Ostegunean, arratsaldeko 18:00etan, Udaletxeko batzar aretoan 'Eukaliptoen eragina ingurumenean' hitzaldia eskainiko dugu, Arturo Elosegi adituaren eskutik. Zuzenean jarraitu ahalko duzue Youtubeko Udalaren kanalean.

“Nikel isurketen aurkako neurriek emaitza onak eman dituzte. Orain, jarraipena egitea beharrezkoa da”

Ordizia eta Zaldibiako udal ordezkariak Eusko Jaurlaritzako Ingurumen Saileko zuzendari den Javier Agirre eta Saioa Ferro teknikariarekin elkartu dira bilera telematiko bidez ostegun goizean, otsailaren 4an. Orain hilabete batzuk bi herrietan egindako neurketetan airean Nikel partikulen presentzia altua atzeman zen. Horren harira, hainbat neurri hartu dira eta emaitza horiek ezagutzera eman dizkigute, 2-3 aste barru publiko egingo dituelarik Eusko Jaurlaritzak.

Gaia ez da hilabete hauetako kontua. 2016an dagoeneko atzeman zen airean Nikel kopuru altua Ordiziako neurgailu batean, eta 2018ko urte amaierako datuak berriro altuak atera ziren. 2019ko azken hilabeteetan neurtu zen Zaldibian lehenengo aldiz, han ere balio altuak topatuz.

Arazo honen aurrean, jarraipen zorrotza egin zaio gaiari: “hasieratik eskatu genuen Nikel isurketen mailaren inguruko informazioa. Bilerak ere eskatu genituen, izan ere, airearen kalitatea ez da Udalen eskumena. Udalok ez ditugu baliabideak neurketa horiek egin ahal izateko, baina eskumenak ez izateak ez du esan nahi ardura ez daukagunik. Ardura handia baita gure herrietako biztanleen osasunari eragiten dieten gaiekin”, zehaztu du Adur Ezenarro Ordiziako alkateak.

Zaldibiaren kasuan, 2020ko otsailaren 6rako deitu zen bilerara gonbidatu zituzten; lehenengo aldiz izan zuten orduan arazoaren berri.

Gaur, ia urtebeteren ondoren, Eusko Jaurlaritzak eta isurien sortzaile izan diren enpresek hartutako neurriak azaldu dizkigute. Hasiera batean foko bat zegoen atzemanda Ordizian. Hor neurriak hartu, eta parametroen maila jaistea lortu bazen ere, ez zen arazoa konpondu. Beraz, beste foko bat egon zitekeela ondorioztatu zen. Zaldibian topatu zen hau. Arazoaren jatorria identifikatu zen, eta hori konpontzeko neurriak hartu ziren 2020an zehar.

Ingurumen Sailak neurri hauen emaitza zehatzak azaltzen dituen txostena 2-3 aste barru argitaratuko badu ere, aurrerapen gisa adierazi digute neurketek emandako emaitzak onak direla Ordizian zein Zaldibian, eta nikela urteko bataz besteko 20ko langaren azpitik kokatu dela. Bi Udalek gure poztasuna agertu diegu, baina baita hainbat eskaera egin ere, uste baitugu oraindik gaiari gertuko jarraipena egitea ezinbestekoa dela.

Ordiziako Udalak Eusko Jaurlaritzari gaiaren jarraipen zorrotza egiteko eskatzen dio, berresteko benetan datuen joera beheranzkoa dela.

Zaldibiako Udalaren kasuan, Gaintzako bidegurutzeko neurgailua azaroan erretiratu zuten eta Lardizabal Eskolakoa mantendu egin dute orain arte. Hala ere, hau erretiratzea erabaki dutela jakinarazi digutenez, Zaldibiako Udalak eskaera bideratuko du neurgailua bertan mantendu dadin, gutxienez 2021eko iraila-abendua tartean, airearen kalitaterako hilabete txarrenetan.

Bukatzeko, bi Udalen aldetik eskatu diegu, hainbat prozesu industrialetan aurreikusi gabeko isurketak izanda, antzeko prozesu guztietan neurri berdinak hartzeko lanak ezinbesteko ikusten ditugula. Izan ere, gure herrietan fokoak detektatu eta neurriak hartu badira ere, asko izango dira antzeman gabe egoera berean egon daitezkeen herriak lurralde osoan barrena. Honen barruan, aipatzekoa da enpresek erakutsi duten jarrera ona hasieratik harreman zuzena izan baitugu eta beharrezko neurriak hartu baitituzte.

Eusko Jaurlaritzak agindu digun txostena eskuan izatean, udal komunikazio bideetan herritarren eskuragarri jartzeko konpromisoa hartzen dugu.

Ordiziako Udalak abian jarraipena emango dio egitasmoa, herriko ikastetxeetako ikasleei zuzenduta

2017ko maiatzean abiatu zen Ordizian Oianguko Natur Eskola, Aranzadi Zientzia Elkartearen eskutik. Egitasmo honekin, Udalak herriko txikienak inguruan duten naturara gerturatu nahi ditu, eta horretarako aukera paregabea eskaintzen du Oiangu parkeak. Urtero abiatzen den proiektua da, eta Udalak argi zuen jarraibidea izan behar zuela, duen garrantziagatik. Adur Ezenarro, Ordiziako alkatea: “Oiangu altxor bat da eta gazte garenetik inguruneak eskaintzen dizkigun aukerez gozatzeko aukera izatea zorte handia da. Horregatik, ordiziarrak Oiangu gertutik ezagutzeko aukera izatearen aldeko apustua egingo dugu beti”.

