Larriadi etxea egokitu du Ordiziako Udalak

Ordizia. Larrialdi etxea

Larrialdi sozialeko egoeran dauden ordiziarrei erantzuna emateko bideratuko da

Ordiziako etxebizitza batean larrialdi etxe bat egokitu du Ordiziako Udalak. “Erabilgarri ez zegoen Udal ondasun bat da etxebizitza hau, eta orain larrialdi egoeran daudenei zuzenduko diegu”, azaldu du Ainhoa Jimenez, Ongizate, Hezkuntza eta Berdintasun zinegotziak. Aste hauetan altzariz hornituko da, eta erabilgarri egongo da. Etxebizitza hau irisgarritasun baldintzetara egokitzeko obra bat egin da, helburua larrialdi egoerei erantzutea delako.

Ordiziako Udalean badago ordenantza bat larrialdi sozialen inguruan eta hala zehazten du nork erabili ahalko duten. Batetik, gizarte egoerak artatzeko harrera-etxebizitzak. Etxebizitza hauetan alojamendua eskaintzen zaie iraupen laburreko egonaldia behar duten pertsonei edo familia unitateei, premia edo gizarte larrialdi baten ondorioz, etxebizitza gabeziari aurre egiteko. Tartean dauden kasuak izan daitezke, adibidez, hondamendiak, suteak eta uholdeak. Hauen kasuan, etxebizitzaren erabilpena egin ahal izateko aportazio ekonomiko bat egin beharko da, errentaren araberakoa.

Bestetik, genero indarkeriaren biktima diren emakumeak artatzeko etxebizitza. Etxebizitza horietan alojamendua eskaintzen zaie iraupen laburreko egonaldia behar duten emakumeei eta bizikidetza unitateei, indarberritzeko eta etxeko indarkeriaren egoeraren bat gaintzeko, baldin eta babeserako neurririk behar ez bada. Kasu hauetan, doakoa izango da erabilpena.

“Ordiziako Udala konziente da populazioaren adinaren igoeraz, eta, horregatik, ordenantzaren barruan sartu nahi da osasun arazo batzuk medio mugikortasun ahalmena galtzen dutenek ere larrialdi etxea erabili ahal izatea, errehabilitazio edo etxean beharrezko irisgarritasun aldaketaketa moldaketak egiteko behar den denbora tartean. Horregatik, datorren Plenora eraman nahi da gaia, behar diren eguneratze tramiteak egin eta azken puntu hau ere ordenantzan sartu ahal izateko”, gehitu du zinegotziak.

Erabilera mugatuta

Egoera berezietan izan ezik, zerbitzu hau alojamendua eskaintzera mugatuko da, eta ez da inolako zaintzarik eskainiko. Era berean, alojamenduan ez da bertan hartutako pertsonak zaintzeko langilerik izango, eta etxebizitza ez da inolaz ere mugarik gabeko aldi baterako utziko. Oro har, iraupena lau hilabetekoa izan ahalko da, kontratua sinatzen den egunetik aurrera. Edonola ere, Udal etxebizitzaren egiten den gehienezko iraupena ezin izango da zortzi hilabetetik gorakoa izan.

Ordizian bizi diren pertsona edo bizikidetza unitate guztiek erabili ahalko dute zerbitzua, gutxienez, sei hilabeteko antzinatasun jarraitua izan beharko dute erroldan. Tramitazioa, berriz, Gizarte Ongizate sailaren bitartez tramitatu behar da eta eskaeraren tramitazioa eta balorazioa Gizarte Zerbitzuetako teknikariek egingo dute.

Trukeguneak martxan jarriko du izandako arrakastagatik

IMG 20200108 WA0001

Objektuen berrerabilpenaren beharrezkotasun eta garrantziari helduz, Kutxa Ekoguneak sortu eta bultzatzen duen trukegune sarera batu zen azaroaren 20an Ordiziako Udala. Aste guzti hauetan Udaletxeko arkupetan prest egon da Trukegunea, eta, izatez, urtarrilaren 7an amaitu behar zen ekimena. Hala ere, orain arte ikusitako arrakasta aintzat hartuz, Udalak ekimenaren jarraitzea erabaki du eta martxan jarraitzea Trukeguneak Ordizian; oraindik ere amaitzeko epea ez da zehaztu, beharraren arabera egingo baita.

"Ordiziar eta asko izan dira Trukegunera gerturatu direnak eta etxean erabili gabe zituzten objektuei bigarren bizi, erabilpen bat emateko hautua egin dutenak. Dudarik gabe, eskertzeko jarrera da, eta gogorarazi nahi diegu oraindik ere badutela denbora ekimen honekin bat egiteko", nabarmendu du Maitane Alvarez alkateordeak. Arrakastaren erakusle da arkupean egokitutako gunea liburuz, diskez, eta etxeko apaingarriez beteta dagoela gaur egun. "Beraz, zalantzarik gabe ikus daiteke ordiziarrek bat egin dutela eta haien kontzientzietan badagoela berrerabilpenaren garrantzia", gehitu du.

Trukegunearen kontzeptua Alemanian hasi zen "GiveBox" mugimenduaren izenpean. Hauek kalean jartzen diren guneak dira, erabilera librekoak. Objektuen trantsizio eta zaintza espazio bat da, non objektuak jabetza librekoak bihurtzen diren. Objektuari balioa edo erabilera begira dagoenak emango dio, eta horren arabera trukatu. "Bertan, erabiltzen ez diren objektu zehatz batzuk utz eta hartu daitezke, beti ere, beste pertsona batek berrerabiltzeko moduan dauden bitartean. Ez da beharrezkoa zerbait uztea bertatik gauzaren bat hartu ahal izateko", azaldu du alkateordeak.

