKUSTEN DA

Udalak proiektua hobetu du azpiko pasabidea aprobetxatuz San Bartolome eta herrigunea ere lotzeko

Jose Miguel Santamaria Ordiziako alkatea gustura agertu da udalerriaren diseinu estrategikorako lortutako aurrerapausoa dela-eta: tren geltokiaren irisgarritasuna zuzenduko duen proiektua, hain zuzen. Geltokiko nasak altxatuko dira eta hauek gurutzatzeko azpiko pasabidea eta irisgarritasun azpiegiturak egingo dira. Gainera, Udalak geltokiko azpiko pasabidearen bidez San Bartolome auzoa eta Joseba Rezola ere lotuko ditu.

Adifek, estatuko trenbide azpiegiturak kudeatzen dituen erakunde publikoak, obra  burutuko du. Tren geltokiko irisgarritasun beharrak aseko ditu, geltokiak erdigune aldetik duen sarreran eta baita San Bartolome auzotik ere. Erakundeak eta Ordiziako Udalak proiektuaren exekuziorako hitzarmena sinatuko dute laster. ‘Prozesua luzea izan da eta luzatuko da oraindik, aurreikuspenen arabera 2018ko otsailean hasita, obra amaitzerako 2019. urtea iritsiko baita. Baina epe ertainean egina ikusiko dugu eta Ordiziari bultzada berria emango dio’, esan du alkateak prentsaren aurrean.

Akordioaren arabera, estatuak 4,6 milioi jarriko ditu lan hauek egiteko: nasen arteko irisgarritasun proiektua, azpiko pasabidea, bi igogailu eta bi eskailera eta hauek egiteko behar den obra. Geltokiko alde bakoitzean igogailu bat eta eskailera bat eraikiko dira.

Azpiko pasabidea San Bartolomeko aparkalekutik

HILABETE HONETAN HASIKO DA SAN BARTOLOMEKO SARBIDEA

N-1etik San Bartolome ingurura dagoen sarrera-irteera eta Eroski kokatuta dagoen ingurunea egokituko dira

Ordiziako San Bartolome auzoko trafikoak berrantolatuko dituen proiektua diruz laguntzeko hitzarmena sinatu dute gaur Aintzane Oiarbide, Bide Azpiegituretarako diputatuak eta Jose Miguel Santamaria, Ordiziako alkateak. Ekimen honen baitan, foru erakundeak inguru hau egokitzeko hitzarmena sinatuko du Ordiziako udalarekin eta, besteak beste, San Bartolome auzoak N-1etik daukan sarrera-irteera adarra berrituko da, oinezkoentzako espaloia eta bizikletentzako bidegorria eginez. Eroski hipermerkatuaren inguruan ere egokitzapen lanak egingo dira. Proiektu guztiaren aurrekontua 433.034 eurokoa da. Gipuzkoako Foru Aldundiak gaur egungo N-Ieko lotunea eta aparkaleku eremua lotzen duen errepidearen aktuazioa hartuko du bere gain. Proiektuaren zati honen kostua 266.186,42 eurokoa da.

Hamalau asteko iraupena izango du obrak

PLAZA NAGUSIAK GOIERRIKO ENERGIA AZOKA HARTUKO DU LARUNBAT HONETAN BERTAN

Ordiziako Energia Iraunkorrerako ekintza-plana eta kaleko argiteriaren auditoria energetikoa ere landu ditu Udalak

Ordiziako plaza Nagusian Energia Azoka egingo da larunbat honetan. Ekimena Goieki agentzia bidez egiten ari den Goierriko energia planaren baitan kokatu behar da. Horrela azaldu dute Jose Miguel Santamaria Ordiziako alkateak, Jose Ignacio Asensio Ingurumen foru-diputatuak, Goiekiko Olaya Mendoza Ingurumen gaietako arduradunak eta Isidro Zaldua Usurbilgo lanbide eskolako Patxi zuzendariak. Honekin batera, Joseba Aranburu zinegotziak Ordiziako Energia Planaren lerro nagusien berri eman du.

Gipuzkoako Foru Aldundiko Ingurumen eta Obra Hidrauliko Sailak, Usurbilgo Lanbide Eskolak eta Zubigune Fundazioak 2015 urtetik akordio bat dute energia eraginkortasuna eta energia berriztagarrien erabilera ardatz izanik, hauen inguruko sentsibilizazio, informazio eta prestakuntza ekintza ezberdinak antolatuz, talde hartzailearen arabera.

Hiru ekintza mota nagusi antolatzen dira:

1)      Prestakuntza saioak: Gipuzkoako udaletako langileei eta Foru Aldundiko langileei zuzenduriko prestakuntza saio teknikoak, euren eguneroko lanean energia berriztagarrien eta eraginkortasunaren inguruko jakintzak txertatu ahal izateko.

2)      Jardunaldi Teknikoak: gizartearentzat, ikasleentzat eta bereziki inguruko enpresentzat interesagarriak izan daitezkeen azken tendentziak lantzen dira: araudiak, teknologia berriak, etab.

3)      Energia Azokak: herritar guztiei zabaldutako ekimenak dira. Helburua jendeak energia iturri berri eta garbiak eta kontsumo eraginkorreko teknologiak ezagutzea da, honela euren erabilera sustatuz.

Plazan 10:30etik 14:30era:

HOBERA EGIN DU HONDAKINEN GAIKAKO SAILKAPENAK

Ordiziak maiatzean hondakinen %79 gaika sailkatzera bideratu du

Sasieta Mankomunitateak maiatzeko hondakinen bilketako datuak ezagutzera eman ditu. Ordizian gora egin du gaika sailkatzera bideratutako hondakin kopuruak, beste behin, Hondakinen Mahaiaren helburutik gertu kokatuz. Hala, %79ko portzentajea da maiatzekoa, eta %85ekoa helburua.

Aurten eboluzioa honako izanda: %76 urtarrilean, 75 otsailean, 76 martxoan, 77 apirilean eta, azkenik, aipaturiko %79 maiatzean.

Ordiziarrak zoriontzeaz gain, oraindik hobetzeko tartea badagoela gogoratu behar da, hondakinak etxean bereizteko ohitura hartu ez dutenei hasteko animatuz. Informazioa edota laguntza behar izanez gero, Sasietarekin (943161555, www.sasieta.eus) edo Ordiziako Udaleko Hondakinen bulegoarekin (943885850, asteartean eta asteazkenetan 9:30etatik 14:30etara) jar daitezke harremanetan.