Orain arte Urdaneta eta Jakintza ikastetxeko 3. zikloko ikasleekin egin dute lan Aranzadi Zientzia Elkartekoek, eta aurtengo edizioan ere hala izango da. Apirilean eta maiatzean 8 eta 12 urte bitarteko Ordiziako ikastetxeetako haurrak Oiangura igoko dira Aranzadiko begiraleekin eta bertan egun osoa irauten duten jarduerak egingo dituzte, jolas librerako astia ere utziz. Jarduerak, jolas eta tailerretan oinarritzen dituzte, non ikasleak beraiek diren Oianguko bitxikeria eta altxorrak deskubritzearen protagonistak. “Azken finean, naturarekin esperientzia zuzenak izanez eta honekiko erlazio afektibo bat sortuz, naturarekiko errespetuzko jarrerak bultzatzea da proiektu honen helburu nagusietako bat, naturari buruz ikastearekin batera”, azaldu dute Aranzadiko kideek. Izan ere, haien hitzetan, ingurune naturaletatik geroz eta urrunago dagoen gizarte honetan, honekiko ezagutza ugari galtzen ari da. Horrez gain, jakina da, zenbateko onura dakarren ingurune berde batekin harremanetan egoteak, onura hauek bereziki garrantzitsuak bilakatzen direlarik umeen ikasketa prozesuan: gaitasun motorra lantzeko aukera paregabea eskaintzen dute, harremanak sendotzen laguntzen dute, konzentrazioa handitzen laguntzen dute, gaixotasunak pairatzeko arriskua murrizten da, etab.

Iazko kasuan, esaterako, eskaintza zabaldu egin zen eta 3. ziklokoez gain, 2. zikloko ikasleak ere batu ziren egitasmora. Guztira, 540 haurrek parte hartu zuten. Yoana Garcia, Aranzadiko kideak halako balorazioa egin du: “orain arteko balorazioa oso ona da. Irakasleek eskertzen dute ikasgelatik atera eta herriko naturgune batera joatea, herriko baliabideak ezagutzeko asmoz. Bestalde, ikasleek oso ondo pasatzen dute; ekintza dinamikoak eta elkarlanean egitekoak dira. Duen berezitasuna, gainera, Oianguko biodibertsitatera egokituta dauden ekintzak egiten dituztela da, hau da, bertako landare eta fauna ezagutzen dituzte, hala nola, sagastia eta putzua.

Aparkamendu mugatuko eremuak arautzen dituen Udal ordenantza aldatzea proposatuko du Udal Gobernuak azaroko Plenorako. Gauza jakina da hainbat espaziotan aparkatzeko arazoak daudela udalerrian. Besteak beste, Urdaneta, Maribaratza, Diego Rivero, Goierri, Berria eta Joseba Rezola kaleak dira horiek. Horri aurre egiteko ordutegi zehatz batean eremua aparkatzeko bizilagunentzat mugatzea proposatu zen, gune gorri bat jarriz. Adur Ezenarro, Ordiziako alkateak, egitasmo eta sistema orokor baten beharra nabarmendu du: “udalerri osoaren azterketa bat egitea funtsezkoa da, eta ondoren hartzea erabakiak; ez auzo bakarrari dagokiona, osotasunean baizik”.

Ordenantzaren aldaketek eragin zuzena izango lukete: batetik, ibilgailuaren jabea sektorean erroldaturik ez balego, baina jabearen senitarteko zuzen batek mendekotasuna aitortuta badu dagokion agiriarekin, eta zaintza lanak familiartekoek egiten badituzte, zaintzailearen ibilgailua onartuko da. Bestetik, ibilgailu horiek pertsonak garraiatzekoak izango dira; baina beste kategoria batekoak balira, baina aparkaleku plaza batean sartzeko tamainakoak eta jabea sektorean erroldatua egoteaz gain, ibilgailua ere hala badago, eta ibilgailu hori loturik dagoen enpresaren lokala ere sektorean kokatzen bada, onartua izango da.

Era berean, udalerri osorako sistema orokor bat martxan jarri bitartean, egoilartasuna ematerako orduan, oinezkoa den Alde Zaharreko eremu bateko bizilagunek ere txartelaren eskaria egin ahalko dute, zehazki Kale Nagusia 1-11/2-22, Santa Maria 3/19, Goen 1-9/2-8, Artega kalea 1 eta 2.

Orain arte gaizki aparkatutako ibilgailuei edo txartelik gabekoei jarri zaizkien isunen inguruan ere mintzatu da alkatea: “herrigune osoan isun arruntak 40 eurokoak dira, baina, aldiz, gune gorriari erreferentzia egiten zion ordenantzan 200 eurokoak izan behar zirela zegoen jasota. Horregatik aldaketa proposatzen da, eta isunak 40 eurokoak lirateke, herriko beste eremu guztietan aplikatzen direnen antzekoak”.

Txartelak ez kobratzea

Ordiziako Udalak beharrezko ikusten du herri osorako aparkaldi mugatuko sistemaren azterketa, eta hori abian jarri arte, egoiliarren txartela ez da ordaindu beharko, auzo bakarrean dagoelako soilik. Puntu hau ere Plenotik pasako da. Lanketa egin ostean, eta sistema orokorra ezartzen denean, lehen txartel horren prezioa 20 eurokoa izango da, eta bigarrenarena 75 eurokoa.

Gune gorria abian jarri zenean 201 plaza bideratu ziren helburu horrentzako eta aparkatzeko muga 20:30etatik 09:30era jarri zen, astelehenetik ostiralera, baimenduetako bizilagunentzat. Bestalde, goizeko 9:30etatik iluntzera eta asteburu zein jai egunetan gune gorri hori parking librea izango zela erabaki zen.