Bono kanpainak 450.000 euroko diru-sarrera eragin du Ordiziako establezimenduetan

Ordiziako Udalak, bertako merkataritza, ostalaritza eta zerbitzu enpresei laguntzeko asmoz ‘Ordizia Bizi herria’ bonoak sortu zituen. Bi txandatan banatu zen; lehenengoak 181.000 euro inguruko diru sarrera eragin du Ordiziako establezimenduetan, eta bigarrenak 270.000 euro ingurukoa. Beraz, herritarrak bonuen erabileraren bitartez egindako erosketa horiek ia milioi erdiko inpaktua ekarri du herrira.

“Gustura gaude abian jarritako kanpaina honek izan duen erantzunarekin. Gure herria bizirik mantentzeko ezinbesteko lana egiten duten sektoreak dira, eta gainera, gure helburua herritarrek herrian kontsumitzea da, herriko komertzio txikien aldeko apustua egitea”, azaldu du Maitane Alvarez alkateordeak.

Lehen txandaren ondoren, bigarren txanda urriaren 29an abiatu zen, eta bono horiek erabilgarri izan dituzte ordiziarrek abenduaren 31a bitartean. Bi kasuetan Ordiziako etxe guztietara banatu ziren 20 euroko balioa zuten bonoak, 4.650, hain zuzen ere. Lau zatitan zegoen banatuta bono bakoitza, hala, gastua establezimendu batean baino gehiagotan egiteko aukera izan dute ordiziarrek.

Gaur egungo egoeran merkataritza baita ostalaritza sektoreak izan dituzten zailtasunekin sentsibilizatu dira herritarrak orokorrean eta hauen erantzuna ona izan da herriko saltokietan erosketak egiteko orduan. Herritarrak bonuen erabileraren bitartez egindako erosketa horiek diru-sarrera nabarmena eragin du herriko merkataritza, ostalaritza eta zerbitzu enpresen sektoreentzat eta Udalak, erosketa horietan erabili diren bonuak dendariei ordaintzeko bideratu duen laguntza, guztira, 87.000 eurokoa izan da, 36.000 euro lehenengo txandarako, eta bigarrenerako 51.000€.

89 establezimendu

Bigarren txanda honetan 89 izan dira parte hartu duten saltokiak (lehenengo txandan baina bi gehiago), hauen artean 28 sektore desberdinetakoak; ehungintza, oinetakoak, edergintza, optikak, ostalaritza, dekorazioa, etxetresna elektrikoak, elikadura, kirola, bitxigintza, turismoa, etab.

Bigarren txandan lehenengo txandan baino 3000 bonu (5€koak) gehiago erabili dira. Kontutan hartuta lehenengo txanda ekainetik irailera izan zela, lau hilabete, eta oraingo honetan azarotik abendura, bi hilabete, esan daiteke herritarraren erantzuna hobea egin duela. Azaroan, bonuen trukea positiboa izan zen, baina abenduan nabarmen handitu zen, Gabonetako kanpainari begira.

Aitor Velazquez, Ordizian merkatari elkarteko teknikaria: “Bono kanpaina honen balorazioa oso positiboa izan da bai herritarren aldetik, eta baita ere merkatarien ikuspegitik. Ordiziar askok bonoak erabili dituzte erosketak egiteko, eta laguntza-kate baten parte izan dira”.

Ordiziako azokako zozketak bueltan dira

Ordiziako Udalak Ordiziako Azokaren marka berria aurkeztu zuen joan den urteko azaroan, eta lehen ekimenetako bat Azokako produktuekin osatutako loteak eta erosketa orgak zozketatzea izan zen. Atsedenaldi txiki baten ondoren, berriro ere abian jarriko da ekimen hau otsailaren 10etik aurrera ekainera bitarte; beraz, asteazken honetako azokan abiatuko den ekimena izango da.

Zozketa bi astean behin burutuko da eta 2 produktu lote eta 4 erosketa orga zozketatuko dira aldi bakoitzean. Berrikuntza bat izango dugu oraingoan, izan ere, Plaza barnean azokaren informazio karpa bat egokituko dugu eta azoka martxan dagoen bitartean, Azokako poltsa berriak eta erosketa orgak erosteko aukera emango dugu, gure erosleak plastikozko poltsak ordezkatzen joan daitezen. Ekimen honen baitan, garaiko produktuen sustapenarekin lotutako edukiak jarriko dira erosleen eskura, hala nola, errezetak, kontserbaziorako irizpideak eta bitxikeriak. Egoerak baimentzen duen heinean, Ordiziako merkatari, ostalari eta kontsumitzaileak protagonista izango dituzten beste hainbat ekimen garatzea da helburua, Ordizian erosi eta kontsumitu eta Ordizia bizi dezagun.

Adur Ezenarro, Ordiziako alkateak hala nabarmendu du ekimenaren zergatia: “Ordiziako azoka, gure azoka, dugun altxor handienetako bat da. Urtez urte herritarrok bertako produktuak, kalitatezkoak, erosteko aukera eskaintzen da bertan, baina gure baserritarren lana balioan jartzeko ere balio du. Garai zail hauetan inoiz baino gehiago egin behar dugu gurearen aldeko apustua”.

