Trukegunea eten egingo da

Trukegunea 1

Objektuen berrerabilpenaren beharrezkotasun eta garrantziari helduz, Kutxa Ekoguneak sortu eta bultzatzen duen trukegune sarera batu zen azaroaren 20an Ordiziako Udala. COVID-19 birusagatik etenda gelditu da zerbitzu hau, eta segurtasun neurriengatik kendu egin da Udaletxeko arkupean zegoen apalategia. Ordiziako alkateordeak, Maitane Alvarezek, nabarmendu du orain arte egitasmo honek izan duen ibilbidea: “ordiziarren erantzuna oso ona izan da, eta asko izan dira Trukegunea erabili dutenak, bai gauzak uzbeko edo hartzeko. Benetan pozgarria da hori eta eskerrak eman nahi dizkiet herritarrei partehartzeagatik eta etorkizunean egitasmoarekin jarraituz gero gunea erabiltzen jarraitzeko deia egin nahiko nuke”. Hala ere, egoera honek bultzatuta, bertan behera gelditu behar izan dela agertu du: “herritarren segurtasuna bermatzea bihurtu da lehentasun, eta horregatik zeuden gauza guztiak jaso egin ditugu. Egoera hau amaitzen denean berriz ere martxan jartzeko asmoa daukagu, izan ere, gauzen berrerabilpena funtsezkoa da”.

Hasiera batean urtarrilaren 7an amaitzekoa zen Trukegunea, baina izan zuen arrakasta ikusita, ekimenari eustea erabaki zuen Udal Gobernuak. Hala baloratu zuen Alvarezek: “

Askok eman diote etxean erabili gabe zituzten objektuei bigarren bizia, erabilpen bat emateko hautua egin dutenak”. Orain arte arkupean egokitutako gunea liburuz, diskoz, eta etxeko apaingarriez beteta egon izan da.

Trukegunearen kontzeptua Alemanian hasi zen "GiveBox" mugimenduaren izenpean. Hauek kalean jartzen diren guneak dira, erabilera librekoak. Objektuen trantsizio eta zaintza espazio bat da, non objektuak jabetza librekoak bihurtzen diren. Objektuari balioa edo erabilera begira dagoenak emango dio, eta horren arabera trukatu. "Bertan, erabiltzen ez diren objektu zehatz batzuk utz eta hartu daitezke, beti ere, beste pertsona batek berrerabiltzeko moduan dauden bitartean. Ez da beharrezkoa zerbait uztea bertatik gauzaren bat hartu ahal izateko", azaldu zuen alkateordeak.

COVID-19: Jarduera ekonomikoen kalteei aurre egiteko laguntzak

1

COVID-19 birusak jarduera ekonomikoan eragin dituen kalte ekonomiko handiei aurre egiteko laguntza bide ezberdinak abian dira, batzuk argitaratu dira eta bestean bidean datoz. Laguntza horiek guztiak, maila ezberdinetatik bideratzen ari dira: Estatua, Eusko Jaurlaritza, Gipuzkoako Foru Aldundia, udalak… Bestalde, jarduera ekonomikoa bera ere oso anitza da, enpresa txiki eta ertainak, autonomoak edota ekintzaileak, eta baita lan egiten duten esparruak ere Horregatik, garrantzitsua da informazio zehatza jaso, eta nora jo jakitea. Horretarako erakunde ezberdinen arteko koordinazio eta elkarlanean oinarrituta honako informazioa helarazi nahi dizugu Ordiziako Udaletik.

INFORMAZIO EGUNERATUA ETA LEKU BEREAN

Gipuzkoako Foru Aldundiak sortu duen plataforman:

https://www.gipuzkoa.eus/eu/web/covid19ekonomia

Bertan argitaratu diren diru-laguntza guztien deialdiak eta gainerako informazio interesgarria leku berean eta lau ataletan antolatuta topatuko duzu:

1.- Osasun laborala        2.- Arlo laborala      3.-Laguntza publikoak         4.- Zerga-arloa

DIRU-LAGUNTZEN KUDEAKETA ETA AHOLKULARITZA

Diru-laguntza ezberdinen kudeaketan GOIEKI Goierriko Garapen Agentziaren laguntza eta aholkularitza jasoko duzu. Horregatik, bertara jo mesedez.

Autonomo edo ETE/PYME bakoitza egoera guztiz desberdin baten aurrean dagoenez, esparruka banatu da arreta. Alabaina, jarduera ekonomikoen aniztasuna ikusita, garrantzitsua da deitzen duzunerako informazioa eskura izatea:

● Lanean jarraitzen duzu? 
    Bai → Nondik? Lantokia / etxetik Fakturazioa %75a baino gehiago jaitsi zaizu.
    Ez → Noiztik? Martxoaren 14tik (RD 463/2020) / Martxoaren 29tik (RD 10/2020)                        

● Ze enpresa mota zara? Autonomoa, ETE/PYME.                                                                                
● Langileak dituzu? ERTE bat aplikatu duzu?
● Finantziazio beharra duzu? Elkargirekin mailegua daukazu? Mailegu bat behar duzu?

ADMINISTRAZIOA (bulego lanak etab.)  

