Oiangu Natur Eskola, natura eta hezkuntza uztartuz

Oiangu Natur Eskola. Ordizia. Aranzadi

Ordiziako Udalak abian jarraipena emango dio egitasmoa, herriko ikastetxeetako ikasleei zuzenduta

2017ko maiatzean abiatu zen Ordizian Oianguko Natur Eskola, Aranzadi Zientzia Elkartearen eskutik. Egitasmo honekin, Udalak herriko txikienak inguruan duten naturara gerturatu nahi ditu, eta horretarako aukera paregabea eskaintzen du Oiangu parkeak. Urtero abiatzen den proiektua da, eta Udalak argi zuen jarraibidea izan behar zuela, duen garrantziagatik. Adur Ezenarro, Ordiziako alkatea: “Oiangu altxor bat da eta gazte garenetik inguruneak eskaintzen dizkigun aukerez gozatzeko aukera izatea zorte handia da. Horregatik, ordiziarrak Oiangu gertutik ezagutzeko aukera izatearen aldeko apustua egingo dugu beti”.

Orain arte Urdaneta eta Jakintza ikastetxeko 3. zikloko ikasleekin egin dute lan Aranzadi Zientzia Elkartekoek, eta aurtengo edizioan ere hala izango da. Apirilean eta maiatzean 8 eta 12 urte bitarteko Ordiziako ikastetxeetako haurrak Oiangura igoko dira Aranzadiko begiraleekin eta bertan egun osoa irauten duten jarduerak egingo dituzte, jolas librerako astia ere utziz. Jarduerak, jolas eta tailerretan oinarritzen dituzte, non ikasleak beraiek diren Oianguko bitxikeria eta altxorrak deskubritzearen protagonistak. “Azken finean, naturarekin esperientzia zuzenak izanez eta honekiko erlazio afektibo bat sortuz, naturarekiko errespetuzko jarrerak bultzatzea da proiektu honen helburu nagusietako bat, naturari buruz ikastearekin batera”, azaldu dute Aranzadiko kideek. Izan ere, haien hitzetan, ingurune naturaletatik geroz eta urrunago dagoen gizarte honetan, honekiko ezagutza ugari galtzen ari da. Horrez gain, jakina da, zenbateko onura dakarren ingurune berde batekin harremanetan egoteak, onura hauek bereziki garrantzitsuak bilakatzen direlarik umeen ikasketa prozesuan: gaitasun motorra lantzeko aukera paregabea eskaintzen dute, harremanak sendotzen laguntzen dute, konzentrazioa handitzen laguntzen dute, gaixotasunak pairatzeko arriskua murrizten da, etab.

Iazko kasuan, esaterako, eskaintza zabaldu egin zen eta 3. ziklokoez gain, 2. zikloko ikasleak ere batu ziren egitasmora. Guztira, 540 haurrek parte hartu zuten. Yoana Garcia, Aranzadiko kideak halako balorazioa egin du: “orain arteko balorazioa oso ona da. Irakasleek eskertzen dute ikasgelatik atera eta herriko naturgune batera joatea, herriko baliabideak ezagutzeko asmoz. Bestalde, ikasleek oso ondo pasatzen dute; ekintza dinamikoak eta elkarlanean egitekoak dira. Duen berezitasuna, gainera, Oianguko biodibertsitatera egokituta dauden ekintzak egiten dituztela da, hau da, bertako landare eta fauna ezagutzen dituzte, hala nola, sagastia eta putzua.

Gune gorriko ordenantza, Udalbatzara

Gune Gorria

Aparkamendu mugatuko eremuak arautzen dituen Udal ordenantza aldatzea proposatuko du Udal Gobernuak azaroko Plenorako. Gauza jakina da hainbat espaziotan aparkatzeko arazoak daudela udalerrian. Besteak beste, Urdaneta, Maribaratza, Diego Rivero, Goierri, Berria eta Joseba Rezola kaleak dira horiek. Horri aurre egiteko ordutegi zehatz batean eremua aparkatzeko bizilagunentzat mugatzea proposatu zen, gune gorri bat jarriz. Adur Ezenarro, Ordiziako alkateak, egitasmo eta sistema orokor baten beharra nabarmendu du: “udalerri osoaren azterketa bat egitea funtsezkoa da, eta ondoren hartzea erabakiak; ez auzo bakarrari dagokiona, osotasunean baizik”.

Ordenantzaren aldaketek eragin zuzena izango lukete: batetik, ibilgailuaren jabea sektorean erroldaturik ez balego, baina jabearen senitarteko zuzen batek mendekotasuna aitortuta badu dagokion agiriarekin, eta zaintza lanak familiartekoek egiten badituzte, zaintzailearen ibilgailua onartuko da. Bestetik, ibilgailu horiek pertsonak garraiatzekoak izango dira; baina beste kategoria batekoak balira, baina aparkaleku plaza batean sartzeko tamainakoak eta jabea sektorean erroldatua egoteaz gain, ibilgailua ere hala badago, eta ibilgailu hori loturik dagoen enpresaren lokala ere sektorean kokatzen bada, onartua izango da.

