Datorren ekainaren 30etik uztailaren 3ra Nanoteknologia eta Nanomagnetismo Kongresua (RTNSA- Recent Trends in Nanomagnetism, Spintronics and their Applications) egingo da Ordizian, egun horietan udalerria Nanozientziaren eta Nanoteknologiaren hiriburu bihurtuz. Kongresuan parte hartuko duten zientzialarien artean presentzia nabarmena izango dute 2007ko Fisika Nobel Saridunek, Albert Fert eta Peter Grünberg-e, laborategi, institutu eta unibertsitate hoberenetako eta entzutetsuenetako ikertzaile taldearen buru ibiliko baitira. Jardunaldiak Universidad del País Vasco/Euskal Herriko Unibertsitateko (UPV/EHU) Magnetismo taldeak eta Ordiziako Udalak antolatu ditu.

Ekimena ofizialki uztailaren 1ean 12:00tan inauguratuko da Ordiziako Barrena Jauregia. Bertan izango dira Hezkuntza, Hizkuntza Politika eta Kultura sailburu Cristina Uriarte, UPV/EHUko errektore Iñaki Goirizelaia eta Ordiziako alkatea, Jose Miguel Santamaria.

ANIMATU eta PARTE HARTU!

San Pedro bezperan, datorren ekainaren 28an, hainbat ekintza antolatu ditu Amets Bide Kultura Elkarteak. Hasteko, 12:30etan dantza emanaldia izango da Anoetako Anitz, Lazkaoko Oin Arin, Ibarrako Alur eta Ordiziako Amets Bideren eskutik. Arratsaldean berriz, 17:00etan VIII. Patata-tortilla Lehiaketari ekingo zaio. Jarraian, 18ak aldera, Txertubi taldearekin erromeria. Eta gaueko 22:00etan Garagartza Plazan San Pedro sua.

Ohiturari jarraituz, Amets Bide Elkarteak gonbidapena luzatzen du: tortillatxo bat egin eta Garagartza Plazara arratsaldeko 16:30etarako eramatea. Asmoa lehiaketaren ondoren patata-tortilla denak salgai jartzea da, pintxotan. Sagardoa ere izango da eta giro aparta ziurtatuta izango da.

Beraz, Ordiziako herriari patata-tortilla egiten duzuen trebezia erakutsi nahi izanez gero, gerturatu Garagartza Plazara, patata-tortilla eskuetan, ekainaren 28an, eta gozatu emanaldiaz, erromeriaz eta giroaz. Eta bukatzeko San Pedro sua Gargartza Plazan, gaueko 22:00etan. ANIMATU eta PARTE HARTU!

Dar-Dar produkzioak Gizarte Ekintzako Kooperatibak  eta Ordiziako Udalak “Giza Eskubideak Herrira Ordizia 2015” proiektuaren aurkezpena egingo dute datorren ostiralean Barrena Kultur Etxean.

Proiektua “Ordizia Hiri hezitzaile” programaren barruan kokatzen da Udalaren laguntzarekin. Aurkezpena datorren ostiralean ( Ekainak 12an), arratsaldeko 18:30etan egingo da Barrena Kultur Etxean.

Arratsaldeko 17:00 etan, ikastetxeetan Giza eskubideen inguruan  eginiko lanketetatik sorturiko muralen erakusketa irekiko da. Erakusketa hau, Ekainak 24rarte ikusgai izango duzue Barrena Kultur etxean.

Proiektu hau integrala, horizontala eta zeharkatzailea da bere izpirituan.

• Integrala:Ordiziako biztanleria bere osotasunean duelako helburu. Adin txikikoentzat, nerabeentzat, gazteentzat, helduentzat eta 3. adineko pertsonentzat, Giza Eskubideen inguruan ekintzak, jarduerak edo programak sortzea baitu helburu.
• Horizontala:Ordizian herri ekintzan lanean ari diren eragileekin eta elkarteekin, elkarlana eta dinamizazioa sustatzea baitu helburu.
• Zeharkatzailea:Ordiziako gizartea eta bizitza soziokulturala zeharkatzea baitu helburu.

  “Zure hatzaren ez galtzeko” errezitaldi musikatua Itxaro Borda poetisarekin eta Itsaso Gutierrez guitarra jolearekin. Hitzordua ostiralean gaueko 22:00etan Barrenan

Ordiziako Kimetz Emakume Elkarteak, urtero antolatzen duten literatur lehiaketako sariak banatuko ditu datorren ostiralean.  Ekitaldi hori osatzeko, Itxaro Bordak, idazlea, eta Itsaso Gutierrezek, guitarra jolea, “Zure hatzaren ez galtzeko” errezitaldi musikatua eskeiniko dute. Sari banaketa 22:00etan hasiko da, eta segidan egingo dute poesia eta musikaren emanaldia, Barrena Kultur Etxean. Sarrera, debalde izango da.

Elkar argitaletxeak plazaratu zuen poesia bilduma hori 2014ko irailean. Hondar bost urteetan idatzi olerkiak biltzen ditu, omenaldiak asko eta gehienak esker onezkoak. Ahoan bilorik gabe isurtzen da idazlearen pentsamendu bizitorea poema hauetan. Musikaz lagundurik ematean are indar handiagoa dute: gitarra elektrikoa ezin hobeki dagokie. Aldion Itsaso Gutierrezena.