Ordiziak ez ditu ospatuko Euskal Jaiak

Irailaren 9an ziren ospatzekoak aurtengo Euskal Jaiak Ordizian. Oraindik ere COVID-19ak eragindako egoera dela eta, Udalak ezin du ziurtatu berme guztiekin egitekoak izango direnik, eta horregatik, bertan behera utziko ditu. Santa Ana jaiekin gertatu moduan, ez da festarik ez inolako ekintzarik antolatuko, tartean urteko azokarik bereziena, postu berezi, eta ganadu, hegazti, eta barazki lehiaketekin.

Idiazabal Gaztaren txapelketa ezaguna eta irabazten duen gazta erdiaren enkantea ere egiten ohi dira asteazken horretan. Frontoian egiten den ekitaldia izanik, azkenean, irailaren 9, asteazkena egin beharrean, irailaren 11an, ostirala, burutuko da lehiaketa entzutetsua, eta segurtasun neurriak betetzeko ateak itxita burutuko da. Edonola ere, irailaren hasieran prentsaurrekoa egingo da gazta txapelketaren nondik norakoak azaltzeko.

Alerta naranja eta horia tenperatura altuengatik. Gomendioak:

Gaur alerta laranja izango dugu beroagatik eta baso suteengatik. Bihar, berriz, abisu horia. Eguraldi bero horien aurren, hemen hainbat gomendio, kontuan hartzeko; Oianguko parkeko barbakoak itxita egongo dira alarmak iraun bitartean.

· Likido asko edan, bereziki ura, deshidrataziorik gerta ez dakizun. Ez itxaron egarri izan arte edaten hasteko. Saiatu ez hartzen alkohol, kafeina edo azukre gehiegi daukaten edaririk.

· Arin jan (entsaladak, gazpatxoa, barazkiak, fruta eta abar).

· Itxi leihoak, eta jaitsi eguzkiak jotako leihoetako pertsianak; bero gutxieneko orduak baliatu etxea haizatu eta freskatzeko.

· Erabili arropa egokia: zabala, arina eta kolore argikoa eta izerditzen uzten duena, baita oinetako erosoak eta freskoak ere.

· Ahal baduzu, ez irten kalera bero gehien dagoen orduetan.

· Atera behar baduzu, estali burua eta betaurreko beltzak erabili; saiatu gerizpean ibiltzen.

· Ariketa fisikoak kanpoan egin behar badituzu, egizu bero gutxien egiten duen orduetan.

· Ibilgailua aparkatuta eta itxita dagoela, ez geratu inoiz barruan eta ez utzi ez pertsonarik ez animaliarik, ibilgailua itzaletan badago ere.

· Arreta handia eduki behar da jaioberriekin eta ume txikiekin, adinakoekin eta beroaren eta deshidratazioaren ondorioz areagotu daitezkeen gaixotasunak dauzkaten pertsonekin, esaterako bihotzeko gaixotasunak.

· Adinakoek, bereziki etxean bakarrik bizi direnek edo menpekoak direnek, babes neurriak hartzeko zailtasunak eduki ditzakete, hori dela eta, senide batek, lagun batek edo auzokide batek egunero bisita egin behar die, eta beharrezkoa bada, gizarte zerbitzuei laguntza eskatu behar diete.

· Medikuari kontsulta egin ordubete baino gehiago luzatzen diren sintomak, tenperatura altuekin lotura daukatenak, edukiz gero (ahultasuna, nekaldia, zorabioak, goragaleak, konortea galtzea,...)

· Sendagaiak leku freskoan jarri, beroak bere konposizioa eta efektua alda baitezake.

Larrialdietan hartu beharreko neurriak:

· Norbaitek intsolazioa izan badu (azal gorrixka, beroa eta lehorra; pultsu azkarra, buruko min handia) eraman leku fresko batera, estali burua eta besapeak bustitako konpresa hotzekin, bikarbonatoa duen ur gatzatua eman edateko.

· Konorterik gabe dagoela gonbitoak botatzen baditu, jar iezaiozu burua alde batera eta mantendu arnas bideak libre.

Larrialdietan, deitu 112 zenbakira.

Ospatu ez diren festen inguruko oharra

Ekainaren 24an Santa Ana jaiak bertan behera gelditu zirela jakinarazi zen eta ordutik tinko mantendu du Ordiziako Udalak bere erabakia: aurten ez da festarik egon. Festen hasiera izango zen egun bezperan, uztailaren 23an, Ordiziako Udala osatzen duten alderdi guztiek deialdi bateratua egin zuten, gogoratuz ez zela inongo festa ez ekintzarik egongo, eta arduraz jokatzeko deia egin zen.

Hainbat erabaki berezi hartu ditu egun hauetarako Udalak, bai ordutegi aldetik eta baita aforoaren kontrolerako; neurri sendo bat izan da aforoa gainditzen zen uneetan guztia ixteko agindua.

Udal ordezkariak Ordiziako ostalaritza sektorearekin bildu ondoren, elkarrekin hartutako erabakia izan da goizeko 01:00ean jartzea ordutegi muga, eta kalean kontsumitzeko aukera, berriz, 23:00ak artekoa izatea, terrazetan ez bada.

