GURE IRAGANA TALDEAK “1512, VILLAFRANCAREN SUNTSIPENA ETA AZOKAREN JAIOTZA” HITZALDIA ESKAINIKO DU

Ekitaldia D’Elikatuz gunean izango da goizeko 11:30etan.

1512. urtea Ordiziako historian kontuan izan beharreko urtea dugu dudarik gabe, alde batetik hiribilduak martxoaren 18an inoiz izan duen suterik handiena eta kaltegarriena jasan zuen eta beste aldetik, gure gaurko asteazkenetako azokaren aitzindaria sortu zen. Bi gertakari hauek, bata goibela eta bestea pozgarri, historiaren haria jarraituz batuta daude. Lehendabizikoak Erdi Aroko Villafranca erabat kiskali zuen eta bigarrenak berriz hiribildua Errenazimentura eraman zuen. Beraz, azoka batek ekonomi kaxkar bat suspertzeko gai izateak merkataritza garai indartsu bat zegoela atzean erakusten digu hiribilduaren berreraikuntza erraztuz.

JAVIER SOTO ARTISTAREN ERAKUSKETA BARRENA KULTUR ETXEAN.

INAUGURAZIOA: Otsailak 9, ostirala, 19:00 h.

Otsailaren 15etik martxoaren 2ra Barrena Kultur Etxeko Erakusketa Aretoan,  “URA” ,  Javier Soto artistaren pinturak  izango dira ikusgai. Erakusketa ohiko ordutegia izango du: Astelehenetik larunbatera, arratsaldeko 6etatik 8etara (Igandetan eta jaiegunetan itxita). Inaugurazioa datorren ostirala, hilaren 12an izango da arratsaldeko 7etan.

"GOIERRI AZKEN BURDIN AROAN ETA ANTZINATEAN" HITZALDIA "ORDIZIA750-HISTORIA" SOLASALDI ZIKLOAN

Jokin Lanz historialariak emango du hitzaldia, ostiralean, Barrenan, 19:00 h.

Datorren ostiralean, otsailaren 9an, arratsaldeko 7etatik aurrera, Jokin Lanz Betelu historialariak  “Goierri Azken Burdin Aroan eta Antzinatean” izenburu duen hitzaldia eskainiko du Barrena Kultur Etxean, "Miguel de Aranburu" Gipuzkoako Historialari Elkarteak eta Ordiziako Udaleko Kultura sailak antolatutako “Ordizia 750-Historia” solasaldi zikloaren barruan.

Azken hamarkada hauetan Gipuzkoan aurrera eramandako kanpaina arkeologikoek Burdin Aroko zenbait aztarnategi azaleratu dituzte, herrixka harresituen sare sendo baten presentzia agerian utziz egungo probintzia osoan zehar. Gipuzkoako haran nagusiak nolabaiteko iparralde-hegoalde norabidea dutenez, aurkikuntzek garaiko komunikabide eta erlazioak gisa honetara antolatzen zirela erakusten digute. Sare honen barruan Oriako arroa dugu denetan zonalde esanguratsuena, bertan, iparraldetik hegoaldera, Anoetako Basagain, Andoaingo Buruntza, Alkizako Belaku, Albiztur-Tolosako Intxur eta Beasaingo Murumendiko herri harresituak ditugularik.

HASI DA ORDIZIAKO HIRIBILDUAREN SORRERAREN 750. URTEURRENA

Erakusketak, hitzaldiak, argitalpenak, dokumentalak, ekintza artistikoak eta aparteko berrikuntzekin dator urtea

Ordiziak bere fundazioaren 750.urteurrena beteko du aurten, 1268an emandako ‘Hiri-gutunak’ edo Sevillako Eskubide bereziak dioenez. Hau dela-eta, ekintzez beteriko urtemuga prestatu da.  Osasuna eta historiari buruzko  solasaldi sorta banarekin eta Pedro Gaztañagak hasi duen  artista ordiziarren erakusketa programarekin ekin zaio urteari. Udal ordezkariek eta antolakuntzan ari diren hainbat ordiziarrek aurkeztu dituzte asteazken honetan, urtarrilaren 31an, agendako ekitaldi esanguratsuenak ‘Ordizia 750’ urteari irekiera ofiziala emanez.

Alfontso X.a Jakintsuak, Gaztelako erregeak, sortu omen zuen herria, herriak sortzeko plangintza orokor bati jarraituz; Segura eta Tolosa ere esate baterako. Hasiera batean, San Bartolome baselizaren ondoan kokaturik zegoen herria, eta "Ordizia" zuen izena. Aurreraxeago aipaturiko errege horrek berak aldatu zion izena, Sevillan 1268ko uztailaren 30ean emandako ‘eskubide’ berezi baten bitartez. Horrez gain, Vitoriak (gaur egun Vitoria-Gasteiz denak) zituen abantailak eta Foruak ere eman zizkion, eta erregeari ordaindu beharreko zergak ez ordaintzeko baimena ere bai. Antso IV.a ‘Ausarta’ izan zen Alfontsoren ondorengoa, eta emandako eskubide berezia berretsi, eta gainera zergak ez ordaintzeko eskubide gehiago ezarri zituen Valladoliden 1290eko apirilaren 28an sinatutako beste agiri bat medio.

