IRISGARRITASUN OBRAK EGITEAGATIK DIRU-LAGUNTZAK EMATEKO DEIALDIA ZABALDU DA

Eskaera egiteko epea azaroaren 30ean itxiko da

Etxeetako irisgarritasun arazoak konpontzeko aurreikusitako obra eta jarduketak egiteko dirulaguntzak emateko eskaera-deialdia zabaldu du Ordiziako Udalak.  2018ko aurrekontuan 11.000 euroko kopurua aurreikusi da, guztira. Itzuli beharrik gabeko zuzeneko diru-laguntza bat denez, xede horretarako udal-aurrekontuan jasotako kopuru gehiengoa eraikin bakoitzeko etxebizitza-kopuruarekiko proportzionalki banatuko da, betiere baldintzak betetzen dituzten eskaera guztien artean.

Diru-laguntzak emango dira  2017 urtean zehar baimenarekin egindako irisgarritasun obrei, eta betiere justifikatzen bada 2018ko ekainaren 30 baino lehen amaitu direla.

Eskaerak Ordiziako Udaleko erregistro orokorrean (Arreta bulegoan) azaroaren 30 baino lehen aurkeztu beharko dira, honako dokumentazioarekin batera:

KIROL PARKEA EGIN DA MAJORI ETXADIAN

Futbolean, saskibaloian eta pin-ponean ibiltzeko aukera dago

Ordiziako Udalak Majori etxadian kirolerako aisialdi gunea prestatu du. Udal aurrekontuak definitzeko burututako parte-hartze prozesuetatik dator auzoak hobetzeko eskaera eta hortik diseinatu da egitasmoa.

Futbolean, saskibaloian eta pin-ponean jolasteko 1.092 metro koadroko eremuan antolatu da, erabilera gutxi zuena, Majoriko jolas-parkearen ondoan. Era berean, eskailerak eta esertzeko dagoen harmaila konpondu eta garbitu egin dira eta etxebizitzetara baloiak ez erortzeko sarea jarri da. Institututik gertu dago eta Majoriko bizilagunei ez ezik, ingurukoei ere zerbitzua eman diete. Gertu daude Txindoki etxadia, Gernikako Arbolaren pasealekua, Usunbilaga eta Euskal Pilota kaleak.

*Santamaria alkatea eta Fernandez, Zerbitzuetako zinegotzia, gune berrituaren alboan.

ORDIZIAK LEHENENGO TXAKUR PARKEA ZABALDU DU UPABIALDEAN

Herrian 900 txakur daude erroldatuta eta hauek aske ibiltzeko  jabeen eskariak jaso dira

Ordiziak txakurrentzat lehenengo gune berezia prestatu du. Upabialdean dago, skate parkearen ondoan. San Joan auzoan jarri behar zen, baina Udalak bizilagunen artean kontsulta eginda gero, proposamenak harrera ona ez zuela ikusita, ordezko tokien bilaketa egin zen. Upabialdekoaz gain, aurten bigarren gune bat zabalduko da, Altamira parkeko zati batean.

HASTEAR DAGO ALTAMIRA KALEA BERRITZEKO OBRA

Bizilagunek 2017ko aurrekontuak zehazteko aurrera eramandako parte-hartze prozesuan eskatutako eskariari erantzun nahi zaio

Hilaren 22an hasiko da Altamira kaleko urbanizazioa berritzeko obra. Lanak hamasei asteko iraupena izango duenez, maiatzaren erdira edo bukaerara arte luzatzea aurreikusten da.  Astearte honetan zuinketa lana egin zen, une honetan enpresa segurtasun eta osasun plana prestatzen ari da eta datorren astean laneko etxolak jarriko dira. Astelehenean bandoa jarriko da etxeetako atarietan.

Herriko auzoetan hainbat berrikuntza egiten ari da Ordiziako Udala azken bi urteotan. Altamiran, Okorrobidea kaleko obrarekin hasi zen eta Altamira izena duen kalearen txanda iritsi da orain. Hemen ere, ur-hoditeria berritu, euri-ur eta ur-zikinen hodiak bereizi, saneamendu sistema aldatu, espaloia zabaldu eta errepideko zorua berrituko da. Argiteria ondo dago eta dagoena mantenduko egingo da.Eremuak 1.651 metro koadroko azalera du eta kalearen luzera 167 metrokoa da.