Kontzertua igande honetan, hilak 15a, arratsaldeko 6:30etan Parrokian.

Ordiziako Udalak eta Gipuzkoako Foru Aldundiak antolatutako Barroko Aire kontzertu zikloarekin jarraituz, datorren igandean, hilak 15a, Ordiziako Parrokia Elizan, arratsaldeko 6:30etan, bigarren kontzertua entzuteko aukera izango dugu, L’Incontro bikotearen partaidetzarekin. Oso konbinazio bitxia eta erakargarria oboek eta harpak eskainiko dizkiguna, Itziar Lujanbio eta Francesca Romana di Nikola musikarien eskutik.

L’INCONTRO bikoteak, Francesca Romana di Nicola harpistak eta Itziar Lujambiooboejoleak osatzen dute. Biek Musikeneko Goi Mailako ikasketak egiten ari zirela topo egin zuten Donostian. Bakoitzak bere bidea jarraitu zuen etapa honen ondoren. Itziar Koloniara abiatu zen bere formakuntzarekin jarraitzera eta Francesca maila nazional eta internazionalean  kontzertuak  ematen aritu da. Hiru urte ondoren berriro elkartu dira Euskal Herrian ikasi duten guztia partekatu, aberastu eta elkarrekin errepertorio zabal bat lantzeko. Euskal Herri eta Frantzian eman dituzten kontzertuen artean, Donostiako Musika Sakratuaren Zikloan emandakoa azpimarratzen dugu, Donostia Kulturak antolatua.

Muguruza, Ordorika, Tapia, Esne Beltza, eta beste batzuk, kartelean

Plaza Nagusiak Amaia Apaolazaren omenez igandean izango den ekitaldia hartuko du. Apaolaza musikarien managerra zen eta aurreko udan zendu zen.

Ekitaldia bere ingurukoek antolatu dute, Ordiziako Udalaren laguntzaz. Barroko Aire jaialdiko kontzertuaren ondoren hasiko da, 19:30tan, hain zuzen. 

Kartelean honako musikarien presentzia iragartzen da: Fermín Muguruza, Ruper Ordorika, Joseba Tapia, Gose, Esne Beltza, Niña Coyote eta Chico Tornado. Parte hartuko dute baita Xabier Muñoz, Iñaki Murua, Kaotiko, Arkada Social eta Betagarrik, besteak beste.

Sarrera irekia da eta ez da harritzekoa izango beste sorpresaren bat gehiago ere izatea.

Igande honetan, arratsaldeko 18:30etan, Parrokian, zikloaren lehen kontzertua: Pamplona XXI Kamera Orkestra.

Aste bukaera honetan, igandean hain zuzen,  hasiko da Ordizian BARROKO AIRE, Musika Barrokoaren egunak jaialdiaren XXX.ekitaldia. Eta jaialdi horrek Ordizian segituko du hilabete honetako igandeetan, herriko Parrokian lau kontzertu egingo dira, Ordiziako udalak eta Gipuzkoako Foru Aldundiak antolatuta. Ataungo San Martin Elizan ere izango da ziklo honen kontzertu bat.

Zikloari hasiera emateko igande honetan, Ordiziako Eliz Parrokian, arratsaldeko 6:30ean, Pamplona XXI Kamera Orkestrak  kontzertu interesgarria eskainiko du. Hilaren 15an jarraituko du programazioak L’Incontro, arpa eta oboe bikotearekin. Azaroaren 22an Joseph-Ramon Olivé baritono katalandarra arituko da David Espasa klabejolearen laguntzarekin. Eta programazioari amaiera emateko azaroaren 29an Ordiziako Oroith Abesbatza eta Et Incarnatus oskestaren txanda izango da Migel Zeberioren zuzendaritzapean.

Aurtengo bigarren gaztal lehiaketa irabazi du berriz Zeanuriko gaztandegiak

XXI. Arabar Errioxako Azokarekin batera, Ordizia Txapeldun gazta lehiaketaren XXVIII. ekitaldia ospatu zen larunbatean Plaza Nagusian. Aurtengoan Ordiziako iraileko gazta lehiaketa irabazi zuten Zeanuriko “Ipiñaburu” gaztandegiko Jon Etxebarria eta Puy Arrieta, izan dira oraingoan ere irabazle. Bere gaztak 8,29 puntu atera zituen eta Urrezko Gazta eramateko atetan gelditu da 8,5eko puntuazioa gainditzeko oso gutxi falta izan baitzaio.