Tel: 943 16 09 70 / 658 75 55 23 Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

EKINTZAILETZA (merkatariak, tabernak, hasi berriak, lanbide autonomoak…)

Tel: 943 16 18 31/ 659 96 48 03 Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

INDUSTRIA (enpresak, tailerrak etab.)

Tel: 943 16 00 40 / 661 73 74 59 Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

TURISMOA (hotelak, jatetxeak, etab.)

Tel: 943 16 18 23 /610 40 51 49 Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.

Artzain eguna, bertan behera

Artzain Eguna

Ordiziako Udalak jakinarazten du, apirilaren 15ean ospatzekoa zen Artzain Eguneko azoka berezia bertan behera gelditzen dela. COVID-19 pandemiak eragin duen Alarma Egoera indarran dagoenez, eta egoera honen luzapena noiz artekoa izango den jakin gabe, ezinezkoa da segurtasun neurriak bermatu ahal izatea, eta, beraz, ez egitea erabaki da.

Ordiziako Udalarentzat lehentasuna herritarren eta kanpotik etortzen diren bisitarien segurtasunean dago. Birusaren hedapena mugatzea ezinbestekoa bihurtu da eta horretarako aglomerazioak ekidin behar dira.

Artzain Eguneko azoka berezia pazko astean ez bada ospatzen, ezinezkoa da atzeratzea, aste santuko oporralditik kanpoko asteazken arrunt batean antolatzea oso zaila litzatekeelako.

Artzain Eguna ekitaldi garrantzitsua da Ordiziako Udalarentzat, izan ere, bertan lehen sektorearekin lotutako ekoizleak elkartzen dira udalerrian eta Idiazabal Gaztaren denboraldi berriaren aurkezpena ere egiten da. Hain zuzen, urteko gazta berriaren mozketa egiten da Udaletxeko batzar aretoan. Horrez gain, eguneko ekitaldirik ikusgarriena artaldeak kale Nagusitik igarotzen ikustea izaten da, udaberriko mendilerroetara igoera irudikatuz. Bestalde, animaliak ere ikusgai jartzen dira herriko hainbat gunetan, eta Garagartza plazan arkumea burduntzian dastatzeko aukera egoten da.

Gaztaren mozketari dagokionez, salbuespen egoera honen amaiera noiz etorriko den ezagutu gabe, oso zaila da data berri bat aurreikustea. Alabaina, Ordiziako Udalaren asmoa da posible den bezain laster ekitaldi hori burutzea.

Salmenta bide berriak sustatuko ditu Ordiziako Udalak

Azoka baserritik etxera

Asteazkeneroko frontoiko 10 saltzaileen azoka bereziaz gain, Ordiziako Udalak bide berriak jarriko ditu martxan, azokara bertaratu ezin diren gainerako baserritar saltzaileek ere, asteazkenero hurbiltzen zaizkien bezeroei saltzeko euren produktuak saltzeko aukera izan dezaten, eta erosle berriek ere. Erosketak telefonoz edo Whatsapp bidez egin beharko dira, baserritarrekin zuzenean harremanetan jarriz. Norberak nahi dituen produktuen zerrenda helarazi beharko dio baserritarrari, eta asteazken goizerako erosketa horiek Beti Alai frontoi txikian egongo dira eta bertan jaso behar dira. Ordainketak telefonoz adostu beharko dira saltzaile bakoitzarekin.

Gauzak horrela, frontoian egoten diren 10 saltzaileez gain, asteazkeneroko ohiko Ordiziako Azokara etortzen diren beste hamar ekoizle prest agertu dira salmenta bide berri hauek erabiltzeko.

Honako hauek dira:

- Maria Jesus Oria (Itsaso) 615007116 

- Aldaba-Zahar Elkartea (Tolosa) 619381555

- Axun Etxeberria (Gaztelu) 619487916

- Azanza Mindegiak (Zaldibia) 680604228 / 659462589

- Edurne Jauregi (Baliarrain) 648840758

- Anttoni Murgiondo (Gabiria) 943161137 

- Maite Iturbe ( Legazpi) 627590170

- Xoxote Gaztak (Azpeitia) 628283258

- Itziar Etxeberria (Ordizia) 627935563

- Lurdes Zurutuza (Ataun) 628217286

( informazio gehiago: https://www.ordiziakoazoka.eus/ekoizleak)

Orain arte hamar ekoizle egon dira Beti Alai pilotaleku barruan haien produktuak saltzen. Datorren astean, hilaren 8an, beste ekoizle bat gehituko da: Idiazabalgo Goiburu Gaztak. Artzai gazta ekoizten dute, eta produktu hori ere egongo da salgai.

Ordiziako azokara asteazkenero etortzen diren saltzaile askok 65 urte baino gehiago dituzte, eta protokoloak zehazten du adin hori gainditzen dutenek ezingo dutela aurrez aurreko salmenta egin Beti Alai frontoian asteazkenetan egiten den azoka berezian. Horregatik, Ordiziako Udalak aukera berriak eskuragarri jarri dizkie ekoizle horiei, haiek ere beraien produktuak saltzeko aukera izan dezaten.