 

 

Familia ugariei OHZ ordaintzeko laguntza emango zaie

Ordizia. OHZ IBI

Ordiziako Udalak, 2020ko urteari dagokion Ondasun Higiezinengatiko Zergan (OHZ) hobaria eskatzeko epea urtarrilaren 31ra arte ireki du.

Eskaeraren baldintzak honakoak dira: hobaria %50ekoa da familia ugari orokorrentzat eta %75ekoa familia ugari berezientzat.
Hori emateko ezaugarriak eta ekarri beharreko agiriak:

  • Ohiko Bizitokia: familia guztia erroldatuta egotea.
  • Etxearen balio katastrala 130.000 eurokoa edo gutxiagokoa. Balio katastrala altuagoa balitz, hobaria kopuru horretarainokoa izango da.
  • 2018ko Errenta aitorpenaren kopia, Gipuzkoako Foru Aldundiak onartua.
  • Foru Aldundiko Gizarte Politikako Departamentuak emandako familia ugariaren titulua indarrean izatea.
  • Beste Ondasun Higiezinen jabe ez direla adierazteko Zinpeko adierazpena (garaje bat, trasteleku bat edo jarduera profesionalean aritzeko lokala izan ezik). Herentziazko higiezinetan jabegotza zati-banatuta egotea onartuko da, beste etxebizitza baten baliora iristen ez bada.
  • Ez dute hobaririk izango 60.000 eurotik gorako errenta duten familiek.

    Helbide elektronikoa.Informazio gehiago behar izanez gero 943885850 telefonora dei daiteke.

Eguberrietako azoka berezia, asteartean

4804F29D AE84 4E54 B887 13BD0DCAAD8F

 

Bihar, abenduaren 24an, Eguberritako aparteko azoka izango da Ordizian. Hau da, urtean zehar Ordiziako Udalak antolatzen dituen azoka berezietanazkena; azoka berezi hau bikaina eta salerosketan mugimendu dezentekoa izango delakoan gaude, mahaiaren inguruan ospatzen ditugun jaietarako despentsa bete ahal izateko.

Bertako produktuak atsegin dituztenentzat, Ordizia osoa bihurtuko da orain ere azokaleku, erosle eta saltzaileen arteko elkargune. Hori guztia dela eta, Ordiziako Udalak, beste hainbat erakundeekin elkarlanean, erakusketak eta ekintza ugari prestatu ditu goiz ederra igaro ahal izateko, eta jai giroan murgiltzeko. Jai giroari dagokionez, trikitilariak eta dultzaineroak ibiliko dira kalerik kale, txoko guztiak animatzeko, eta ez da gabon kantarik faltako.

Goizeko lehen ordutik aurrera, Beti Alai pilotalekuan kapoi, antzar eta indioilar erakusketa izango da. Eta horien ondoan ez da faltako pottoka eta txahalik. Plaza Nagusian asteroko azoka izango da. Garagartza Plazan berriz, Euskal Herriko errege-sagar erakusketa izango da; baita bertako fruitu lehorren eta bestelako frutaren erakusketa ere. 

Ordiziako aparteko azoka zabal horretan eskuz landutako produktuek ere, bere lekua izango dute: foie-grasa, eztia, gazta, ogia, goxokiak,... Hori horrela, azoka osatuagoa izango dugu gabon jai hauei begira: Plaza Nagusian baserritarrek produkturik onenak eskainiko dituzte eta Garagartza Plazan eta beste kaleetan eskuz landutako gainerako produktuak.

IDIAZABAL GAZTA EKOIZLEEN AITORTZA EKITALDIA

Joan den urtean bezela eta aparteko azoka honen babesean, Idiazabal Gazta Jatorrizko Deiturak, Ordiziako Udala eta Idiazabal Gaztaren Kofradiarekin elkarlanean, ohore handiz, 2019 urtean zehar nazioarte mailan sariak irabazi dituzten gaztandegiei Esker Oneko Ekitaldia antolatu du. Saritutako gure gaztagileak Ordizian izango dira datorren asteartean, Udaletxe azpiko arkupean goizeko 11.00tan ospatuko den ekitaldian. Aurtengoan ere, Plaza Nagusian Ezkioko Agirretxeajatetxeko sukaldaria izango dugu “Ordiziako Azoka” pintxoak Idiazabal eran prestatzen inguratzen direnei banatzeko. 

“MARIANE” REN AURKEZPENA

D´elikatuz Elikadura eta Gastronomia zentroak 10  urte betetzearekin batera, azoka batzordetik lantzen ari zen ekimena martxan jartzea lortu zen 2015ean; Ordiziako kasko historikoaren tematizazioa, azokaren historian protagonista izan diren pertsonaien eskultura edo irudien bitartez, hain zuzen.  2015 amaieran Goizaneri eman zitzaion ongi etorria, gaztain egurrez eginiko emakume baserritarra eta Ordiziako Azoka Plazan kokatua Udaletxeari begira.  2017ko Artzain Egunean, Peru artzainaren txanda izan zen, Jakes etxean kokatzen dena,  besoan daraman arkumea lagun duela. 

Oraingo honetan, Mariane baserritarrari egingo diogu harrera, Ordiziako azokara, asteazkenero, bere ama eta amonak egin izan duten modura, “Oilo” kalean (egun Domingo Goitia kalea) jartzen den baserritarra eta otarra arrautza bete dakarrena. Hiru pertsonaia hauek Javier Arrieta eskultore zegamatarrak eginak dira Urkiri Salaverriaren aholkularitzarekin. 

Azoka bereziaren altzoan, goizeko 10.30tan Domingo Goitia kalean (Martinez Jatetxe parean) egingo da aurkezpena.