Era berean, udalerri osorako sistema orokor bat martxan jarri bitartean, egoilartasuna ematerako orduan, oinezkoa den Alde Zaharreko eremu bateko bizilagunek ere txartelaren eskaria egin ahalko dute, zehazki Kale Nagusia 1-11/2-22, Santa Maria 3/19, Goen 1-9/2-8, Artega kalea 1 eta 2.

Orain arte gaizki aparkatutako ibilgailuei edo txartelik gabekoei jarri zaizkien isunen inguruan ere mintzatu da alkatea: “herrigune osoan isun arruntak 40 eurokoak dira, baina, aldiz, gune gorriari erreferentzia egiten zion ordenantzan 200 eurokoak izan behar zirela zegoen jasota. Horregatik aldaketa proposatzen da, eta isunak 40 eurokoak lirateke, herriko beste eremu guztietan aplikatzen direnen antzekoak”.

Txartelak ez kobratzea

Ordiziako Udalak beharrezko ikusten du herri osorako aparkaldi mugatuko sistemaren azterketa, eta hori abian jarri arte, egoiliarren txartela ez da ordaindu beharko, auzo bakarrean dagoelako soilik. Puntu hau ere Plenotik pasako da. Lanketa egin ostean, eta sistema orokorra ezartzen denean, lehen txartel horren prezioa 20 eurokoa izango da, eta bigarrenarena 75 eurokoa.

Gune gorria abian jarri zenean 201 plaza bideratu ziren helburu horrentzako eta aparkatzeko muga 20:30etatik 09:30era jarri zen, astelehenetik ostiralera, baimenduetako bizilagunentzat. Bestalde, goizeko 9:30etatik iluntzera eta asteburu zein jai egunetan gune gorri hori parking librea izango zela erabaki zen.

GUNE GORRIKO TXARTELA EKAINETIK AURRERA ERABILI BEHARKO DA

Gaueko orduegia izango du, lanegunetan

Ekainaren 4tik aurrera Eskarabilla auzoan egoiliarrentzat aparkatzeko prestatu den gune gorria indarrean egongo da. Jasotako eskaerak tramitean daude une honetan eta datozen egunetan eskatzaileek txartela prest dutela eta jasotzera joateko oharra jasoko dute gutun bidez. Udaltzaingoan jasoko dira honako ordutegian: 8:00etatik 13:00etara eta 15:00etatik 20:00etara, astelehenetik ostiralera.

Urdaneta, Maribaratza, Diego Rivero, Goierri, Berria eta Rezola (Urdanetatik tren geltokiraino) kaleetan  aparkatzeko arazo larriak daude, batez ere ordu batzuetan. Honi aurre egiteko proposatu zen  ordutegi zehatz batean eremua aparkatzeko bizilagunentzat mugatzea. Guztira 201 plaza gorri dira eta aparkatzeko muga 20:30etik 09:30era izango da, astelehenetik ostiralera, beti ere baimendutako ibilgailuentzat. Goizeko 9:30etik iluntzera, asteburuetan eta jai egunetan gune gorria parking librea izango da. Auzoan gune urdina ere badago, 122 plazekin.

Sistema ezartzeko erabakia  Mugikortasun Mahaian adostu zen. Orain sei hilabeteko probaldia egingo da. Ondoren aztertu eta, beharko balitz, antzemandako hobekuntzak ezarriko lirateke.

Behin gutuna jaso eta gero txartela jasotzera ahalik eta azkarren hurbiltzeko eskatzen da, ekainaren 4tik aurrera erabili beharko baita.

ORDIZIAKO KALEEK LED ARGITERIA IZANGO DUTE AURTEN

Udalerriko 305 argi-gune berrituko dira kutsadura eta gastua murrizteko

Ordiziako Udalak kale-argiteria berrituko du LED teknologiara egokitzeko. Honetarako pasa den asteartean 305 luminaria egokituko dituen enpresa kontratatzeko deialdia egin zen. Proposamenak aurkezteko azken eguna ekainaren 7a da eta proiektua bere gain hartzen duen enpresak lana hasi eta hiru hilabete izango ditu bukatzeko.

Udalaren helburu nagusiak dira energia aurreztu, faktura elektrikoari dagokion gastua murriztu eta argi kutsadura eta CO2 isuriak murriztea.

Aipatu bezala, 305 argi puntu berrituko dira eta aurreikusi den  inbertsioa 147.887,60 euroko da. BEZa gehituta (31.056,40), 178.944 euro dira.

Helburu teknikoak hauek dira:

-Instalazioen efizientzia energetikoa hobetzea, argiteria beharra edo maila espazioen erabilerara egokituz, beste espazioengan duen eragina neurtuz eta puntu guztiek behar duten argi maila minimoa ezartzera behartuz.

-Egoera edota kokapen desegokia duten instalakuntzak guztiz aldatzea.

-Hobekuntza telematikoak txertatzea sute-kontrola eta argi-maila erregulatzeko.

-Kale argiteriaren eragina mugatzea beste espazio batzuetan eragin ez-egokia duenean.

-Efizientzia energetikoaren inguruko araudia betetzea.