"Denda txikiak, hemen etorkizuna dago" kanpaina abiatu da Ordizian

ORDIZIAN, Ordiziako merkataritza, ostalaritza eta zerbitzu enpresen elkarteak, Ordiziako Udalarekin batera eta Eusko Jaurlaritzaren laguntzaz "Saltoki txikiak. Hemen etorkizuna dago", kanpaina sustatu du. Kanpainaren elementu nagusia erosketa poltsa da, eta bertan benetan garrantzitsuak diren gauzen balioan arreta jartzea da helburua, etorkizunean, gaur egungo egoera berezietan, koronabirusaren krisiaren ondoren.

Jardunaren helburua da mundu mailako pandemiak eragindako efektuen ondoren merkataritza txikiak duen toki garrantzitsua nabarmentzea eta kontzientzia hartzeko gaitasunaz jabetzea, erosteko modurik onena zein den hausnartzera gonbidatuz: lurraldea zainduz, oreka mantenduz, proposamenik jasangarriena, gizatiarrena, hurbilena lortuz eta tokiko aberastasuna sortzen duena lortuz. Balore horiek berezkoak ditu eta hurbileko merkataritzaren funtsezko ezaugarriak dira.

Aurkezpenean ondorengoek parte hartu dute: Ordizian merkatari elkarteko zuzendaritza batzordeko kideak, eta Maitane Alvarez, Ordiziako Udaleko alkateordea.

Ekimenerako, zoruko biniloen tankerako piezak editatu dira, saltokiaren sarreran pertsonen arteko gutxieneko segurtasun-distantzia markatzeko, birusa ez hedatzeko osasun-agintariek emandako gomendioekin bat etorriz. Era berean, erakusleihoetarako binilo batzuk egin dira, " Merkataritza txikia, hemen etorkizuna dago", honako esaldiak barnebiltzen ditu “jasangarriagoa eta justuagoa” eta "aberastasuna zugandik gertu uzten duena" esaldiekin. Kanporako irudi erakargarria da, hurbileko merkataritzan erosteari lotutako balio nagusiak gogorarazten dituena.

Gainera, 5000 paper-poltsa inguru sortu dira, ekimenaren irudi korporatiboarekin. Poltsa horiek herriko saltokien artean banatuko dira, eta Ordiziako saltokiko bezeroen artean banatuko dira. Amantalak ere diseinatu dira ekintzaren leloarekin.

Kanpaina sare sozialetan ere ikusgai egongo da; bertan, udalerriko benetako denda txikien 4 irudi zabalduko dira, eta etorkizun bidezkoago eta zuzenago bati buruzko eta saltoki txikietan erosiz inguruaren aberastasuna bultzatzen dela dioen mezua zabalduko da.

"Egoera honetan, gure kontsumo-ereduaz eta nahi dugun hiri-ereduaz galdetu behar diogu gure buruari, eta gero eta garrantzitsuagoa da jasangarritasunaren, ingurumenaren, hurbiltasunaren eta gure enpresa-sarearen sustapenaren alde egitea, azken batean, gure tokiko ekonomiaren alde", adierazi du Ekainek, ORDIZIANeko presidenteak.

Bestalde, Maitane Alvarez, Ordiziako Udaleko alkateordeak hala agertu du: "kontsumo eta ekoizpen jasangarriak hauek dira: gutxiagorekin gehiago eta hobeto egitea, hazkunde ekonomikoa ingurumenaren degradaziotik bereiztea, baliabideen eraginkortasuna handitzea eta bizimodu iraunkorrak sustatzea". Horrela, bere sailak hurbileko merkataritzaren alde egindako apustua nabarmendu du, hala nola, Udalak abiatutako diru-laguntza zuzenak, eta bono kanpaina.

Ordiziako Azokak irudi berria estreinatu du

Ordiziako Udalak bere marka berria aurkeztu zuen duela hilabete batzuk. Oraingoan, Ordiziako Azokari egokitu zaio. Bertako elikagai, ekoizle eta herritarren topagunea. 

Ordiziako Udaleko markaren moldaketa bat izango da eta nahiz eta garairik onenak ez diren ordiziarrak eta bisitariak bertako eta garaiko produktua kontsumitzearen beharraz ohartaraztea izango du helburu nagusia. Jasangarritasuna da Ordiziako Udalaren giltzarrietako bat eta horretarako eman beharreko pausoetako bat azokako plastikozko poltsak alde batera uztea izango da. Helburu horrekin logo berria daramaten azokarako poltsak eta erosketa-orgak egin ditugu, erosleek azokara erosketa egitera doazen bakoitzean berrerabil ditzaten.

Hain zuzen, azaroaren 18 eta 25eko azoketan erosketa egiten dutenei txartel bana banatuko zaie (Udalak postuz postu banatuko dituenak) eta ondorengoen zozketan parte hartzeko aukera izango dute: Ordiziako Azokako 4 poltsa azokako produktuez beteta eta 4 erosketa orga asteazken bakoitzean. Baina gure helburua, haratago doa eta ekimen hau Ordiziako Udala, azokako saltzaileak, Ordiziako ostalariak eta kontsumitzaileen artean sortuko litzatekeen elkarlan dinamika baten hasera besterik ez izatea espero da.

logo ordizia bizi herria

Image
Image
Image