Joan den ostegunean atera zen Ordizia neurri berezietatik. Horrek esan nahi duena zera da: neurri murriztatzaileak hartu ez balira, goizeko 4:30ak arte zabalik egongo zirela ostalaritza establezimenduak. Eusko Jaurlaritzak azaldu duenez, laster sartuko da indarrean sektore horri dagokion ordutegi muga eta 1:30ak arte ireki ahalko dute, eta kaleko kontsumoa 00:00etarako amaitu beharko da. Udalak, beraz, neurri zorrotzagoak hartu ditu egun hauei begira.

Bijilantziaren aldetik Udaltzaingo zerbitzua indartu egin da; egun hauetan luzatu egin dute haien lanaldia establezimenduen itxiera arte lana egiteko. Horrela, zaintza lanak egin dituzte, bai musukoaren erabilera, aforoa eta segurtasun distantziak betetzeko.

Orokorrean, ordiziarren erantzuna txalogarria izan da, bat egin dute Ordiziako Udalak hartutako erabakiarekin eta ez dituzte festak ospatu. Nolanahi ere, Udalak, azken orduetan bolo-bolo dabilen argazkia ezin du alde batera utzi. Argi utzi nahi da irudi horrek une konkretu eta zehatz bati egiten diola erreferentzia, eta, hain zuzen, une horretan bertan kalea ixteko agindua eman zela. Hala egin da kaleek duen edukiera gainditu duten bakoitzean. Hori ere izan da egun hauei begira hartu den beste neurri berezietako bat.

Koronabirusak gogor jo du Ordizia eta orain aste gutxi birusaren agerpena jasan genuen. Ezin dugu ahaztu bizi izan dugun egoera, eta horregatik Udaletik, orain arte egin moduan, herritarrei arduraz jokatzeko deia egiten zaie, jende pilaketak ekidinez, musukoa uneoro jantziz eta segurtasun eta osasun neurriak errespetatuz.


Santa Ana: "arduraz joka dezagun"

Ordiziako Udalak orain ia hilabete eman zuen jakitera aurtengo Santa Ana jaiak bertan behera gelditzen zirela. “Zuhurtziaz” jokatzeko unea zela gogorarazi zuen Adur Ezenarro alkateak, nabarmenduz festak bertan behera utzi izanak zer esan nahi zuen: ez dela inolako ospakizunik izango.

Ordizia gogor jo du koronabirusak. “San Jose Egoitzan, 34 pertsona hil zaizkigu, guztiak ez koronabirusagatik, baina egoera honek ekarri duen bakardade eta isolamenduak eragin handia izan du”, azaldu du alkateak.

Aurten festarik ez da egongo, baina joan direnak gogoan izan nahi ditu Udalak. “Iaz, lehen txupinazoa egoitzatik bota genuen, eta aurten tamalez, iaz gurekin jaien hasiera ospatu zutenetako asko ez daude gurekin. Beraiei zor diegu arduraz jokatzea, eta beraiengatik Udaletxeko balkoia doluz jantziko dugu jaietan”. Horregatik, bihar, uztailak 24, festen hasierako txupinazoa jaurtitzeko unea izango zenean, lona beltz handi bat jarriko da Udaletxeko balkoian. 12:00etan Pello Ramirezek San Jose Egoitzan galdu ditugunen oroimenari eskainitako Agur Biluzia pieza jarriko da bozgorailuetatik, eta tarte horretan ordiziarrak isilunea mantentzera deitzen da. Ekintza sinboliko bat izango da, inolaz ere ez festarako tartea.

“Egun hauetan dei egin nahi diegu ordiziarrei arduraz joka dezaten. Ez da danborradarik ospatuko, ez da txirrindu probarik egongo, ez da mozorrotutako Matutinarik irtengo... Arduraz joka dezagun, gazteenok, baina baita helduek, gurasoek, guztiok”.

Ordutegi-mugak

Tabernen ordutegi muga tabernariekin adostu da, hainbat bilera egin ostean. Hala, goizeko 1:00etan itxiko dira tabernak uztailak 24 ostirala, 25 larunbata, 26 igandea, eta 27 astelehena. Edariak kalean edateko aukera egongo da, baina beti ere, gaueko 23:00ak arte, tabernaren inguruan, eta bertako kontsumizioak badira, gehienez ere 10 pertsonako taldeetan, musukoak jarrita eta 1,5 metroko distantziak mantenduta.

Ostalaritza establezimenduetako edariak ez badira, alkohola kalean kontsumitzea debekatuta dago. 

Une jakin batean, berdin dio zein ordutan, baldintza horiek betetzen ez direla ikusiko balitz eta ondorioz segurtasun baldintzak bermatzea ezinezkoa balitz, dena ixteko agindua emango da berehala.

Oiangu parkea itxita egongo da txiringitoa ixten den ordutik, gaueko 00:00etatik hurrengo goizeko 8:00etara. Ordu tarte horietan ezingo da parkean inor geratu. Ordutegi horretatik kanpo, parkea zabalik egongo da, bertako mahaiak erabili ahal izango dira, beti ere gehienez 10 pertsonako taldeetan, eta musukoak derrigorrezkoak izango dira. Ez da baimenduko Oiangura musika aparailuak, generadoreak edo haimak igotzea.