LARUNBATEAN TABERNAK BERANDUAGO ITXI AHAL IZANGO DIRA

Asteburu honetan ORDIZIAROCK 2016 musika ekimena ospatuko da. Hau dela-eta, herriko ostalarien eskaerari erantzunez, taberna, jatetxe eta pubek ordubete beranduago itxi ahalko dute larunbatetik iganderako gauean. Hala, alkoholik saltzen ez duten kafetegien itxiera ordua 01:30ak izango da; 03:30tarako itxi beharko dute taberna eta jatetxeek eta 05:00etarako pubek. Ostiral gaueko ordutegian ez da aldaketarik onartu.

12 HILABETE 12 PRODUKTU: MIKOLOGIAREN HILABETEA

Hainbat ekintza antolatu dira azokan eta D´elikatuz zentroan burutzeko

Udazkenaren  bat, perretxiku eta onddoak jasotzeko garaia iristen da. Jarraitzaile ugari dituen jarduera, eta hainbat espezie desberdin ezagutu, bilatu eta aurkitzeak ematen dien plazerraz gozatzeko aukera ematen diena. Gure natur ingurunearen ezagutzan sakontzeko aukera ere ematen duen jarduera dugu mikologia.

Ordiziako azokan, garaiko produktuen erakusleiho paregabea den aldetik,  hainbat perretxiku postu aurkitu ditzakegu denboraldian zehar.  

Asteazken honetan, urriak 19, hasi eta lau asteazkenetan, Ordiziako Azokak mikologiari eskeiniko dio datorren hilabetea lehen aldiz. (...)

RICARDO REMIRO, 2016ko 'TXAPELDUNEN TXAPELDUNA'

Urrezko gazta ere irabazi du 8,5 puntuazioa gaindituta

Aurreko larunbatean Ordizia Txapeldun gazta lehiaketaren XXIX. ekitaldia ospatu da Ordiziako Plaza Nagusian. Aurtengoan Ricardo Remiro izan da irabazle. Bere gaztak 8,50 puntuak gainditu ditu eta Urrezko Gazta eramateko aukera izan du gainera.

Txapeldunen txapeldunaren XXIX. ekitaldian, azken hamar urteetako (2007tik 2016ra) irabazleak lehiatu dira haien artean. Ekitaldia Ordiziako Idiazabal Gaztaren kofradiak eta Udalak antolatu dute, Idiazabal Jatorri Izendapenaren laguntzaz. (...)

LANGABETUENTZAKO SUSTATUTAKO FORMAZIO IKASTAROA HASI DA GOIERRI ESKOLAN

Honez gain, Ekimena faktoria martxan dago eta Udalerako lanpostu deialdi bat egin da

Enpleguaren sustapena eta Ekonomiaren garapenerako I. Udal Planaren baitan eta ikasturte hasierarekin, Ordizia eta Beasaingo Udalek bultzatuta, hilabete honetan martxan jartzen den hirugarren jarduera da Goierri Eskolan aurreko ostiralean,  bi herrietako alkateekin, eskolako zuzendari eta irakasle eta kurtsoan parte hartzen hasi diren ikasleekin  aurkeztu den ikastaroa.

Hala, eta Beasaingo Udalarekin batera antolatuta, langabetuentzako formazio ikastaroa hasi da astelehen honetan Goierri Eskolan. Bost ordiziarrek hartuko dute parte kurtsoan. Produkzioa metal eraikuntzetan eta entsegu ez suntsitzaileetan  gaiaren inguruan ikasiko dute parte-hartzaileek. Helburua, inguruko enpresen beharrei erantzutea da eta, amaitzeko, lantoki horietan 200 orduko praktikak egingo dituzte. Kurtsoaren kostua 103.000 euro da. Ordiziako Udalak izena eman duten ordiziarren kostea ordainduko du.