Udalak zaborrontzi selektiboen 12 puntu jarriko ditu datorren astean parkean

Uda iristear den honetan, eguraldi onarekin eta parkeko tabernaren irekierarekin, geroz eta gehiago dira Oianguko parkera hurbiltzen diren herritarrak. Honi, Aranzadiren lankidetza hitzarmenaren barnean antolatutako ekintzek izandako arrakasta gaineratuz, parkeaz gozatzeko aukera zabala da.

Udalak parkeko zerbitzuak hobetze aldera , zelaiaren mantenu lanak areagotu egin ditu uda parterako. Eremua berdindu eta txukunduta, hondakinak egoki biltzeko neurriak hartuko ditu orain. Zaborrontzi selektiboak izango dira Oiangun datorren astetik aurrera eta ingurua txukun mantendu dezaten dei egiten die Udalak herritarrei.

Larunbatean, hilak 31, izango da, 09:00etatik 13:00era, eta interesatua dagoen edonor joan ahal izango da bertara

Ordiziako 8 eta 11 urte bitarteko haurrek joan den otsailean Oianguko zuhaitzetan barrena jarri zituzten 20 habia-kutxei jarraipena egin eta hegaztiei eraztuna jartzeko saioa egingo da datorren larunbatean, hilaren 31n. Oiangurenandi baserrian da hitzordua, eta deialdia irekia denez, nahi duten pertsona guztiek inguratu ahal izango dute bertara. Ordiziako Udalak eta Aranzadi Zientzia Elkarteak parkearen kontserbaziorako eta ingurumen sentsibilizaziorako urte hasieran abiatutako lankidetzaren barruko ekimena da.

Baldintza meteorologikoak aldekoak badira, astebeteko epean lanak bukatzea aurreikusten da

Aranzadiko Botanika saileko kideak datorren astelehenean, hilak 26, hasiko dira Altamirako putzua egokitzen, Oiangu parkean. Ordiziako Udalak eta Aranzadi Zientzia Elkarteak parkearen kontserbaziorako eta ingurumen sentsibilizaziorako urte hasieran abiatutako lankidetzaren barruan egingo den beste ekintzetako bat da. Putzuaren egungo balio naturala eta izan dezakeen balio didaktikoa kontuan hartuz, bi arlo horiek indartuko dituzten lanak egingo dira. Eguraldiak laguntzen badu, astebetean egokitzapen lanak bukatzea espero da.

 Sistema aldaketa ezarri zenetik Ordizian lortu den bereizte tasa handiena da

Ordiziako hondakinen gaikako bilketa %79koa izatera iritsi da, orain artean lortu den bereizte tasarik handiena. Larunbatean, hilaren 19an, Birziklapenaren Mundu Eguna ospatuko da, eta udalaren esanetan, lortutako datuek eredugarri bihurtzen dute Ordizia herri iraunkorrago bat lortzeko bidean. Hamar hilabete bete dira aste honetan bilketa sistema aldatu zenetik, eta harrezkero, edukiontzi bidez egindako bereizte tasa bikoiztu baino gehiago egin da hilez hil.

Sasieta Mankomunitateak kaleratutako azken txostenak urtarriletik martxora bitarteko bilketa datuak jasotzen ditu. Ordizian 221.090 kilo hondakin jaso dira martxoan; horietatik 174.310 kilo (%79) birziklatze guneetara bideratu dira, eta 46.780 kilo (%21) zabortegira. Bilketa datu horiek herritarren ahaleginari esker lortutakoak direla argi du Ordiziako Udalak.