IKTUSA, OSASUNARI BURUZKO ZIKLOAREN HITZALDIETAN

Maite Martinez Zabaleta ordiziar neurologoak bi hitzaldi emango ditu hilaren 5ean eta 21ean

Iktusa bigarren heriotza-kausa da (lehena emakumeen artean), eta helduek izaten duten desgaitasunerako lehen eragilea.Euskadin, urtero, 5.000 kasu berri gertatzen dira, eta Espainian 120.000.Azken 20 urteotan % 25 egin du gora iktusak 20 eta 64 urte bitartean dauden pertsonen artean.Datozen 25 urteotan kalkulatzen da iktusak % 27 egingo duela gora.  Estatistikako Institutu Nazionalaren azken erregistroak patologia horrek gorakada izan duela erakusten du; 100.000 biztanleko hilkortasun-tasa gordina 249,2 zen 2014. urtean, 2015ean, berriz, 267,7.Iktusa pairatu dutenetatik gehienek ondorioak dituzte, eta kasuen % 40an eguneroko gauzak egiteko ere desgaitzen dute pertsona.

HASTEAR DAGO OSASUN ZIKLOA DA ‘ORDIZIAKO MENDIKUNTZAREN HISTORIA’ GAIAREKIN

Ekitaldia hiribilduaren 750 urteurrenaren programan kokatu da

Ostegunean, urtarrilak 18, Ordiziaren sorreraren 750. urteurrenaren arira antolatutako osasunaren inguruko hitzaldiak hasiko dira.Juan Carlos Garmendiak, María José Crehuet ordiziarraren doktore-tesia oinarri hartuta, Ordiziako historia medikoari buruzko hitzaldi batekin hasiera emango dio hitzaldi zikloari 18:30ean Barrena kultur etxean.

Garmendiak aprobetxatuko du Segurako hiribilduaren historia medikoan jasotako datuekin eta gertaerekin alderatzeko. Izan ere, horri buruz izan zen bere doktore-tesia. Juan Carlos Garmendia medikuntzan lizentziatua da eta EHUtik Doktore bere “Historia Médica de la villa de Segura” tesiarekin. 1990. urtetik urologian aditua da eta espezialitate horretan lan egin du Bidasoako eta Donostiako ospitaletan. Horren inguruko hainbat artikulu eta publikazio argitaratu ditu eremu nazional eta nazioartekoan.

ORDIZIA 750 (1268-2018) SOLASALDI- ZIKLOA BARRENAN

Urtarrilaren 19an, hasiko da zikloa Joxean Mujikarekin

Aurten Ordiziak , hiri-gutuna jaso zueneko 750 urte ospatu behar dugula eta, Villafrancaren izana eta bizi izan zen garaira gerturatzeko aukera ematen digu. Horretarako solasaldi-zikloa antolatu da; Ordiziako errealitate soziala, politikoa, artistikoa, ekonomikoa ikuspuntu askotarik ezagutzeko solasaldiak.

Hitzaldiak Kultura sailak antolatu ditu, “Miguel de Aranburu” Gipuzkoako Historialari Elkartearen lankidetzarekin eta  modu atsegin eta didaktikoan Ordiziako historiaren berri emango digute espezialista edo aditu famatuek.

750. urteurrenaren ospakizuna aukera bat da gure iragana aztertzeko, oraina ospatzeko eta etorkizuna proposatzeko, eta solasaldi-ziklo hau ospakizun horren ekimenetako bat da iraganera jauzi egiteko eta gure historia memorian eta irudimenean isladatzeko

PEDRO GAZTAÑAGA ARTISTAREN ERAKUSKETA BARRENA KULTUR ETXEAN.

Urtarrilaren 15etik otsailaren 2ra. INAUGURAZIOA:  ostiralean, hilaren 12an, 19:00etan.

Urtarrilaren 15etik otsailaren2ra Barrena Kultur Etxeko Erakusketa Aretoan,  “SENSES: ADAM & EVE” ,  Pedro Gaztañaga (Ordizia, 1967) artistaren pinturak  izango dira ikusgai. Erakusketa ohiko ordutegia izango du: Astelehenetik larunbatera, arratsaldeko 6etatik 8etara (Igandetan eta jaiegunetan itxita). Inaugurazioa datorren ostirala, hilaren 12an izango da arratsaldeko 7etan.